JOB 27 - Boy Lonana

Boy ma Job dam a doogorana

¹ Job tuɗ fok u boy mamma di ana,

² An suu tan u iirira vi Lona ma ka wan ɗegee manda ɗina u sem ma Saɓakŋa ma hinin hu lassa wanna.

³ Hu li ma an ka musuk iiri tuna, hu li ma musukka vi Lonara ka hu cinin tuna.

⁴ An suu ki ana vunun di va ma co kaɗi. Sinin ka di dlara ganyambi lay.

⁵ Gasi ta daŋ ta an dagira kaɗi ta ta lini an miɗ lay. Vunun ka ndi kaŋga kay dira an di ana an li va co kaɗiraɗi.

⁶ An coli ni hu ɗegee manda ka hiniɗ kiɗi. Va ma co ma dan hu saa manda na ɗow ni kaɗi.

⁷ Ko suu may suu gonokka u anna, suu ka duurunna, kaasi ɓakŋa kasi ko suu cona na.

⁸ Agi di ana, «Va ma sa ma li dla cora a hin fam hu li ma Lona kaam zewem ay kina ni mege? Agi ka di naɗi su?

⁹ Lona hin humum tii mamma may su? Hu li ma hahawra famma ni nam hum su?

¹⁰ Nam lay ni ka sa ma furi u dlaŋ ma Saɓakŋaɗi. Ka ndak a joɓom kay dlaɗi lay.»

¹¹ An min takagi saɓak ma vi Lonna. An ka ŋgayagi saara vi ma Saɓakŋaɗi lay.

¹² Nera col ay ni arage? Yalna buu ni ara na ɗowge?

Fi ma jak ki hawana

¹³ Suuna ka wi warak ma sa ma li dla cora fammaɗi. Sa namma ka tuɗ hu mbassa vi suu iirina koɗi.

¹⁴ «Lini goryosi wul lay ni duuna hin casi kiyo. Goryosi ka fi fu ma tira ŋgolɗi lay.

¹⁵ Suu hin iirina mbodna casi kiyo, hin pasi ni boyogosi ka ndak a tiirisi oloɗi lay.

¹⁶ Lini gursura kom ko ndal ŋgetlna na lay, lini barawna sami um coco lay,

¹⁷ Nam tokom coco may, sa ma ɗegeena hin cukummi namu. Gursura sa ma li ndaa dlara hin basaɗ ni namu.

¹⁸ Zi mayra suu cona miniɗta ka col eŋgi, ni ko ndal mbutluɓ ma suuna minim a juɓ u sene gugutluna ɦawa na.

¹⁹ Sa ma ɦizina buu gaa, ni daɓ mamba. Nam gol irimmi va ka dew oloɗi.

²⁰ Ndaana vammi ko ndal mbo ma ɓaɗna na. Duk njeŋgera ni mbiriwinda mboɗom tlam ki lay.

²¹ Babaa ma u maɗiinana tlam tuɗum ha ki na day. Nam tlam ay ki vo hu ziimu.

²² Asi gikimmi ka wam hahawambi lay. Nam so tam a pii ki ko suu a camma.

²³ Suuna halaŋ ko kosi san ummi saniya. Tuɗ cam irim ay ni um vo hu ziimu.»