JOB 23 - Boy Lonana

Job Boy ma Job dam a kalavandirana

¹ Job gijaŋ njaɗta di ana,

² Cemi olo ni sek manda kaa, an ka ndak a kak bay saaɗi.

³ Ҥay, lini an wi li ma nam ka huna ni, an min tuɗ ta ta tew ki eg dlam mamba mulla.

⁴ An hin cuɗ dlaanda ki fokomu. An hin a ci gin wayra u nam cocoo.

⁵ An hin wi boy ma nam a damma. An hin hum dlara nam min a dandara may.

⁶ Lona ndak a takan saɓakam ki su? Ҥawaa, nam hin hum dlara an hin dambara.

⁷ Sa ma ɗegeena hin tuɗ ci wayra u namu. An hin suɗ ki ko saan ma kaan ɓakŋa kanna.

⁸ May lini an tuɗ irin u maɗiina, nam ha ka huɗi. Hoŋ irin u fiɗigina lay an ka wambi.

⁹ Nam ha ki li sun ii mbayaw su? Ni an ka wiɗi lay. Nam ha ki ŋgay ii dali na su? An ka wambi lay.

¹⁰ Doli ɗini nam wan voɗ manda an tlaɗta. Lini nam tukunu ni an hin kal ki ni teteɗ ko ndal lorra teteɗta na.

¹¹ Sen tlam ha ni u dumum na tew tew. An tuɗ ni hu voɗ mamba ɗegee, tli vunun ka ki keŋgi.

¹² An ŋgel gaɗta nam dandara kaɗi. Boy mamma halaŋ an ŋgayam hurunu.

¹³ Na may lini nam di dlara wa ni sa ma ci wayra funumma ni gege? Dlara nam min a laɗta nam laɗ ni u min mamba.

¹⁴ Dlara nam min a landa egenda nam ndak laɗu. Hurum ka saa kay dlara daŋga bolow coco lay.

¹⁵ Kay ndaɗta an mbuɗ ki fokom maŋi cocoo. An saa cocoo, an ki mbuɗi ndaa coco lay.

¹⁶ Lona kalan ndaana ki hurun wa. Ma Saɓakŋa van ki kaŋga wa.

¹⁷ An seŋ tanni ka ko ndufunda wandaɗi, ka lan ndaana ni ndufunda kuluɓun wandaɗi.