JOB 22 - Boy Lonana

Elifaz Boy ma Elifaz dam a hindirana

¹ Elifaz ma Temanna gijaŋ njaɗta di ana,

² Sa warna ndak a li jivi ii Lona may su? Yal mamma nam wamma ni kay tam a fuɗ tamba ɦawaa.

³ Ma Saɓakŋa a caa yam kay ɗegee maŋga su? Va ma nam a fam hu poy maŋga ɗegee ndaɗta ni mege?

⁴ Nam a njun kaŋŋi u ndaaraŋ ma nam laŋŋana su? Nam a tuɗ u aŋ hu ɓak ma aŋ hin kaamma su?

⁵ Dla cora aŋ laɗta ni ka ŋgol cocoɗi su? Dla cora aŋ laɗta ni ka ndumbi.

⁶ Kay yow tlesuu vi ndarayaŋŋana ki bay u boyna. Aŋ yow baraw ma vi suu daŋŋa ki, hinisi ki siiliya.

⁷ Sa ma laa li cam lay aŋ ka ɦam yoɗi lay. Suu mayra casina aŋ ka min a ɦasi fuɗi lay.

⁸ Ndaŋgara hin ay ki ni maŋ sa ma saɓakŋa sak sak. Ŋga tara zul ŋgol coco lay.

⁹ Aŋ dik boyogi suu donona ni u kosi ma vadlna. Kus bik gor suu kuyuna ki lay.

¹⁰ Kay ndaɗta aŋ cemi ka kali duk daw ma gunina. Ndaana vaŋ cemi wa.

¹¹ Ndufunda coco wandara aŋ ka waɗɗi su? Mbo ma tli coco wanna tluɓuŋ wa.

¹² Lona ha ni ka kolo huulonaɗi su? Gol ciciwra ha kolo kaŋ huulona gige.

¹³ Aŋ hin di u vunuŋ ana, «Lona wi mege? Nam ndak a kaɓakŋa duk ndufunda su?

¹⁴ Ɗugulla ki baari irimu, nam ka wiɗi. Nam ka poya, ŋguy ha ni kolo huulona.»

¹⁵ Aŋ min a tli ni voɗta jewra su? Voɗta suu may suu li dla cora tuɗ huruɗta.

¹⁶ Asina dikisi ki ni jew bay liisina ndaka. U ziisi ma gii gana bow ki ni ko ndal zi ma mbona tlam kina na.

¹⁷ Suu asina di Lona ana, «Ҥuɗ taŋ ha ki egemiya, hinimi na en.» Lona ma Saɓakŋa ndak a lami me egemi nige?

¹⁸ Doli ɗini Lona ni sa ma oyosi ziisi ki u tlenana. Na may hu saa masira asi ɦuɗum ha ki egesi na day.

¹⁹ Suu ɗegeena wasi asi puk ki ga na ni ka san usiya. Sa ma ɗegeena ka panasiya.

²⁰ Asi di ana, «Gola suu babali maygisina daɓ ki wa. Bege masira kura ŋgalaɗ ki wa.»

²¹ Taɓ duk ɦoŋoŋ u Lona ni aŋ hin mbuɗ mariyaɗ. Li wa na ni jivi maŋga hin hoŋ ay egeŋu.

²² Vi haɗ mayra kal ay ki funumba, vam gaɗ mamba huruŋ jiviya.

²³ Lini aŋ hoŋ ay eg ma Saɓakŋa ni aŋ hin fi saɓakŋa. Ni aŋ hin dik dla cora ha ki hu ziiŋu.

²⁴ Cuk lorra ha ki duk ndaŋgara, lor mayra Ofirra cukuɗ ha ki duk gogoyra huu lummara.

²⁵ Ma Saɓakŋa hinni a lor maŋga, a gursu maŋŋa ni nam lay.

²⁶ Li wa na ni aŋ hin fi jivi maŋga eg ma Saɓakŋa. Aŋ ndak a poŋ yaŋ ki kolo fok Lona may.

²⁷ Lini aŋ hin cenemu ni nam hin humuŋu. Aŋ hin warakŋi dlaaŋga aŋ vi vunuŋ kaɗ a laɗta doy hol.

²⁸ Lini aŋ saa wa a li dlaa ni dla ndaɗta ndak liya. Kiɗikka hin mbuɗ weleɗ fokoŋ hu voɗ maŋga.

²⁹ Lona bulum dlara vi suu ŋga tasina kiyo. Suu hoŋ yasi gana nam njunusi hu dlaasira may.

³⁰ Lona ndak a buɗ sa ma li dla cora ki lay. Nam ndak buɗum ki u bik kom ma teteɗna.