JOB 21 - Boy Lonana

Job Boy ma Job dam a kiɗisiyarana

¹ Job gijaŋ njaɗta di ana,

² Humugiya, humungi boy manna haa. Agi hin ɗilin irinni u namu.

³ Njunungiya, hinin an ɓak haa. Lini an ɓak ki wa ni agi hin panan tuwa.

⁴ Anu, an tii tii manna ni eg sa war su? Li a ndaɗta ni saa manda ka jokki ni kay mege?

⁵ Agi golongi ay gige. Saa magira hin jokki cocoo. Agi mbuɗ baa kogi ki funugiya.

⁶ An lay ni hu li ma an saa dlara ka lan wandara ni, tan lan ndaa cocoo. Tliwin mbuɗ dlakki egen na jik jik.

⁷ Lini na ni suu li dla cora ɦayna lak iiri ni kay mege? Asi mbuɗ maara u tlena kosi coco lay ni kay mege?

⁸ Asi laki u goryosi ni u heɓpa, gor ŋgologi masisina asi wasi ki lay.

⁹ Huu ziisi vo ni u heɓpa ka wi dlara ndaaɗi. Tokolora vi Lona ka ŋgenesiɗi lay.

¹⁰ Bolo mbutlugi masisina zuli cocoo. Do mbutl masi huruɗ ka ndi kiɗi lay.

¹¹ Kem gori masisina liŋ ko ndal yoorina na. Goryosi ka luu njoŋŋa tew tew.

¹² Asi ka luu u dadarira u diŋŋa lay. Del suu bu diffa ka oo usi kolo.

¹³ Asi daɓ buu masina ni u furira, kak ew ni asi hin cuk ga duk ndaŋgara.

¹⁴ Doli ɗini asi di Lona ana, «Ҥuɗ taŋ ha ki egemiya, a hum u gaɗ maŋgara ni ka irimi jiviɗi.

¹⁵ Ma Saɓakŋa min a ami li ni a mborɓii mamsina su? Va ma ay a fam u cenda aygi cenemba ni mege?»

¹⁶ Lay ni asi ka u furira tew tewɗi su? Lona ka caa yam kay saara vi suu co asinaɗi.

¹⁷ Na ni agi ka wi pindilla vi suu dlasi cona ki tewi tew tew su? Agi ka wi dlara yoora fasi su? Yaŋ Lonara ka ɓalakasi tlegeyesi ki ni wan su?

¹⁸ Dira di ki kasi ana, «Asi ni ko usu ma semeɗna siirim ki kolona na, ni ko ndal barra babaana tlaɗta na.»

¹⁹ Agi di ana, Lona tin cora vi somirara ni kay goryosiya. May Lona kaɓakŋa ni kay sa ma li corana u tamba ni kay a takam coomba kira.

²⁰ Sa ma cona hin wi ɓalak mamba ki ni u irimu. Nam hin jug yara vi ma Saɓakŋa ki u vun tamba.

²¹ Hu li ma buu mamma daɓ wa ni nam tuɗa. Va ndolom ka u goryom oloɗi.

²² Na ni sa hin a tak dla ndaɗta maŋ Lona ni taki tu olo su? Nammi sa ma hin a kaɓakŋa kay suu sunda huulona lay.

²³ Suu daŋŋa daɓ buu masina kay ndaŋgara ni u furira. Asi lakki ni u furira tew tew ka a yoo tasi kay dlaɗi lay.

²⁴ Asi ti ni ti ma jivina, bakasi ta zoŋga egesi jivi heɓpa na gak gak.

²⁵ Suu daŋŋa miɗ ni u yoora na miɗ, hu iiri masira halaŋŋi buu maa asi furi hu kaɗi.

²⁶ Halaŋ suu furina u suu ka furiɗina tuɗ ni ga duk ndaŋgara dew. Njufulna tasi ni nam bel.

²⁷ Ҥawaa, an wagi saa magira. An wi saa magira cora agi ka saaraɗ u senda.

²⁸ Kay agi di ana, «Zi ma vi sa ma ɦizi namma ni arage? Mbutluɓ ma suu kulna buu huna li ni nage?»

²⁹ Agi joɓogi suu tuɗ voɗna kaɗi su? Agi min a maa humugi ki kay boy ma asi dagina ki kanna su?

³⁰ Hu li ma dlara hahawra mba wa ni suu cona suɗ kiyo, yara vi Lonara hinisi ni ka ŋgenesiɗi.

³¹ Sa ma ka dam kay coombana ni gege? Sa ma warakam kay dlara nam laɗta ni gege?

³² Lini nam miɗ wa ni suuna tinim hu zulla ni um bolow cocoo. Asi buu ki kay ussum na paɗ u tiina.

³³ Suuna halaŋ tuɗ kay maɗam bolow cocoo. Asi gufuɗ fokom hu li ma suuna tlam a pamma. Suuna tuɗ pammi u heɓpa na.

³⁴ Ɗil magira ɗilin irin ndaɗta ka u voɗoɗɗi. Boy ma agi damma halaŋŋi kaboyna ɦawaa.