JOB 2 - Boy Lonana

Satanna tuk Job a mbara

¹ Buu maa dew ni suu sunda huulona mba cuɗ dlaasira ki fok Yawe. Sa ma gaŋawna mbay dukusi may, mba cuɗ dlaamba maŋ Yawe may.

² Yawe joɓ sa ma gaŋawna ana, «Aŋ col ay ni arage?» Nam hoŋ dira ana, «An col ay ni kay ndaŋgara a poyoɗ yaɗu.»

³ Yawe hin joɓom ana, «Aŋ wi saan ma sunda Job wa ɗaŋ su? Sa ma ko ndal nam na ka kay ndaŋgaraɗi. Nammi sa ma ɗili ma ɗegeena, ma li ndaa Lona. Nam ka taɓ tam hu dla coraɗi. Nam coli eŋ hu ɗegee mamba. Aŋ kalan ana an tukumu ni a gaɗta.»

⁴ Sa ma gaŋawna hoŋ dira maŋ Yawe ana, «Bakka u bakka kay tlesuu sana fasina halaŋ nam baasi ni kay a suɗ tliw tamba.

⁵ Aŋ tuk maɗ koŋ ŋgenem mbalatam u sokom tuwa, nam hin ŋguluŋŋi funuŋ gawɗi su?»

⁶ Yawe hin di Satanna ana, «Tuɗa, an hinim hu duk koŋ wa, may aŋ ŋgenem iiri mambaɗi kama.»

⁷ Satanna hin Yawe ha tani, mba vi Job u tuguɗii mayra cora eg bakamu, col ha kaŋga kay sem day ta ta faɗ ha ki kolo kay yamu.

⁸ Job kak kaŋga duk buɗna, yow kommi doyogina, vek tammi u asiya.

⁹ Caamba dam ana, «Aŋ so yaŋ hu ɗegee maŋ ndaɗta na gak gakŋi amege? Mariyaɗ ni ŋgul Lona ŋgulni aŋ miɗ wa ni mariyaɗɗi su?»

¹⁰ Job hoŋoɗ dira ana, «Ndak ɓakŋi ko suu puluɗina na. Ay vi jivira a ɦalla vi Lonara, ay ka ndak a vay cora a ɦalla vi Lonara mayɗi ni kay mege?» Hu dla ndaɗta halaŋŋi, dlara co ka kali fun Jobbi.

Banayaŋ Job suu hindina mbawa

¹¹ Banayaŋ Job suu hindina hum dlara li egemba haa. Asi gegelay ni col ay hu mbas mamba mbay egemu. Elifaz ma Temanna, Bildad ma Kuhana, Sofar ma Naamana may. Asi mbay a yooromba may, a ɗilim irimba may.

¹² Asi ay ki na day golom ay ni ka wam oloɗi. Asi tum tiina kolo eŋga cocoo. Gegelay ni haa baraw mamma kiyo. Asi cuk buɗna kasi may.

¹³ Asi lak ga egem duk ndaŋgara ta ta buuna kiɗisiya. Sa ka dam vaɗi lay, kay asi wammi nam mbuɗ ki irisi hahaw cocoo.