JOB 18 - Boy Lonana

Bildad Boy ma Bildad dam a mbarana

¹ Bildad ma Kuhana gijaŋ njaɗta di ana,

² Boy maŋ ma aŋ zulum coco namma hin daɓmi saɓage? Seŋ taŋu, hum boy ma ami daŋŋana haa.

³ Aŋ golomi ki ko ndal vabakgina na ni nanage? Aŋ golomi ki ni ko suu ka wi dlaɗina na su?

⁴ Huruŋ ma ɓalaki namma, aŋ mbaa ti tara egeŋŋi aŋu. Aŋ saa ana dlaaŋga hin a daɓ suuna ki kay ndaŋgara na halaŋ, jok u ɦinira ki hu li ma ndaɗ coli huna lay na su?

⁵ Ni na daŋ may kura ŋgali vi sa ma conara Lona hin teweɗ kiyo. Kiɗikka vo hu ziimba ka li oloɗi.

⁶ Nam ka wi kiɗik taa hu ziim oloɗi. Pindilla gaɓi kolo kamba hin tew kiyo.

⁷ Tuɗ mamba nam jew tuɗ u saɓakamba ka li oloɗi. Dlara nam saa gin a laɗta halaŋ viɗ ki irimu.

⁸ Sem tuɗummi hu bay ma ha guni fokomma na ɗow. Nam tin semmi hu daw ma ka guni gana.

⁹ Dawna hin vam diŋ diŋilimu, bay lawanda hin ŋguf kamu.

¹⁰ Zew ma vamma ka ŋgay ga duk ndaŋgara. Deŋessa ka juɓum hu voɗ mamba.

¹¹ Hu li ma nam huna halaŋ tuɗ ni u ndaana. Hu poy mamba halaŋ dlara ka dikim umu.

¹² Nam sa ma ay jew saɓak cocona, cemi ni mayra mbuɗ cam wa. Wihawra vi ziiɗ ni vo varamu.

¹³ Ndaɗ hin komom bakam kiyo. Tuguɗii mayra cora hin zam dogom ki halaŋ halaŋ.

¹⁴ Asi hin mba taɗam ay ki hu ziim ma jivina, a tuɗum ki maŋ mul maɗnara.

¹⁵ Huu ziim hin hin ki ni ɦawaa, suuna hin cuk ki huwa. Tlegeyem halaŋ hin ŋgalasi kiyo.

¹⁶ Sariyam ma ay gana so kiyo, humumba kolora yakki may.

¹⁷ Sem bulum ki hu mbassa ni a fafaɗta. Sa ka yam sem duk dla oloɗi.

¹⁸ Ay hu kiɗikka ni asi dikim ha ki duk ndufunda. Asi dikim ki hu mbassa nam cuki hura.

¹⁹ Njafam maa hin ka duk suu mamsina oloɗi. Sa ma vo varam ma hin ka iiri dew kaɗi.

²⁰ Dlaamba mbuɗ suu u fiɗiginana ki ndaa cocoo. Suu u maɗiinana li ndaana coco ana hin fasi duk may.

²¹ «Gola sa cona dlara hin li kammi ko ndaɗta na. Sa ma ŋgel vun Lona ɓak mamma hin ka ni na.»