JOB 16 - Boy Lonana

Job Boy ma Job dam a vadllana

¹ Job gijaŋ njaɗta di ana,

² An humugi njaɗ magira zeɗ zeɗ bolow cocoo. Agi ni suu ɗil ii suu ɓalak huuna ɦawaa.

³ Boy magi ma sii ki ko semeɗna na namma ka daɓbi su? Va ma dooroŋ kay hoŋ dirana ni mege?

⁴ Lini agi varak ki hu balamanu, an mbuɗ ki ni a agiya ni an hin ɓakŋi ko ndal agi njaɗ wanda na lay. An hin njaɗagi boy ma cona kagi lay, kisik yan ki irigi ni ko ndaɗta na lay.

⁵ An hin ɗiligi irigi ni u vunun ɦawaa, njaɗta kal ay ki funun jivira ni va ma an a heɓegi tagi u namma gaw.

⁶ Lini an ɓak lay tanda tan wanda ka hininɗi lay. Lini an seŋ tan lay, ndaɗ ka heɓenɗi lay.

⁷ Cemi ni Lona aŋ maŋan ki wa. Aŋ njayan suu man suu ŋguyunna ki wa halaŋ.

⁸ Cemi aŋ van wa tuguɗiira ka lasanu. Suu gori suu ŋgoron daganna mbuɗ yakan ana anni sa ma cona.

⁹ Lona hurum ɓeŋ ki egen cocoo. Nam ka hawan kiyo. Aŋ ka muɗ siiŋ egenu. Aŋ ŋgaras iriŋ kan ka golonu. An mbuɗ ki ndaana cocoo.

¹⁰ Suuna halaŋ ka pananu. Vunusi di kanni dlara ŋgulla sak sak. Asi ka tok tasi gak a halan dlanda.

¹¹ Lona hinin ki hu duk ko suu dlasi cona, nam zuɗun ha hu duk ko suu co suu ci maɗna asina.

¹² An ay kaki en, nam ɦayan irinu. Nam tin kom ay zagaɗan zuɗun ha kiyo. Nam colon ki ko ndal gu mbur mamba na.

¹³ Mbur mamba ŋguyun ki halaŋ. Nam kusun ta ta tew gilisinu. Hahaw ka irimbi. Nam voon mayawan ki kaŋgaa.

¹⁴ Nam mboɗ ay kanni ko sa ma duuna na. Nam dakanu, ɦan mbilina egen cocoo.

¹⁵ Baraw ma li hahawra ka fok ki egenɗi. Tew tew ni vogon ka ni pii ga duk buɗna.

¹⁶ Irin co ki coco ko tiina. Va ma an ka wam kay tlimiɗ irinna ni ŋgus miɗna.

¹⁷ Doli ɗini an li va ma co kaɗi. Cen manda an cenda ay tew tew ni teteɗ.

¹⁸ Ndaŋgara ka tos ki kay busuɗun ma cuɗ ki ganaɗi, ko tii manna joo ha fokŋi jori na ɗow ɗow.

¹⁹ Cecemi wanda saan ma diki kanna ni huulona. Liin ma ŋgay tanna ha ka koloo.

²⁰ Banayanna ka pananu. May simi manna an ɓaɗammi eg Lona na ɗow.

²¹ Nammi sa ma njun kay sana fok Lona. Ko ndal sa warna njun kay ndarammara na.

²² Na may basaɗan ta kay ndaŋgarara ki ni ndumiya. An cemi gi tanni hu voɗta ka hoŋ ay dagan oloɗira.