JOB 13 - Boy Lonana

Job min njaɗ tam u Lona

¹ Na daŋ may halaŋ ca ni irin wi wa, humun hum wa lay.

² Tlesuu agi wasina an wasi lay, an ka ki daganagiɗi ni ko agi na may.

³ An may ni min ɓakŋi u ma Saɓakŋa na ɗow, an min doo tanni ko Lona na ɗow.

⁴ Lini agiya ni vunugi hoɓira ni u kaboyna ɦawaa, agi ni suu garaɗ suuna u kaboyna ɦawaa.

⁵ Lini agi lakŋi na en bay di vaa ni, ndaɗta agi mbuɗ ni suu yalna ɗow.

⁶ Humungi boy man ma an damma, haa, humugi dlaanda doo kay tanda ha ki jiviya.

⁷ Agi kaboyna ni a njunni kay Lonara su? Agi mbuɗ tagi suu ganyamba ni kay Lona su?

⁸ Agi min a tak tagi ni a agi suu u Lonanara su? Agi gol tagi ni a agi suu ki jivi ii Lonana su?

⁹ Lini nam a gologi u dlaagira ni hin li kagi gasi jivi may su? Sa ka ndak a ganyam Lona ko ganyam sa warnara naɗi.

¹⁰ Lini agi ŋgay tagi ni a suu duu u Lonana lay ni, nam hin kaagi ɓakŋa kagi lay.

¹¹ Nam ŋgol mamba ka lagi tagi ndaaɗi su? Ndaaram ka mba kagi na ndeɗi su?

¹² Boy magi ma agi zulum wanna ni ko gugumma ɦawa na. Njaɗta agi njaɗaɗ wanda ni ko ndal gulumun luɓuna ɦawa na.

¹³ Seŋegi vunugi haa, an min ɓakŋi anu. Dlara fanda halaŋ gol irinni boy goo ɦawaa.

¹⁴ An ka ki ni na tok a li tlena bel, lini an a ba iiri manda ki lay.

¹⁵ Lini Lona can lay ni boy kaɗi, an ka ndak a ba kiɗi. Fokom lay ni an ndak a di ki kay poy manda.

¹⁶ Lini an tew wa ni suɗ manda, kay an wi ana sa ma dlam cona ka ndak a tew fok Lonaɗi.

¹⁷ Humugi dlara an daɗta ha ki jiviya, mal humugi ha ki humugi dlara an vagira uɗ ha wandara ki jiviya.

¹⁸ Cemi ni an ka min tan a tuɗ fun ɓakŋa. An wi ki kan ana an li va ma co kaɗi.

¹⁹ Sa ma ndak a ci wayra kay ɗegee manda ni gege? An tan ki mini a seŋ tanda. An hin a juɓmi miɗ manna.

²⁰ Loonna an min joɓoŋŋi kay tlena na mba'. Ni tlesuu an hin tak tan fokoŋ u asina.

²¹ Fok jewra ni aŋ tli koŋ ma nek cocona ki kanu, hin ndaaraŋ ma cocona a lan oloɗi.

²² Ŋgoo dagan aŋ yanu. An huma. Ɗowba lini an ka njaɗa ni aŋ hoŋon dira ay may.

²³ Ci maɗna u dla cora an laɗta ni gage? Ŋgel manda u cora an laɗta ndumun sina ay kiyo.

²⁴ Aŋ ŋgay taŋ ki irinni kay mege? Mbuɗun ki a sa ma babali maŋŋa ni kay mege?

²⁵ Aŋ min a dikŋi hum gu ma sii kolona ɦawa su? Hum bubura sooyra aŋ a dikiɗ ni uɗ su?

²⁶ Aŋ ndumun dlara eŋga kan cocoo. Cora an laɗ ay u goo tanda halaŋ aŋ ndumunda kanu.

²⁷ Aŋ njunun ga ka hinin a poy oloɗi. Dlara an laɗta aŋ iriŋ ka cuki kaɗ halaŋ ta ta aŋ ndumun balam sen ma tin kaŋgana ki lay.

²⁸ Iiri manda daɓ ki ni ko ndal gu ma ki foɗina ɦawa na. Ni ko ndal baraw ma tlena tam kina na.