JOB 12 - Boy Lonana

Boy ma Job dam a fiɗina

¹ Job gijaŋ njaɗta di ana,

² Agi ni suu warna ɦawaa. Buu maa agi miɗna yalna miɗ ha ki u agi may.

³ An wi dlara ni ko agi na lay. An ka ki giniŋ suugiɗi lay. Dlara agi laɗta suuna waɗ ni bel.

⁴ An mbuɗ ki ni sa ma ndarayamma san umma. An yi Lona ha kolo nam hoŋon dira aya. Sa ma ɗegeena mbuɗ ki sa ma suuna panam san umma.

⁵ Sa ma wi hawra ni ma suuna panamma. Suu laki dla ka lasiɗina halaŋ saa masira ni na. Ni gaɗta ki eŋ kay suu sesi daɓma.

⁶ Suu las ndarayasina laki hu ziisi ni u heɓpa. Suu ŋgel gaɗta vi Lonara laki ni u heɓpa. Gegelay ma mbuɗ tam ko Lona u saɓakamma ni ko ndaɗta na.

⁷ Na may aŋ joɓ tle bagina ugi layagina asi ndak a haɗaŋ va lay.

⁸ Saa dla ndaŋgara gige. Ndaɗ haɗaŋ va lay. Kuluf ma ga duk mbo lum ŋgolnana ndak a cuɗuŋ dlara lay.

⁹ Sa ma kaki vo hu ziim ma ka wi dlara Lona laɗ ndaɗtaɗina ni gege?

¹⁰ Nammi sa ma iirira vi suuna ka ni u saɓakam halaŋŋa. Musuk suu warnara halaŋŋi hu duk komu.

¹¹ Vun ŋgolna di ana, Sunda humba laɗta ni a hum boy ma sana ka damma, ko ndal ŋgotlna ka jug tlesuu tira na may.

¹² Suu maarina ni suu ɓorow ii dlara kina, yal dlara ki taki ni ii suu basaɗasi ki ŋgol kay ndaŋgarana.

¹³ Doli ɗi ni wira u saɓakŋa halaŋŋi vi Lona. Gaɗta u neras ni mamsina.

¹⁴ Va ma Lona toom kina ka hoŋ min kolo oloɗi. Sa ma nam ɓalam gana ka ndak a buɗ ki kolo oloɗi.

¹⁵ Lini nam vi mbona ha ki wa ni kerna ndi kay ndaŋgara wa, lini nam gi mbona ay wa ni, mbona tli ndaŋgara ki halaŋ.

¹⁶ Saɓakŋa u yalna ni mamsina. Sa ma viɗ kina u ma viɗim kina halaŋŋi vi Lona.

¹⁷ Suu ŋgolo suu malayaŋ ndaŋgara nam hinisi tuɗ u sesi ɦawa bay tuɓuruwa. Suu ŋgolo suu fok suunana nam ɓalakasi yasi kiyo.

¹⁸ Nam buɗ gandi ma njuni huu mulinana kiyo, hin njunusi zewna hurusiya.

¹⁹ Nam tuɗ muli suu li ɓivunna ki siili bay tuɓuru sesiya. Nam bulum gaɗta suu saɓakŋa njunuɗta kiyo.

²⁰ Suu wi njaɗta cocona nam viɗisi boyna ki irisiya. Suu maari suu wi dlara nam viɗisi u dlara ki irisi lay.

²¹ Nam tin gonokka kay suu ɦizina, suu ci maɗna u saɓakŋa sa ma njun kasi ka oloɗi.

²² Zulla ŋgolla huruɗ ndufun cocora nam li kiɗikka ki huwa. Suu miɗi suu ay duk ndufundana nam cukusi ay ki kiɗiki.

²³ Nam zul njaf suuna hin casi ki lay. Nam hin njaf suuna oy ki kay ndaŋgara, hin suusi ki su olo.

²⁴ Nam ɓalak yam suu ŋgolona kiyo. Nam hinisi viɗ ki ŋgoo bagi duk gura.

²⁵ Suu asina lam voɗta ni duk ndufunda. Lona viɗisi ki ko ndal suu guruɗi u summana na.