JOB 11 - Boy Lonana

Sofar Boy ma Sofar dam jewna

¹ Sofar ma Naamana gijaŋ njaɗta di ana,

² Boy ma aŋ zulum bolow coco namma hoŋ di ka kambi su? Boy ma aŋ dam wanna ni ndak a mbuɗuŋ gasi ɗegee gaw su?

³ Boy ma aŋ ɓakam coco wanna ndak a seŋ vun suuna gaw su? Aŋ panni suuna min a sa takaŋ cooŋga kiɗi su?

⁴ Aŋ di ki u vunuŋ ana, Boy manna ni gasi, va co ka huɗi, an li suluk ka eg Lonaɗi.

⁵ Ҥaa ɦaa, Lona u tamba ka ɓakaŋu. Nam mal vunum ki ka hoŋoŋ dira.

⁶ Lona tak yal ma ŋgayna ki halaŋ. Dlara mbuɗ mbuɗta sa ka waɗ uɗira lay. Kay ndaɗta aŋ saa dlara laŋ wandara ki jiviya. Aŋ wi ki ana Lona hiniŋ dla cooŋ taa ki ga ɦiw ndumuɗ kaɗi.

⁷ Aŋ ndak a wi zul zul dlara vi Lonara ki bel su? Aŋ ndak a wi daŋ mayra vi ma Saɓakŋa Kom Belna su?

⁸ Dlaamba kolo kaŋŋi ko ndal huulona na. Zul coco su lina vi suu miɗina. Aŋ ndak a humum u dlaamba ki ni nanage?

⁹ Dlaamba fiyek su ndaŋgara, bu buuɗ ŋgol su mbo lum ma ŋgolna lay.

¹⁰ Lini nam vi sana daŋgayna, ka ɓakŋa lay, sa ma ndak dooromma ni gege?

¹¹ Kay nam wi suu kaboyna halaŋ. Nam ɓorow ii dla cora ki ni ka u saara vi saɗi.

¹² Sa ma ka wi dlaɗina ka mbuɗ neeyɗi. Sa warna vuɗ ni ko ndal korra ŋgoo bagira ɦawa na.

¹³ Aŋ may ni pereɗ iriŋŋi eg Lona na ɗow, aŋ cenemu baa koŋ ha kolo ni mam na ɗow.

¹⁴ Lini koŋ zoɗ ki wa u dla cora ni aŋ mbusum kiyo. Hin dlara gunira a li vo taraŋ varaŋ oloɗi.

¹⁵ Ni aŋ hin mbuɗ ki teteɗ tuɗ ni yaŋ ki tlii koloo, va ma laŋ taŋ ndaa ka oloɗi, aŋ hoŋ coli ni hu balamaŋ ma jewna.

¹⁶ Li wa na ni humuŋ hin maa ki kay las maŋga, aŋ hin goloɗ ni ko ndal mbona jak ɓaɗnara ɦawa na.

¹⁷ Iiri maŋga mbuɗ weleɗ ni su faɗta faalira, ndufunda hin mbuɗ ki ni maɗiira.

¹⁸ Iriŋ hin ɗila, aŋ hin mbuɗ saa saara jivira, aŋ hin wi dlara halaŋ tuɗ jiviya, hin buu senna ni u heɓpa lay.

¹⁹ Hu li ma aŋ koɗ taŋŋa ni va ma laŋ ndaa ka oloɗi. Suuna hin mbuɗ mba maaraŋŋi maari na ɗow.

²⁰ Na may suu dlasi cona irisi hin coora. Asi ka fi li ma ŋgay tasi hunaɗi. Va ma asi hin a saaramma ni miɗna doy hol.