JOB 10 - Boy Lonana

Job ana Lona lam na herekŋi kay mege?

¹ Hurun ka min kak ma an kak iirina oloɗi. An hin cenda an cen kay dlaandara. An ɓakŋi u hurun ma yoora cocona.

² An hin di Lona ana kaan ɓakŋa kaɗi, takan dlara aŋ ka lan kaɗ wandara.

³ Na ni iriŋ jivi kay a lasan nara su? Noy va ma aŋ lam u bik koŋŋa ki su? Hin li kiɗik maŋga ni kay boy ma vi suu dlasi cona na ɗow su?

⁴ Iriŋ wi ki ni day sura vi suu warnaraɗi su? Dlara aŋ a laɗta ka kora vi suu warnara naɗi.

⁵ Buuruŋŋi ko ma vi suu warnana na su? Basaɗaŋ ka kora vi suu warnara naɗi lay.

⁶ Aŋ hal a wan coonda ni kay mege? Aŋ loɓ taŋ a halan u suluk manna ni amege?

⁷ Aŋ lay wi ki ana an li dla co kaɗi. Sa ma ndak a ɓaɗan ki hu duɓuk koŋ kaɗi lay.

⁸ Koŋ lanni namu, mininni namu u mbalatan halaŋ lay. Cecemi aŋ mbuɗ huruŋ a baan kiyo.

⁹ Humuŋ gaŋu, aŋ mininni u luɓuna, aŋ kalan ay ki ni duk gugum ndaŋgara ɦawaa.

¹⁰ Aŋ emen ay ki ko mbiira na, hin dlayan ki ko mbiira dlayra na may.

¹¹ Aŋ baaran u bakka u tliwna may, sokon u sariyan halaŋ aŋ cilin sina ni aŋu.

¹² Aŋ ɦan iirira u saɓakŋa hurunu. Aŋ ka golon iiri manda u jivi maŋga.

¹³ Na may dlara ŋgayra kaa aŋ ka min a danda kiɗi. An wi dlara ka ŋgay ga huruŋ ndaɗta.

¹⁴ Lini an li co wa ni aŋ gaɗanu. Maaran coon taa ki kaŋgaɗi.

¹⁵ Ɓakŋa van wa ni kay coonda daŋ may. Lini an ɗegeere ni an ka a ŋga tanɗi lay. Hurun ki oy u zolona. An ki ni guruɗi ko las manda.

¹⁶ Lini an tli yan koloo ni gola aŋ ka digin ko ndal dlona na. Tew tew ni aŋ ka takan saɓak maŋŋa.

¹⁷ Aŋ ɦuɗ duu maŋŋa fok egenni ɦuɗi na ɗow ɗow. Huruŋ ɓeŋ egenni ɓeŋi na ɗow. Kawi maŋŋa ka weleɗ ay kolo egenu.

¹⁸ Aŋ kalan ay ki huu sun na salni kay mege? Hinin an miɗ ki bay ii sa wan ki tuɗi amege?

¹⁹ An hin ki ginni ko va ma kaɗina na, ay huu sun na ni, asi jakanni hu zulla gaw.

²⁰ Buu manna fiyek coco su? Ko nam daɓ hinin an luura.

²¹ A an tuɗ hu li ma ka hoŋ ay oloɗina, hu mbassa ndufunda u ŋgus miɗna.

²² Hu mbassa maɗiira u ndufunda ki fun tasi wara dewra. Li ma ŋgus maɗna ki kuluɓi kay dlara dam dambara. Kiɗikka mbuɗ ki ni ndufunda war cocora.