JOB 1 - Boy Lonana

Boy ma fok jewna Satanna tuk Job

¹ Sana dew ka hu mbassa Ussa. Sem ana Job. Nammi sa ma ɗilina, ɗegee lay. Nam li ndaa Lona, ka taɓ tam hu dlara coraɗi.

² Gor njufiina kom kiɗisiya, gorɓiina hindi may.

³ Timigii mamsina buɓ buɓ kiɗisiya, jamballa buɓ buɓ hindi. Mbutli mam suu zumma fun tasi na, cuɓ cuɓpa na kis kis vadl. Korra kis kis vadl. Suu li sunda vo varamma bolow cocoo. Sa namma ni ŋgol su suu u maɗiinana halaŋ halaŋ.

⁴ Goryom suu njufiina li luuna vi tasi hu buuna tew tew. Asi gi ŋguyra tuɗ vi tasira ni giya. Gorsesi suu tamagina asi yasi ay ti ni u asi may, ci may ko tasi dew.

⁵ Hu li ma luuna daɓ ki wa ni, Job yasi ay halaŋ mba li ɓivunna ki kasiya. Nam col kolo maɗii fedet li ɓivun ma ŋgalam ki ŋgalina ki kasi dew dew halaŋ kay nam ɓak tam ana, «Kala goryon li dla cora ŋgul Lona hurusi kurufu wa kala ni, an wiɗi.» Job ka li ɓivun ma namma na tew tew.

⁶ Buu maa dew ni, suu sunda huulona tuɗ a cuɗ dlaasira ki fok Yawe. Satanna sa ma gaŋawna tuɗ ha dukusi may.

⁷ Yawe joɓ Satanna ana, «Aŋ col ay ni arage?» Nam hoŋom dira ana, «An ay ni kay ndaŋgara a poyoɗ yaɗu.»

⁸ Yawe joɓom ana, «Aŋ wan saan ma sunda Joɓ ay su? Sa ma ko nam na ka kay ndaŋgaraɗi. Nammi sa ma ɗili ma ɗegeena. Nam li ndaa Lona ɦay, ka taɓ tam hu dla coraɗi.»

⁹ Sa ma gaŋawna hoŋ dira maŋ Yawe ana, «Job li ndaa Lona gasi na ni ɦawa su?

¹⁰ Aŋ ka njun kam juɓum um u suu mamsina halaŋ u bege mamba bel aŋ paɗ vunuŋ ki kammi ka aŋgi su? Aŋ paɗ vunuŋ ki kay dlara nam laɗta halaŋ. Yoori mamsina zuli hu mbassa tani ni asi halaŋ halaŋ.

¹¹ Aŋ tuk maɗ koŋ baam tlegeyem suu kom asina ki na halaŋ, nam hin ŋguluŋŋi funuŋ gawɗi su?»

¹² Yawe di sa ma gaŋawna ana, «Aŋ tuɗa, tlegeyem halaŋ an hiniŋsina ki hu duk koŋ wa, may ni aŋ ka ŋgenem iiri mambaɗi kama.» Sa ma gaŋawna ɦuɗ tam ay ki, hin Yawe gaw.

¹³ Hu buu maa dew ni goryoŋ Jobma u gorsesi suu tamagina tok vi wayasi ma ŋgolna, ti may, ci may.

¹⁴ Vun sunda mba fi Job dam ana, «Mbutlugina hu li ma zumma may korra taa egesi may.

¹⁵ Suu Sabeenna mba ndugusi, yow mbutlina u korra may, ci suu sunda ki may, an suɗ ay ki ni an na dew a mba jokoŋ boy nammara.»

¹⁶ Vunum bay ndi ga tu may ni, sa ma hiniŋŋa cowni dam ana, «Kura vi Lonara col ay kolo huulona ŋgal timigiina u suu taarasina ki halaŋ. An suɗ ay ki ni an na dew a mba jokoŋ boy nammara.»

¹⁷ Vunum bay ndi ga tu may ni, sa ma daŋŋa cowni dam ana, «Suu Kaldena ka irisi ay u tasi na cuɓ cuɓ hindi mba ndug jamballa yowoɗ wa, ci suu maŋ suu sunda ki halaŋ halaŋ. An suɗ ay ki ni an na dew a mba jokoŋ boy nammara.»

¹⁸ Vunum bay ndi ga tu may ni sa ma daŋŋa cowni dam ana, «Goryoŋ suu njufiina u gorɓiina laki ti may, ci may, vo vi wayasi ma ŋgolna.

¹⁹ Babaa ma ŋgolna col ay ŋgoo bagi hu fulla na, mba geŋeɗ zira asi laki huruɗta. Ndaɗ bow kasi na halaŋ casi ki wa. An suɗ ay ki ni an na dew a mba jokoŋ boy nammara.»

²⁰ Job col kolo haa baraw mamma kiyo, kaa yam ki may. Nam gi tam kaŋga duk ndaŋgara, goɓ Lona

²¹ di ana, «An kal ay ki huu sunni siiliya, an hin hoŋŋi siili may. Yawe ɦanu, Yawe hin tli wa may. Ko sem Yawe fi ŋgara.»

²² Hu dla ndaɗta halaŋ lay ni, Job li suluk kaɗi. Nam ka tii u Lonaɗi lay.