Boy Ma Ayra Ma JAŊ Ɓiirimma 8 - Boy LonanaCara li zoŋga 1 Yesu tuɗ kay ɦinira conora. 2 Ca vin maɗiira ni, nam hoŋ hu Ziŋ Lonara suuna halaŋ tok tasi egemu. Nam kak kaŋga gijaŋ haɗasiya. 3 Suu wi magaara gaɗta u suu Farisenna fi cara ay a li zoŋga, mbaaraɗ fokomu. Asi coloɗ ki fok suuna halaŋ hin 4 di maŋ Yesu ana, «Mala Haɗta, cara wanni, ami faɗ ay hu li ma ndaɗ a li zoŋga. 5 Moiz ɦami gaɗta ana boyogi suu li ko ca ndaɗta na na, casi ki u gogoyra. Aŋ may ni di ana mege?» 6 Asi di na ni a duum delem ana vunum paɗ va ma co kalage. Yesu cok yam kaŋga, ɓii u cifit kom kay ndaŋgara. 7 Asi yasi gak joɓom ha may ni, Yesu col yam kolo dasi ana, «Sa ma dukugi ma li co ka dewɗi na, gikiɗ u gogoyra jew ni namu.» 8 Nam cok yam kaŋga olo, ɓii cifit kom kay ndaŋgara. 9 Asi hum boy namma na ni, gijaŋ siira dew dew gaw. Suu gijaŋ siira jewna ni suu maana. Cara hin colira eg Yesu ni ndaɗ dew. 10 Yesu col yam kolo daɗ ana, «Cara, suu vak ayna arage? Sa kaak ɓak makŋa kaɗi su?» 11 Ndaɗ hoŋom dira ana, «Malla Haɗta, sa kaɗi.» Yesu daɗ ana, «An may ni ka kaak ɓak makŋaɗi lay. Ndak tuɗa, li co oloɗi.»] Yesu ni kiɗikka fok suuna 12 Yesu di boyna maŋ suuna olo ana, «An ni kiɗikka fok suuna. Sa ma tuɗ kay cerenna ka tuɗ duk ndufundaɗi, nam ka u kiɗikka iirira.» 13 Suu Farisen dam ana, «Aŋ di kay taŋ aŋŋa tokŋi, dlaaŋga ka gasiɗi.» 14 Yesu hoŋosi dira ana, «Lini an di kay tan ni an tok lay ni, diinda ni u voɗoɗu, kayme an wi lii an col ay huna, an wi lii an hin tuɗ huna lay. Agi may ni ka wi li ma an col ay huna u li ma an tuɗ hunaɗi lay. 15 Agi kaɓakŋa ni u mbeleŋŋa vi suuna, an ka kaɓak kay saɗi. 16 Lini an kaɓakŋa lay ni, ɓak manna u voɗomu kay an ka kay tanɗi. Bun ma sunun ayna ka u anu. 17 Ki ɓiiri hu gaɗ magira ana, Lini dlara suuna kaɗ mba' ni, dla ndaɗta ni u voɗoɗu. 18 An di ki kay tan lay, Bun ma sunun ayna di ki kan lay.» 19 Asi joɓom ana, «Buŋŋi arage?» Nam dasi ana, «Agi ka wan anɗi lay, ka wi Bunɗi lay. Lini agi wanu ni, agi hin wi Bun may.» 20 Yesu ɓak boy namma na ni hu li ma nam ka haɗ hu Ziŋ Lonara ni hu li ma asi tok tlesuu ɦasi maŋ Lona huna. Sa ndak a vam kaɗi kayme buu mamma bay ndak tuwa. Li ma an tuɗ huna, agi ndak ka a tuɗ huɗi 21 Yesu hoŋosi dira ana, «An hin tuɗa, agi hin halanu, na may agi hin miɗ ni hu coogira. Li ma an tuɗ huna, agi ndak ka a tuɗ huɗi.» 22 Suu Juifna di ana, «Nam di ana lii nam tuɗ huna ay ndak ka a tuɗ huɗi ni, nam a ci tam ki su?» 23 Yesu hoŋosi dira ana, «Agi col ay ni hu duliyara tani, an col ay ni kolo huulona may. Agi ni duk suu kaŋga hu duliyarana, an ka dukusi koɗi. 24 Kay ndaɗta an dagi ana, agi hin miɗ ni hu coogira. Lini agi tin hurugi ka ana, An kaa, naɗi ni, agi hin miɗ ni hu coogira daŋ may.» 25 Asi joɓom ana, «Aŋŋi gege?» Yesu hoŋosi dira ana, «Ni ko ndal an dagi ay fok jewra na. 26 Tlen ka kon ŋgol coco a di kay dlaagira. Sa ma sunun ayna di ni gasira, an di suuna ni dlara nam haɗanda ayra.» 27 Asi ka hum ana nam ɓakasi ni kay Bumuraɗi. 28 Yesu dasi ana, «Hu li ma agi tli Goŋ Sanna kolo wa ni, agi hin wi ana an kaa. Agi hin wi ana an ndak a li va kay tanɗi. An di ni tlesuu Bun haɗansina doy hol. 29 Sa ma sunun ayna ka u anu, nam hinin ka kay tanɗi. Tew tew ni, an li ni dlara irim jivira.» 30 Hu li ma Yesu ɓak na ni, suuna vi um cocoo. Suu vuɗina u gorgomina 31 Yesu di suu Juif suu tin hurusi kamma ana, «Lini agi tin hurugi kay haɗ manda ni, agi hin mbuɗ a suu haɗi mansina. 32 Agi hin wi gasira, gasi ndaɗta hin mbuɗugi ki suu vuɗina.» 33 Asi hoŋom dira ana, «Ami ni goryoŋ Abrahamma, ami ay ka jew gorgomi vi saɗi. Aŋ hin ana ami mbuɗ ki suu vuɗina ni nanage?» 34 Yesu hoŋosi dira ana, «An dagi ni gasira ana, Sa li cora, nammi googomma vi cora. 35 Googomma ka kak hu zina a fafatɗaɗi, goo vuɗna hin kak hu zina a fafatɗa, ni namu. 36 Goona buɗugi ki wa ni, agi hin ki gasi suu vuɗina. 37 An wi ana agi ni goryoŋ Abrahamma, agi hal a can ki ni kayra agi ka min hum u haɗ mandaɗira. 38 An ɓakagi ni dlara Bun takandara. Agi li ni dlara Bugi dagira may.» 39 Asi hoŋom dira ana, «Bumi ni Abraham.» Yesu dasi ana, «Agi li gasi ni goryoŋ Abrahamma ni, agi hin lini dlara nam laɗta may. 40 Cecemi an dagi dlara gasira an haɗaɗ ay ko Lonara ni, agi halan a can ki may. Dla ndaɗta ni Abraham laɗ kaɗi. 41 Agi li ni dlara bugi laɗta.» Asi hoŋom dira ana, «Ami ka gor suu mboymoɗi. Bumi ni Lona dew.» 42 Yesu dasi ana, «Lona lini Bugi gasagi ni, agi hin mininu, kay an col ay ni eg Lona, mba ni kay dlaamba. An mba ka kay tanɗi nam sunun ay ni namu. 43 Agi ka hum dlara an dagiraɗi ni kay mege? Kay agi ka ndaki a humun boy mannaɗi. 44 Bugi ni Satanna. Agi min li ni dlara bugi laɗta may. Nam ay ni sa ci maɗna hu ura tin ayra day. Nam ka li gasiraɗi kayme gasagira ka hurumbi. Nam di ni dlara kaboyna, ni dlaamba daŋ may, nam kaboyna kay nammi malaŋ kaboyna. 45 Agi ka min tin hurugi kanɗi ni kay an di ni gasira. 46 Sa dukugi ndak a di ana an li cora ni gege? An li di ni dlara gasira ni, agi ka tin hurugi kanɗi ni kay mege? 47 Sa vi Lonna nam hummi boy ma vi Lonna, agi ka suu vi Lonnaɗi ni agi ndak humum boy mammaɗi.» Yesu u Abraham 48 Suu Juifna hoŋom dira ana, «Ami di ana aŋŋi sa Samarina, fulina ka kaŋu, ni gasiɗi su?» 49 Yesu dasi ana, «Fulina ka kanɗi. An ŋga Bun may, agi hoŋon ki dagan may. 50 An ka hal ŋgol kay tanɗi, sa ɦan ŋgol ndaɗta na ni dew, nam hin kaɓakŋa lay. 51 An dagi ni gasira, sa humun boy manna na hin ka miɗɗi.» 52 Suu Juifna dam ana, «Cecemmi ami wi ki gasi ana aŋ fulina ka kaŋu. Bumi Abraham miɗa, suu jok vun Lona miɗ lay. Aŋ di ana sa humuŋ vunuŋŋa ka miɗɗi ni nanage? 53 Aŋ saa ana aŋŋi su Bumi Abraham ma miɗina su? Suu jok vun Lona miɗ lay. Aŋ saa ana aŋŋi gege?» 54 Yesu hoŋosi dira ana, «An li hal ŋgol manda ni kay tanu ni ŋgol ndaɗta ki ni ɦawaa. Sa ma ɦan ŋgol ndaɗta ni Bun ma agi di ana nammi Looginana. 55 Na may, agi ka wambi, anu, an wamu. An di wa ana an ka wambi ni, an mbuɗ ni sa kaboyna ko agi na may. An wamu, an hum u boy mamma lay. 56 Bugi Abraham furi hu saa mamba a wi buu ma an mba huna. Nam wanu, furi cocoo lay.» 57 Suu Juifna dam ana, «Aŋ basa ka dok vadl tuɗi may ni, aŋ di ana aŋ wi Abrahammi nanage?» 58 Yesu hoŋosi dira ana, «An dagi ni gasira, jew Abraham bay vuɗ tu ni, An kaa.» 59 Asi yow gogoyra a gikimba. Yesu ŋgay tam kal ay ki hu Ziŋ Lonara. |
Bible Moussey © Bible Society of Chad, 2002.
Bible Society of Chad