Boy Ma Ayra Ma JAŊ Ɓiirimma 7 - Boy Lonana

Gorseŋ Yesuna tin hurusi ka kambi

¹ Ŋgoo daganda Yesu poy hu mbassa Galilera, nam min ka a tuɗ hu mbassa Yuderaɗi, kayme asi hal a cam kiyo.

² Luu ma mbutluɓma vi suu Juifna ndak ndakŋi,

³ gorseŋ Yesuna dam ana, «Hin zi ma Galilena tani, tuɗ Yude, a suu haɗi maŋsina wi dlara aŋ faɗaɗ vunuɗ ki wanda may.

⁴ San li tak tam kiyo ni, ka ŋgay dlara nam laɗtaɗi. Aŋ li dlara ko aŋ laɗ wanda na, laɗ a suuna waŋ kiyo.»

⁵ Gorsemma u tasira lay ni ka tin hurusi kambi.

⁶ Yesu dasi ana, «Li manna bay ndak tuwa, liigina ka ni jivi tew tew.

⁷ Suuna halaŋ hurusi ka egegi coɗi. Anu, asi hurusi egen coo kayme an di ana dlara asi laɗta ni coo.

⁸ Agi tuɗugi luu magina, an ka tuɗɗi kay buu manna bay ndak tuwa.»

⁹ Yesu dasi boy namma di ni hin kak hu Galile.

Yesu tuɗ hu luu ma mbutluɓma vi suu Juifna

¹⁰ Gorseŋ Yesuna tuɗ hu luu ma mbutluɓma tuɗ ni, Yesu hin tuɗ ha hu may. Nam ŋgay tam a sa wambi.

¹¹ Suu Juifna halam hu li luuna di ana, «Nammi arage?»

¹² Asi ɓak kam cocoo duk suuna, ka ɓak delesi eŋgi, suu ɦiw di ana, «Nammi sa ɗegeena.» Suu hiŋŋa ana, «Ҥawaa nammi sa ganyam suuna.»

¹³ Asi li ndaana ko suu Juifna, ka ɓak ki kam eŋgi.

¹⁴ Luuna ŋgolom jaki jakŋi, Yesu gijaŋ haɗ suuna hu Ziŋ Lonara.

¹⁵ Suu Juifna mbuɗ lakira na jim di ana, «Sa namma haɗ ka jewɗi may, wi tlen na ni nanage?»

¹⁶ Yesu hoŋosi dira ana, «Haɗta an haɗara ni ka haɗ mandaɗi, col ay ni vi Lon ma sunun ayna.

¹⁷ Sa min a li minda vi Lona hin wi ana haɗ manda col ay ni vi Lona, ɗowba an ɓakŋi u saɓak manna kay tanu.

¹⁸ Sa ɓak kay tam u saɓak mamma na, hal ni geleɗ mamba kay tamu. Sa li sunda a suuna geleɗ sa sunum ayna di ni gasira. Va kaboy ka huɗi.

¹⁹ Moiz ɦagi gaɗta ni ka nambi su? Sa dukugi ma vi u gaɗ ndaɗta kaɗi, agi halan a can ki ni kay mege?»

²⁰ Suuna hoŋom dira ana, «Aŋ wanni, fulina kaŋu, sa hal a caŋ kina ni gege?»

²¹ Yesu hoŋosi dira ana, «An li dlara na dew ni, agi mbuɗ lakira na jimmi nanage?

²² Kay ndaɗta Moiz ɦagi voɗta ana caw ɗiwigiya (ka Moizɗi lay, somoyogi suu jewna ɦal dla ndaɗta ay ni asiya). Agi caw ɗiwra hu buu ma vi Lonna lay.

²³ Lini agi caw ɗiwra hu buu ma vi Lonna ana agi ka li cora eg gaɗta vi Moizɗi ni, agi hin ɓeŋ hurugi ki egen ana an garaɗ sana ki hu buu ma vi Lona ni nanage?

²⁴ Kaagi ɓakŋa kay dlara ki bunsu eg tliw tara ɦawaraɗi. Lagi ɗegee hu kaɓak magina.»

Yesu ni Sa Lona Fuurumma su?

²⁵ Suu hu Yerusalem suu ɦiw di ana, «Ni ka sa asi halam a cam kinaɗi su?

²⁶ Gologiya, nam ɓak ay duk suuna lay ni, asi ka dam vaɗi. Muli maygisina hin wam ana ni Sa Lona Fuurumma ɗowba ni nanage?

²⁷ Sa Lona Fuurumma hin mba ni, sa ka wi ana nam col ay ni naraɗi. Sa namma ay wi li ma nam col ay huna.»

²⁸ Yesu haɗ suuna hu Ziŋ Lonara, sawalla kolo ana, «Agi wan su? Agi wi li ma an col ay huna su? Hu li namma an col ay ka kay tanɗi, sa ma sunun ayna, ni gasi, agi ka wambi.

²⁹ Anu, an wamu kayme an col ay ni egemu, nam ni sa sunun ayna.»

³⁰ Asi hal a vam may, sa ndak a tin kom egem kaɗi, kayme buu mamma bay ndak tuwa.

³¹ Duk suu molina, suuna bolow cocoo tin hurusi kamu. Asi di ana, «Sa Lona Fuurumma hin mba wa ni, li dlara mbuɗta su sa wanna na su?»

Suu ŋgolona cuk suu asgaana ay a vi Yesu

³² Suu Farisenna hum dlara suuna hosok duk tasi kay Yesu halaŋga na ni, asi u muli suu li ɓivunna cuk suu asgaana ay a vi Yesu aya.

³³ Yesu dasi ana, «An kak u agi ew, ŋgoo dagan ni, an hin hoŋ eg sa sunun ayna.

³⁴ Agi hin halanu ka fanɗi. Agi ndak ka tew hu li ma an tuɗ hunaɗi.»

³⁵ Suu Juifna joɓ tasi ana, «Nam hin tuɗ ni ara a aygi fambi nige? Nam hin tuɗ ni u suu Juif suu mbee ki hu mbassa Grekka, a haɗ suu asina may su?

³⁶ Boy ma nam damma ummi ana mege? Nam di ana, Agi hin halanu ka fanɗi, agi ndak ka tew hu li ma an tuɗ hunaɗi, boy namma ni ana mege?»

Lum ma kay iirira na

³⁷ Buu ma daɓ dagan a luuna ni ma ŋgolna. Buu namma Yesu col kolo fok suuna sawalla ana, «Sa laara camma mbay egen, ciya.

³⁸ Sa tin hurum kanna mbo lum ma iirira na hin ɓaɗ hurum kurufu ko magaara dira na.»

³⁹ Yesu ɓak kay Musukka suu tin hurusi kamma a faɗna. Musuk ndaɗta mba ka tuɗi kayme Yesu ka bay fi bibiŋil mamba tuwa.

Suuna ɓorow duk ɦoŋosi ki kay Yesu

⁴⁰ Suu molina, ŋgoo dagan hum boy namma na ni, di ana, «Sa namma gasi ni sa jok vun Lona.»

⁴¹ Suu ɦiw di ana, «Nammi Sa Lona Fuurumma.» Suu hiŋŋa olo ana, «Sa Lona Fuurumma col ay ni Galile su?

⁴² Magaara di ki ni ana Sa Lona Fuurumma col ay ni hu njaf ma vi Davidna, mba hu zi ma Betlehemma, ni zi ma David ti maara huna.»

⁴³ Suuna ɓorow duk ɦoŋosi ki kay Yesu.

⁴⁴ Suuna hal a vamu may, sa tin kom ka egembi.

Muli suu Juifna ka tin hurusi kay Yesuɗi

⁴⁵ Suu asgaana hoŋ ay eg muli suu li ɓivunna u suu Farisenna, asi joɓosi ana, «Agi mbay u nambi ni kay mege?»

⁴⁶ Suu asgaana hoŋosi dira ana, «Sa ɓak jivi ko sa namma na kaɗi.»

⁴⁷ Suu Farisenna joɓosi ana, «Agi hinigi Yesu ganagi yagi ko suu hiŋŋa na lay su?

⁴⁸ Duk suu mulina u suu Farisenna agi wi maa dew tin hurum kam su?

⁴⁹ Suu molina ka wi u gaɗta vi Moizɗi ni suu ki baayna.»

⁵⁰ Nikodem ay duk suu Farisenna hu may, nammi sa tuɗ ay a gol Yesu jewna.

⁵¹ Nam dasi ana, «Gaɗ mayra di ana, Aŋ ka gi sana daŋgayna bay wi dlara nam laɗta u dlara nam daɗtaɗi.»

⁵² Asi hoŋom dira ana, «Aŋŋi sa Galilena may su? Haɗ hu magara aŋ hin wi ana sa jok vun Lona ma col ay Galile dew kaɗi.» [

⁵³ Ŋgoo daganda gegelay ni gi tam vo hu ziim gaw.