Boy Ma Ayra Ma JAŊ Ɓiirimma 6 - Boy Lonana

Yesu ɦal funa maŋ suuna bup bup vadl

¹ Ŋgoo daganda, Yesu tuɗ ŋgoo lumma Galilena ii hiŋŋa (ni lumma Tiberiyadna).

² Suuna tuɗ kay cerem bolow cocoo, kayra asi wi dlara mbuɗta nam laɗta bolow coco garaɗ suu tuguɗira kira.

³ Yesu ɗuŋ kolo kay ɦinira, kak kaŋga u suu mam suu haɗina.

⁴ Luu ma Pakŋa vi suu Juifna hin tok.

⁵ Yesu gol na ni, wi suuna mbay egem bolow cocoo, nam di Filip ana, «Ay hin fay tlesuu tira a gususi ay maŋ suu moli wanna ni arage?»

⁶ Nam di dla ndaɗta ni a gol boy ma hu Filipma, Yesu wi dlara nam hin laɗta ki fok jew da.

⁷ Filip hoŋom dira ana, «Ay gus tlesuu tira ay mbumbu dok hindi lay ni, ka ndak a suuna ŋgen ki funusi nde nde belɗi lay.»

⁸ Sa haɗi ma daŋŋa dew Andre, wayaŋ Simon Piyerna, dam ana,

⁹ «Goozoŋŋa ka tani dew u mappa kom vadl, kulufna mba' may. Tle asina hin ndak kay suu bolow wanna su?»

¹⁰ Yesu di ana, «Lak suuna ha ki kaŋga halaŋ.» (Hu li namma usuna hu cocoo.) Asi suuna halaŋ lak kaŋga gaw. Asi suu njufina tew va ma bup bup vadl.

¹¹ Yesu yow mappa komu, gi deɓ Lona kamu, hin ɓorowom ha ki maŋ suu laki kaŋgana. Nam ɦasi kulufna hu may, ko asi minda na.

¹² Suuna hoɓi hoɓ mi, Yesu di suu haɗi mamsina ana, «Yowogi u mappa ma hinna ay koloo, hin a maa viɗ kiɗi.»

¹³ Mappa vadl ma asi tamma, umba hin kosira oy kaalamina doogo yam mba'.

¹⁴ Suuna wi dlara mbuɗta Yesu laɗta na ni, di ana, «Sa namma gasi ni sa jok vun Lonna ma hin a mbay hu duliyara.»

¹⁵ Yesu wi ana asi hin a vam u eŋga a kakam a mul masina ni, nam tuɗ ki ŋgoo bagi kay ɦinira vaydegem dew.

Yesu tuɗ kay mbona

¹⁶ Faɗta mbuɗ fiɗigi gani, suu haɗi mamsina tuɗ fun lumma.

¹⁷ Asi ɗuŋ hu lumba gi tasi a tuɗ hu zina Kapernaum. Ni lina mbuɗ ki ni njeŋge gaw, Yesu ka u asi tuɗi.

¹⁸ Babaana paɗ cocoo, mbona gijaŋ ka bilna may.

¹⁹ Asi tew ki duka gayra u lumba tew ni, tli irisiya ni Yesu tuɗ ay kay mbona a mbay egesiya, asi mbuɗ ki ndaana gaw.

²⁰ Yesu dasi ana, «Ni anu, lagi ndaaɗi.»

²¹ Asi min a tli Yesu hu lumba may ni, gol irisiya ni, asi ki ni doŋ lumma hu li ma asi min a tuɗ huna gaw.

Suuna hal Yesu

²² Ŋgoo dagan buu namma ɗaŋi, suu hin ha ki ŋgoo lumma ii hiŋŋana wi ana lumba ni dew. Asi wi ana Yesu ful ka hu lumba u suu mamsinaɗi, suu mamsina tuɗ ni vaydegesiya.

²³ Hu li namma suuna yow ay hu zi ma Tiberiyadna u lumba usi bolow cocoo, tew hu li ma Yesu gi deɓpa maŋ Lona kay funa ɦam maŋ suuna na.

²⁴ Hu li ma suuna wi ana Yesu u suu haɗi mamsina kaɗi ni, asi ful hu lumba halaŋ halaŋ a tuɗ halam hu zi ma Kapernaumma.

Yesu ni fu ma iirina

²⁵ Asi fi Yesu ha ki doŋ lumma ii hiŋŋa fini, asi dam ana, «Mala Haɗta, aŋ mbay ki tani ni saɓage?»

²⁶ Yesu hoŋosi dira ana, «An dagi ni gasi u voɗoɗu, agi halan ni kayra an ɦagi funara, ni ka kay dlara mbuɗta agi wan an laɗtaɗi.

²⁷ Lagi sunda kay fu ma ɓeŋ ki ɦawanaɗi, lagira ni kay fu ma kak iiri gak gak ɦagi iirirana. Fu namma Goŋ Sanna hin ɦagina ni namu, kayme Bum Lona ɦam saɓak namma ni hu duk kom halaŋ.»

²⁸ Asi joɓom ana, «Tlesuu ami lasi a faɗ vun sunda ki ko Lona minda na ni suu taarage?»

²⁹ Yesu hoŋosi dira ana, «Sunda Lona joɓogira kogira ni ana agi tin ni hurugi kay sa nam sunum ayna.»

³⁰ Asi dam ana, «Dlara mbuɗta aŋ laɗ a ami tin hurumi kaŋga ni taarage? Dlara aŋ hin laɗ a faɗ vun sunda kira ni taarage?

³¹ Somoyomi suu jewna ti mann ay hu mbassa paɗara ko gaɗta vi Moiz dira na. Nam ɦasi fu ma col ay kolo huulona.»

³² Yesu hoŋosi dira ana, «An dagi ni u voɗoɗu, Moiz ɦagi funa ni ka nambi. Bun Lona ɦagi fu ma gasi ma col ay kolo huulona, ni namu.

³³ Fu ma Lona ɦagina col ay ni kolo huulona ɦal iirira maŋ suuna ni namu.»

³⁴ Asi dam ana, «Bu Suuna, ɦami fu namma tew tew.»

³⁵ Yesu dasi ana, «Anni fu ma iirina, sa mba egenna mayra ka cam oloɗi, sa tin hurum kanna laara hin ka cam oloɗi lay.

³⁶ An dagi ki lay, agi wan wi ni, ka tinigi hurugi kanɗi.

³⁷ Suu Bun ɦansinana halaŋ mbay egenu. Sa mbay egenna, an ka noyom kiɗi.

³⁸ An mbay tani ni a li minda vi sa sunun ayna, ka min mandaɗi.

³⁹ Sa sunun ayna min ana suu nam ɦansina wanna, an viɗ maa ki dewɗi. Nam min ana an paɗasi ki kolo ŋgoo dagan hu buu ma kaɓakŋa halaŋ.

⁴⁰ Dlara Bun hurum miniɗta, ni ana suu wi Goŋ Sanana, tin hurusi kamma, fi iirira ka daɓ kiɗira. An hin paɗasi ki kolo iiri, ŋgoo dagan hu buu ma kaɓakŋa.»

⁴¹ Suu Juifna hosok duk tasi ana nam di ana, «Anni fu ma col ay kolona ni kay mege?»

⁴² Asi di ana, «Ni ka Yesu ma goŋ Yosefnaɗi su? Ami wi bum u sumu. Nam hin di ana nam col ay ni kolo huulona ni nanage?»

⁴³ Yesu dasi ana, «Seŋegi hosokka duk ɦoŋ tagira.

⁴⁴ Sa ka ndak a mba egen bay Bun ma sunun ayna gam irim ayɗi. An hin paɗam ki kolo iiri ŋgoo dagan hu buu ma kaɓakŋa.

⁴⁵ Suu jok vun Lona ɓii boy namma ana, Lona hin haɗasi halaŋ. Sa ma hum vun Buna, vi u haɗ mamba mayna, hin mbay egenu.

⁴⁶ Ni ka ana sa ma wan Bunna naɗi. Sa col ay kolo huulona wi Bun ni nam dew.»

⁴⁷ «An dagi ni gasira, sa ma tin hurum kanna, iirira daɓ kiɗira ka hurumu.

⁴⁸ Anni fu ma iirina.

⁴⁹ Hu mbassa paɗara, somoyogi ti manna (fu ma Lona ɦasinana), asi miɗa.

⁵⁰ Fu ma col ay kolo huulona, sa tamma hin ka miɗɗi.

⁵¹ An ni fu ma iiri ma col ay kolo huulona, sa ma ti fu nammana, kak iiri ni a fafatɗa. Fu ma an hin ɦammana ni tliw tanu, tliw tan ma an ɦagina a tirana ni ana suuna kak iiriya.»

⁵² Ŋgoo dagan boy namma ni, suu Juifna ciwayra duk tasi ana, «Sa namma ɦaygi tliw tam a tira ni nanage?»

⁵³ Yesu hoŋosi dira ana, «An dagi ni gasira, lini agi ti tliw Goŋ Sanna kaɗi may, cam busuum kaɗi may ni, agi hin ka fi iirira hurugiɗi.

⁵⁴ Sa tan tliwin may, can busuun may na, iirira ka hurumu. An hin paɗam ki kolo ŋgoo dagan hu buu ma kaɓakŋa.

⁵⁵ Tliw tan ni fu ma ti ma gasina, busuun ni va ci ma gasina may.

⁵⁶ Sa ma tan tliwin may, can busuun may na, sa namma ka hurun may, an ka hurum may.

⁵⁷ Bun ma sunun ayna ka iiriya, an kaki iiri ni umu, sa ma tan tliwinna kak iiri ni un may.

⁵⁸ Gola, ni fu ma col ay kolo huulona. Nam ka ko fu ma vi somoyogi suu fok jewna naɗi. Asi tamu, hin miɗ ki lay. Fu wanna, sa tamma kak iiri a fafatɗa.»

⁵⁹ Yesu dasi boy namma ni hu li ma nam ka haɗ suuna hu Zira Tokka hu Kapernaumma.

Boy ma kay iirira ka daɓ kiɗira

⁶⁰ Asi hum boy ma Yesu damma hummi, suu haɗi mamsina bolowo di ana, «Boy namma loɓ cocoo, sa hin vamma ni gege?»

⁶¹ Yesu wi ana suu haɗi mamsina ka hosok duk tasi kay boy namma ni, nam dasi ana, «Boy namma haɗagi hurugi su?

⁶² Dla ndaɗta haɗagi hurugi wanni, falira Goŋ Sanna hoŋ hu li ma nam ay huna wa ni, agi hin li ni nanage?

⁶³ Musukka ɦal iirira ni ndaɗu, ta sa warna ni ɦawaa. Boy ma an dagina ni musukka u iirira.

⁶⁴ Suu ɦiw dukugiya ka tin hurusiɗi.» (Suu ka tin hurusi kay Yesuɗina u sa gam um kina, nam wasi ay ki ni fok jewe.)

⁶⁵ Nam di olo ana, «Gola, an dagiya, Lona tin ii sana ay ka egenɗi ni, nam ndak ka a mba egenɗi.»

⁶⁶ Fali ndaɗta, suu haɗi mamsina bolowo hoŋ ki voo, ka tuɗ u nam oloɗi.

⁶⁷ Yesu di suu haɗi suu doogo yam mbana ana, «Agi min a tuɗ may su?»

⁶⁸ Simon Piyer hoŋom dira ana, «Bu Suuna, ami tuɗ ni eg gege? Boy ma ɦal iirira ka daɓ kiɗira ni koŋgi su?

⁶⁹ Cecemmi ami tin hurumi wi ki ana aŋŋi sa teteɗ ma col ay vi Lonna.»

⁷⁰ Yesu hoŋosi dira ana, «An ŋgaɓagi doogo yam mba' ni ka anɗi su? Maa dukugi dew ni fulina.»

⁷¹ Nam ɓak na ni kay Yudas ma goŋ Iskariyotna. Yudas ni sa duk suu doogo yam mbana ma hin ɦal Yesu ha ki maŋ suuna na.