Boy Ma Ayra Ma JAŊ Ɓiirimma 5 - Boy Lonana

Yesu garaɗ sa gugufuna kiyo

¹ Fali ndaɗta suu Juifna tok a li luuna, ni Yesu tuɗ hu Yerusalem.

² Vun kaana dew yam ana vun kaa ma cuk timigiina, eg vun kaa namma, goo goloŋŋa huwa yam u vun Hebrena ana, Betesda. Fun goloŋ namma gina pira hu vadl.

³ Suu tuguɗira buuri um cocoo, suu dugina, suu dalira, suu gugufura lay. [Asi juɓmi yona a irim gijaŋ paɗ zala gulus gulussa.

⁴ Sa sunda huulona mba gi tam duk yona zalam irim koloo. Yona seŋ zala wa ni, sa tuguɗi ma gi tam fok jewesina lini tuguɗi mege lay ni hinim kiyo.]

⁵ Hu li namma, sa tuguɗi ma dew li basara dok hindi yam kalavandi.

⁶ Yesu wam buurira na ni, nam wi kam ana nam ki u tuguɗira ni day dayna may ni, nam joɓom ana, «Aŋ min a taŋ garaɗ ki su?»

⁷ Sa tuguɗira hoŋom dira ana, «Bu Suuna, yona gijaŋ paɗ zala may ni, sa tlan a gan duk kaɗi, an hal a gi tanda may ni, sa daŋŋa kal ki jewen gaw.»

⁸ Yesu dam ana, «Col koloo, tli dlaɗ maŋga kaŋu tuɗa.»

⁹ Na gaw ni, sana tam garaɗ ki gaw, tli dlaɗ mamba, gi tam tuɗta gaw. Fali ndaɗta ni hu buu ma vi Lonna.

¹⁰ Suu Juifna di sa tam garaɗ kina ana, «Hu buu ma vi Lonna gaɗ maygira di ana aŋ ndak ka a tli dlaɗ maŋga kaŋgi.»

¹¹ Nam hoŋosi dira ana, «Sa ma garaɗan ki na dan ana, Tli dlaɗ maŋga kaŋu, tuɗa.»

¹² Asi joɓom ana, «Sa daŋ ana tli dlaɗ maŋga tuɗa na, ni gege?»

¹³ Suuna moli hu li namma coco wanni, Yesu tuɗ ki gaw, kay ndaɗta sa tam garaɗ ki na, ka wi ana ni namuraɗi.

¹⁴ Buu dagan ca ni, Yesu ŋgaf u nam hu Ziŋ Lonara, dam ana, «Huma, wandara ni aŋ garaɗ ki wa, li co a dlara daŋ faŋ su ndaɗta oloɗi.»

¹⁵ Sana tuɗ di maŋ suu Juifna ana Yesu garaɗam ki ni namu.

¹⁶ Suu Juifna gijaŋ hal Yesu kayme nam li dla ndaɗta ni hu buu ma vi Lonna.

¹⁷ Yesu hoŋosi dira ana, «Bun li sunda tew tew, an li sunda may.»

¹⁸ Yesu hum ka u gaɗta kay buu ma vi Lonnaɗi. Olo, nam di ana Lona ni Bumu, nammi ko nam na may. Kay boy namma halaŋi, suu Juifna halam sura fok jewra a cam kira.

Boy ma col ay fun Yesu kay sun mambana

¹⁹ Yesu hoŋosi dira ana, «An dagi ni gasira, Goona ndak ka a li va kay tambi. Nam li ni tlesuu nam wi Bum ay lasina. Tlesuu Buna lasina, Goona lasi ni asi may.

²⁰ Buna min Goona, takam tlesuu nam lasina bel. Nam hin takam yal sunda ha fok ŋgol sura wanda olo. Agi hin mbuɗ lakira na jim kay sun ndaɗta.

²¹ Buna paɗ suu miɗina ki koloo, ɦasi iirira hurusiya, na may ni, Goona ɦal iirira maŋ suu nam min a ɦasira na.

²² Buna ka kaɓak kay saɗi, nam ɦal saɓakŋa maŋ goromma a kaɓakŋa kay suuna,

²³ a suuna halaŋ ŋga Goona ko asi ŋga Bunara na may. Sa ma ka ŋga Goonaɗina, ŋgaɗi ni Bum ma sunum ay na may.

²⁴ «An dagi ha ni gasira, sa humun boy manna, tin hurum kay sa ma sunun ayna may ni, iirira ka daɓ kiɗira ka hurumu. Ɓakŋa vi Lona ka kambi, nam hin lina vi suu miɗina kiyo, jak hu iirira ka daɓ kiɗira.

²⁵ An dagi ha ni gasira, lin hin tok a mbara, nam mbawa da, suu may suu ki miɗina hin hum del Goŋ Lonna, suu humum delem asina hin kak iiriya.

²⁶ Buna ka u saɓakŋa a ɦal iirira maŋ suuna, na may ni, Goona ka u saɓakŋa a ɦal iirira may.

²⁷ Nam ɦal saɓakŋa maŋ Goromma a kaɓakŋa, kayme nammi Goŋ Sanna.

²⁸ Lakagi jimbi, lin hin mbaa, suu miɗina halaŋ humum delemu, hin paɗ ay ki kolo fun zulusi iiriya.

²⁹ Suu li jivina hin paɗ ay ki kolo ni fi iirira, suu li cona paɗ ay ki kolo ni ɓakŋa kasi kaay may.»

Tlesuu tak ki kay ŋgolla vi Yesuna

³⁰ «An ndak ka a li va kay tanɗi. An kaɓakŋa ni u va ma bun danana, kaɓak manna ni u voɗomu, kayme an ka hal a li dlara kay tandaɗi, an li ni dlara sa sunun ayna miniɗta.

³¹ An li di kay tan ni an toko ni, dlaanda ka li gasiɗi.

³² Sa ma daŋŋa a vovoɗ manda ni namu, an wi ana boy ma nam dam kanna ni gasi.

³³ Agi sunugi suuna ay eg Jaŋ. Nam di boy ma ɗegeena ay kay gasira.

³⁴ Anu, an ka hal sa a li a vovoɗ manda na koɗi, an ɓakagi boy namma ni ana agi suɗ kiyo.

³⁵ Jaŋŋi ko pindilla tuɗ ni fok suuna a asi wi kiɗikka na. Agi vi dla ndaɗta ay ki kagi a li ayra u kiɗik mamba lay.

³⁶ An, sa vovoɗ manda kaa, ŋgol su ma vi Jaŋŋa, ni tlesuu Bun ɦansina ana an lasiya na. An lasiya, tle asina takagi ana Bun Lona sunun ay ni namu.

³⁷ Bun ma sunun ayna ka di ay kan lay. Agi humum delem ka dewɗi lay, wam irim kaɗi lay.

³⁸ Agi ka vam boy mamma hurugiɗi kayme agi ka tin hurugi kay sa nam sunum aynaɗi.

³⁹ Agi haɗagi ɓiira hu magaarara, kayme agi saa ana agi hin fi iirira ka daɓ kiɗira huwa. Tle asina ɓakŋi kan daŋ may.

⁴⁰ U ndaɗta na lay ni, agi ka mba egen a fi iirira gasiraɗi.

⁴¹ «An ka hal ana suuna geleɗenu naɗi.

⁴² An wi ana agi minda kay Lonara ka hurugiɗi.

⁴³ An mba varagi u sem Bunu, agi van ka varagiɗi, sa mbay u min mamba na, agi hin vam varagi ni namu.

⁴⁴ Agiya, agi hal ni geleɗ magira duk tagira, geleɗta col ay kolo ko Lo ma dewna, agi ka halaɗɗi. Agi hin tin hurugi gin kay Lona ni ana mege?

⁴⁵ Saaragi ana an gagi u coogira ki maŋ Bun Lona ni anu naɗi. Moiz saagi ma ŋgolna agi tin hurugi kamma hin gagi u coogira ki ni namu.

⁴⁶ Lini gasagi, agi tin hurugi kay boy ma vi Moizna ni, agi ndak tin hurugi kay boy manna may. Nam ɓii ni kay boy manna.

⁴⁷ Agi ka tin hurugi kay boy ma vi Moizna gasagiɗi, ni agi hin tin hurugi kan ni ana me olo ge?»