Boy Ma Ayra Ma JAŊ Ɓiirimma 4 - Boy Lonana

Yesu u cara Samarira

¹ Bu Suuna wi ana, suu Farisenna hum ana suu vi Yesuna bolow su suu vi Jaŋ ma mbus batemma, nam mbus suuna batemma coco su suu vi Jaŋŋa lay.

² (A gasira ni, Yesu ka mbus batem maŋ saɗi, suu haɗi mamsina mbus suuna ni asiya.)

³ Yesu hum na ni, nam hin mbassa Yudera tani, hoŋ Galile.

⁴ A tuɗ Galilera wanni, voɗta daŋ kaɗi ni. Yesu jak ha hu mbassa Samarira.

⁵ Nam tew eg zi ma Samarina tok yam ana Sikar. Zi namma tok eg sene ma Yakob ɦam maŋ goromma Yosefna.

⁶ Hu li namma goloŋga vi Yakob ka huwa. Yesu loɓ ay ko tuɗta, kak kaŋga fun goloŋga, ni faɗta faaliya.

⁷ Cara Samarira mbay a go yona, Yesu joɓoɗ ana, «Ҥan ay yona, an ciya.»

⁸ (Suu haɗi mamsina tuɗ hu zina a gus tlesuu tira.)

⁹ Cara Samarira di Yesu ana, «Aŋŋi sa Juifna may ni, joɓon yona kon an cara Samarira ni nanage? Suu Juifna ka ŋgaf u suu Samarinaɗi may nige?»

¹⁰ Yesu hoŋoɗ dira ana, «Lini ndak wi tlesuu Lona ɦasina ni, ndak wi sa joɓok yo ma cira may ni, ndak a joɓ yona ko sa namma ni ndak ɗow. Nam hin ɦak yo ma iirina.»

¹¹ Cara dam ana, «Bu Suuna, zew gan ka koŋgi may ni, goloŋga uɗ day may ni, aŋ hin fi yo iiri ma ɦannana ni arage?

¹² Bumi ŋgolo Yakob ma gi goloŋ ndaɗtana caɗ mboɗ lay, goryom u yoori mamsina caɗ lay ni, aŋ ŋgol suum su?»

¹³ Yesu hoŋoɗ dira ana, «Sa ma ci yo namma na laara hin cam olo.

¹⁴ Sa ma ci yo ma an ɦammana, laara ka cam oloɗi, yo namma hin egemmi a iirira ka daɓ kiɗira.»

¹⁵ Cara dam ana, «Bu Suuna, ɦan yo namma a laara can oloɗi, a an hin mba ki tani day a go yona oloɗi lay.»

¹⁶ Yesu daɗ ana, «Tuɗ yi njufuk aya hoŋogi ay tani.»

¹⁷ Cara hoŋom dira ana, «Njufun kaɗi.» Yesu daɗ ana, «Ndak di ana njufuk kaɗi ni u voɗoɗu.

¹⁸ Ndak kak u njufina vadl, ma ndak kaki u nam wanna ni ka njufukgi, ndak di na ni gasi.»

¹⁹ Cara hoŋom dira ana, «Bu Suuna, an wi gasi ana aŋŋi sa jok vun Lona.

²⁰ Somoyomi suu jew suu Samarina goɓ Lona ni kay ɦinira wanda. Agi suu Juifna ana li ma goɓ Lona ha ni Yerusalem.»

²¹ Yesu hoŋoɗ dira ana, «Cara, humun ha tuwa, lina hin fok na nde ni agi ka goɓ Lona kay ɦiniraɗi lay, hu Yerusalembi lay.

²² Agi suu Samarina goɓmi va agi ka wambina, ami suu Juifna goɓmi va ami wamma, kayme suɗta col ay ni vi suu Juifna.

²³ Lina hin tok a mbara, nam mba wa da. Suu gasi suu goɓ Lona wanni asi hin goɓommi u Musuk Lonara u gasira may. Lona min ana suuna goɓommi u Musukka u gasira may. Lona min ana suuna goɓommi na.

²⁴ Lona ni Musukka, suu a goɓomma goɓommi u Musukka u gasira may.»

²⁵ Cara dam ana, «Sa Lona Fuurumma (yam ana Kristu) hin mbaa nam mba wa ni, hin daygi u tlena ki halaŋ.»

²⁶ Yesu hoŋoɗ dira ana, «Anni namu, ɓakakŋi an daŋ may.»

²⁷ Hu li namma, suu haɗi suu vi Yesuna hoŋ ay egemu. Asi fam nam ɓak u cara na ni, mbuɗ lakira na jim. Sa joɓom ka ana aŋ li ni me egeɗ gerɗi lay, ɓak u ndaɗ ni kay megeraɗi lay.

²⁸ Cara hin gegel maɗna ka fun goloŋga tani, col liŋŋa voo a di suuna ana,

²⁹ «Mbaagi aya, gologi sana njaɗan dlaanda an laɗta ki halaŋ, li ka ni Sa Lona Fuurumma kalage?»

³⁰ Suuna sel ay ki tuɗ eg Yesu.

³¹ Hu li namma suu haɗina di Yesu ana, «Bu Suuna, mbay ti va nde.»

³² Yesu hoŋosi dira ana, «An ti ni fu ma agi ka wambina.»

³³ Suu haɗina joɓ tasi ana, «Sa ɦam va ti ka wa su?»

³⁴ Yesu dasi ana, «Ti ma an tamma ni a li minda vi sa sunun ayna, a faɗ vun sunda nam ɦanda ana an laɗura may.

³⁵ Agi di ana, tilna hin fiɗi a feɗ wana, anu, an dagi ana, gologi senena jiviya, wana ne wa ndaki a feɗta lay.

³⁶ Sa feɗ wana hu senena, nam fi ki ni warak mamba da, nam tok ii wana ni kay iirira bay daɓpa. Ni kay ndaɗta, sa feɗ wana may, sa zaa wana may, asi furi ni ko tasi dew.

³⁷ Boy ma di ana sa maa dew zaa wana may, ma hiŋŋa feɗem may na ni gasi.

³⁸ An sunugi a feɗ wana hu sene ma agi li sunda ka huɗina. Suu daŋŋa li sunda jewe, sun ndaɗta njunugi cecemi ni ndaɗu.»

³⁹ Suu Samarina bolow coco tin hurusi kay Yesu kayra cara dasi ana, «Nam dan tlesuu an lasina ki halaŋ.»

⁴⁰ Suu Samarina mba eg Yesu kala ni joɓom ana nam kak varasi tuwa, Yesu li buuna varasi mba'.

⁴¹ Suu daŋŋa bolow coco tin hurusi kay dlara nam daɗ u tambara.

⁴² Asi di cara ana, «Cecemi ami tin hurumi kay Yesu ni ka u boy ma ndak damma dewɗi, kayme ami hum u hum tamira may, ami wi ana nam gasi ni Sa Suɗta vi suuna halaŋ.»

Yesu garaɗ goŋ mulnana kiyo

⁴³ Yesu li buuna ŋgoo dagan mba' ni, tuɗ Galile.

⁴⁴ Yesu u tamba di ki ana, «Sa jok vun Lona, sa ka humum vunum hu mbas mambaɗi.»

⁴⁵ Nam tew Galile wanni, suu hu zi namma na vam varasi jiviya, kayra asi tuɗ ay hu luu ma Pakŋa Yerusalem wam ayra. Asi wi tlesuu nam lasi ay hu luu nammana halaŋ lay.

⁴⁶ Nam hoŋ ay hu Kana, hu mbassa Galilera, ni li ma nam mbuɗ yona ki summa huna. Hu li namma, sa li sunda fok mul ma ŋgolna, goromma ay tuguɗira ha Kapernaum.

⁴⁷ Hu li ma nam hum ana Yesu mbay Yude hu mbassa Galile ni, nam tuɗ egem joɓom ana nam tuɗ hu Kapernaum garaɗam goromma hu tuguɗira, hin tok a miɗ kiyo.

⁴⁸ Yesu dam ana, «Agi min ana wi dlara mbuɗta an laɗta ki na herege tin hurugi kan tuwa ni nanage?»

⁴⁹ Sa li sunda fok mul ŋgolna hoŋom dira ana, «Bu Suuna, mbay ki varan jew bay goronna miɗa.»

⁵⁰ Yesu dam ana, «Tuɗ voo, goroŋŋa garaɗ ki wa.» Sana tin hurum kay boy ma Yesu dammana, gi tam tuɗ vo gaw.

⁵¹ Nam gi tam a tuɗ vora wanni, suu li sunda fokomma ŋgafam hu voɗta, dam ana, «Goroŋŋa garaɗ ki wa.»

⁵² Nam joɓosi ana, «Goona garaɗ ki ni faɗta a gage?» Asi dam ana, «Nam garaɗ ki ni kaa faali faɗta ki leŋiya, tuguɗira hinim gaw.»

⁵³ Bu goona wi ana ni hu li ma Yesu dam ana, goroŋŋa garaɗ ki wa na. Nam u suu mamsina halaŋ tin hurusi kay Yesu.

⁵⁴ Hoŋga nam hoŋ ay Yude hu mbassa Galilera, ni dlara mbuɗta nam laɗ a yamba mbara.