Boy Ma Ayra Ma JAŊ Ɓiirimma 20 - Boy Lonana

Yesu paɗ ki kolo iiriya

¹ U damas maɗii feɗet, lina bay garaɗ ki tu ni, Mari ta Magdalara tuɗ kay ussa. Ndaɗ i fi ni ɦinira ki lagaɗi fun zulla.

² Ndaɗ hoŋ liŋŋa i fi Simon Piyer u sa haɗi ma Yesu minimma dasi ana, «Asi tli Bu Suuna ay ki hu zulla gammi ara kala, ami ka wi li ma asi gammaɗi.»

³ Piyer u sa haɗi ma hiŋŋa tuɗ kay ussa.

⁴ Asi yow liŋa u dlaasira jakka. Sa haɗi ma hiŋŋa liŋ feɗ su Piyer tuɗ tew fun zulla jewemu.

⁵ Nam goɓ yam ha fun zulla na ni, fi ni baraw ma ganam u namma cuki kaŋgaa. Nam kal ka hu zullaɗi.

⁶ Piyer mbay ŋgoo dagan wani, kal ha ga hu zulla gaw. Nam wi baraw ma ganam u namma cuki kaŋgaa.

⁷ U baraw ma ay ɗagi kay yam Yesuna cuki keŋ may. Baraw namma ay gi cuki kay tam zeɗ u ma ganam u namma.

⁸ Sa haɗi ma mba vun zulla jewna kal ha hu may. Nam wiya, hin tin hurumu.

⁹ (Suu haɗina bay hum u ɓiira di ana Yesu miɗ wa ni, hin paɗ ay ki kolo iiriyara tuwa).

¹⁰ Suu haɗi suu mbana hoŋ ay voo.

Yesu tak tam ki ii Mari ta Magdalara

¹¹ Mari col ki fun zulla buru tiira. Ndaɗ tii na ni, goɓ yaɗ gol hu zulla.

¹² Ndaɗ wi suu sunda huulona mba' u baraw ma haɓma tasiya kaki hu li ma Yesu li gi huna, hiŋŋa kaki hu li sem li cuki huna, hiŋŋa hu li ma yamba li gi huna may.

¹³ Suu sunda joɓoɗ ana, «Cara, ndak tii ni kay mege?» Ndaɗ hoŋosi dira ana, «Asi tlan Bu Suuna manna wa, an ka wi li ma asi gam hunaɗi.»

¹⁴ Ndaɗ di boy namma na ni pereɗ iriɗu ni, wi Yesu coliya, ndaɗ ka wi ana ni Yesuraɗi.

¹⁵ Yesu joɓoɗ ana, «Cara ndak tii ni kay mege? Ndak halni gege?» Ndaɗ saa ana li ka ni sa gol u senena, ndaɗ dam ana, «Aŋ tlam ha ni aŋu ni takan lii aŋ gam huna, an tuɗ tlamu.»

¹⁶ Yesu daɗ ana, «Mari!» Ndaɗ pereɗ iriɗ, dam u vun masina ana, «Rabbuni» (ni ana Mala Haɗta).

¹⁷ Yesu daɗ ana, «Ŋgen kok egenɗi an bay tuɗ ay eg Bun tuwa. Ndak tuɗ di gorsenna ana an tuɗ kolo eg Bunu, nammi Bugi may eg Lo manna, nammi Loogina may.»

¹⁸ Ndaɗ Mari ta Magdalara tuɗ di maŋ suu haɗina ana, «An wi Bu Suuna aya.» Ndaɗ njaɗasi dlara nam daɗtara kiyo.

Yesu tak tam ki ii suu haɗi mamsina

¹⁹ Fiɗigira Damas ndaɗta may ni, suu haɗina tok tasi hu zira, gi vun goŋga kasiya kayme asi li ndaana ko suu Juifna. Yesu mba col dukusi dasi ana, «Heɓpa ka u agiya.»

²⁰ Nam dasi boy namma di ni, hin takasi duk kom u payam may. Suu haɗina wi Yesu na ni, asi furi cocoo.

²¹ Yesu hoŋosi dira olo ana, «Heɓpa kak u agiya, ko Bun sunun ay na ni, an sunugi ni na may.»

²² Ŋgoo dagan boy namma nam fo musuk mamma ha kasiya, dasi ana, «Fagi Musuk Lonara.

²³ Suu agi daɓasi coosira kina, ndaɗ ki ni daɓi may. Suu agi min ka a daɓasi coosira kiɗina, ndaɗ ka daɓ kiɗi may.»

Yesu u Tomas

²⁴ Tomas ma duk suu doogo yam mbana (yam ana Ŋgonina), hu li ma Yesu mba na ni, nam ka dukusiɗi.

²⁵ Suu haɗi suu hiŋŋa dam ana, «Ami wi Bu Suuna!» Tomas hoŋosi dira ana, «Lini an wi huɗuk mbil ma komma, tin kon ka huɗi ni, u ma payamma, tin kon ka huɗi lay ni, an ka tin hurun kambi.»

²⁶ Li buuna dagan kiɗisiya ni, suu haɗi suu vi Yesuna tok hu zira olo, buu namma Tomas ay dukusiya. Vun goŋga dugi kasiya. Yesu kal ay mba col dukusiya, dasi ana, «Heɓpa li u agiya.»

²⁷ Nam di Tomas ana, «Ҥuɗ koŋ aya, golon huɗuk konu, ɦuɗ koŋ ay tin koŋ payanu. Hin huruŋ ma mbambana kiyo, tin huruŋ kanu.»

²⁸ Tomas hoŋom dira ana, «Bu Suuna, Lo manna!»

²⁹ Yesu dam ana, «Ni kayra aŋ wan u iriŋu tin huruŋ kan ni na su? Furira ka kay suu tin hurusi kan bay wan u irisina.»

San ɓii magaara ndaɗta ni kay mege?

³⁰ Yesu li dlara mbuɗta daŋga coco fok suu haɗi mamsina olo. Tle asina ka ɓiiri hu magaa ndaɗta halaŋgi.

³¹ Tlesuu ɓiiri hu magaa ndaɗtana ni ana agi tin hurugi kay Yesu a nammi Sa Lona Fuurumma, Goŋ Lonna. Lini agi tin hurugi kam wa ni, agi hin fi iirira umu.