Boy Ma Ayra Ma JAŊ Ɓiirimma 18 - Boy Lonana

Suuna vi Yesu

¹ Yesu daɓ ɓakŋa may ni, tuɗ ŋgoo lumma Sedronna u suu haɗi mamsina. Hu li namma, nam kal duk senena u suu haɗi mamsina.

² Sene namma Yudas ma di ŋgeŋŋa kay Yesuna wamu, kayme nam mbay u Yesu u suu haɗi mamsina ko tasi tew tew.

³ Yudas mbay hu senena u suu asgaana suu muli suu li ɓivunna u suu Farisenna sunusi ayna. Asi mbay u njagina u pindilla u kura dooy kosiya.

⁴ Yesu wi dlara mbay kamba ki halaŋ ɦuɗ tam ay egesi joɓosi ana, «Agi halagi ni gege?»

⁵ Asi hoŋom dira ana, «Ami halami ni Yesu ma Nazaretna.» Nam hoŋosi dira ana, «Ni anu.» Yudas ma di ŋgeŋŋa kay Yesuna coli dukusi may.

⁶ Hu li ma Yesu dasi ana, «Ni anu ni,» asi hoŋ dagan na ni yow pukka kaŋgaa.

⁷ Yesu hoŋosi joɓpa olo ana, «Agi halagi ni gege?» Asi ana, «Ami hal ni Yesu ma Nazaretna.»

⁸ Yesu hoŋosi dira ana, «An dagi ay ki fok jew ana ni anu, lini agi halan ni anu ni, hinigi suu hiŋŋa tuɗa.»

⁹ Boy ma nam dam ki fok jew ana, «Suu aŋ ɦansinana an viɗ maa ka ki dewɗi na,» cecemmi dla ndaɗta li wa.

¹⁰ Simon Piyer paɗ ŋgewna, nam ka hum sa sunda vi mul ŋgol ma li ɓivunna kiyo (sa sun namma yam ana Malkus).

¹¹ Yesu di Piyer ana, «Hoŋ ŋgew maŋŋa hu ziimu. Aŋ saa ana lassa Bun ɦandara an ka ndaki kaɗɗi su?»

Asi mba Yesu fok mul ŋgol ma ɓivunna yam ana Aan

¹² Suu asgaana u mul masina u suu Juifna vi Yesu, njunum u zewna.

¹³ Asi tuɗum fok jew ni vi Aan. Aan ni kunuŋ Kaifna. Nammi mul ŋgol ma li ɓivunna hu mbassa ndaɗta.

¹⁴ Doli ni, Kaif ni sa di gaɗta maŋ suu Juifna ana, «Mariyaɗ ni san dew miɗ kay suuna halaŋ.»

Piyer tin vunum ki ana nam ka wi Yesuɗi

¹⁵ Simon Piyer u sa haɗi maa dew tuɗ ha u Yesu. Sa haɗi ma hiŋŋa, mul ŋgol ma li ɓivunna wamu. Ni kay ndaɗta nam kal ha u Yesu hu taraŋga vi mul ŋgol ma li ɓivunna.

¹⁶ Piyer hin kaki vun grekŋa buruwa. Sa haɗi ma mul ŋgol ma li ɓivunna wamma hoŋ ay ki buru joɓ cara juɓ vun grekŋa ana ndaɗ hin Piyer kal ay voo.

¹⁷ Cara gol vun grekŋa di Piyer ana, «Aŋŋi ka sa haɗina vi sa namma mayɗi su?» Piyer hoŋ dira ana, «Ҥawaa, an ka saamaɗi.»

¹⁸ Hu li namma semeɗna ciya, suu li sunda u suu asgaana gi kura a hol tasiya. Piyer mba col egesi hol tam may.

Mul ŋgol ma li ɓivunna joɓ Yesu

¹⁹ Mul ŋgol ma li ɓivunna joɓ Yesu kay suu haɗi mamsina u haɗta nam haɗasira.

²⁰ Yesu hoŋom dira ana, «An ɓak ki ni fok suuna halaŋ. An haɗ tew tew ni hu Zira Tokka, hu Ziŋ Lonara may ni hu li suu Juifna tok tasi huna, an di va ma ŋgay kaɗi.

²¹ Aŋ joɓon ni kay mege? Joɓ suu humma kay dlara an dasirara. Asi wi u tlesuu an ɓakasina ki jiviya.»

²² Hu li ma Yesu ɓak ha na may ni, sa asgaa ma coli egemma cam irim piŋ dam ana, «Aŋ ɓak fok mul ŋgol ma li ɓivunna eŋga na su?»

²³ Yesu hoŋom dira ana, «Lini an ɓakŋi coo ni, dan u ɓak ma co namma ay kiyo. Lini an ɓakŋi jiviya ni, aŋ can irin ni kay mege?»

²⁴ Aan sunum ha fok mul ŋgol ma li ɓivunna u kom ki kelem njuniya.

Piyer tin vunum kay Yesu olo

²⁵ Hu li namma ni, Piyer kagi a hol tamu, asi joɓom ana, «Aŋŋi ka sa haɗina vi sa namma mayɗi su?» Piyer tin vunum ana, «Ҥawaa, an ka saamaɗi.»

²⁶ Sa sunda vi mul ŋgol ma li ɓivunna ay ni hu njafna vi sa ma Piyer kaam humum kina, dam ana, «An waŋ ay hu senena u nambi su?»

²⁷ Piyer hoŋom dira olo ana ni ka gasiɗi. Hu li nammana gaw ni, tlekŋa hel gaw.

Yesu fok Pilat

²⁸ Asi mbaa Yesu ay vi Kaif a tuɗum fok mul ŋgolna vi suu Romma. Ni maɗii feɗet. Hu ziŋ mul nammana, suu Juifna ka kal hu a mbuɗ tasi coɗi, kay asi mbuɗ co wa ni ndak a ti fu ma Pakŋaɗi.

²⁹ Kay ndaɗta wanni, mulna Pilat kal ay ki egesiya, joɓosi ana, «Sa wanna agi vam ay ni nam ɓeŋegi mege?»

³⁰ Asi hoŋom dira ana, «Lini nam li va co ay kaɗi ni, ami ka mbaaram fokoŋ tanɗi.»

³¹ Pilat dasi ana, «Vagina kaam ɓak mamma u gaɗ magira.» Suu Juifna hoŋom dira ana, «Voɗta ka kami a ci sa ki kay tamiɗi.»

³² Dla ndaɗta li ni a li boy ma Yesu di ki fok jew kay miɗ mamma nam hin miɗ ni ana megera.

³³ Pilat hoŋ hu taraŋga yi Yesu joɓom ana, «Aŋŋi mulna vi suu Juifna su?»

³⁴ Yesu hoŋom dira ana, «Aŋ di dla ndaɗta na ni u taŋga ɗowba suuna daŋ ay kanni di su?»

³⁵ Pilat hoŋ dam ana, «Anni sa Juifna su? Suu Juifna u muli suu li ɓivunna ɦaŋ ay ki man ni asiya. Aŋ li ni mege?»

³⁶ Yesu hoŋ dira ana, «Mul manda ka kaŋga hu duliyara tanɗi. Lini mul manda ni kaŋga tani ni, suu manna hin li duuna doo kan a suu Juifna vanɗira mayɗi su? Ҥawaa, mul manda ka hu duliyara tanɗi.»

³⁷ Pilat hin dam ana, «Na ɗaŋŋi, aŋŋi mulna su?» Yesu hoŋom dira ana «Aŋ di ana anni mulna. An vuɗ hu duliyara ni a ɓakŋi dlara gasira. Sa min gasira hum dlara an daɗta.»

³⁸ Pilat joɓom ana, «Gasira ni taarage?» Ŋgoo dagan boy namma, Pilat kal ay ki bunsu tuɗ eg suu Juifna olo. Nam dasi ana, «An fi dlara ci sa namma ki kaɗta kaɗi.

Asi kaɓakŋa ana ci Yesu kiyo

³⁹ U dlaagira tew tew ni, an gagi sa daŋgay maa ki dew u vun til ma Pakŋa. Agi min a an gagi mulna vi suu Juifna ki su?»

⁴⁰ Asi gijaŋ sawalla ana, «Ҥawaa, nambi, ɦami ni Barabbas.» Doli Barabbas namma ni sa ci maɗna.