Boy Ma Ayra Ma JAŊ Ɓiirimma 17 - Boy Lonana

Yesu cen kay suu haɗi mamsina

¹ Yesu daɓ njaɗta daɓmi, tli irim kolo huulona di ana, «Bunu, lin ndak wa. Ҥal ŋgolla ay maŋ Goroŋŋa a Goroŋŋa hin ɦaŋ ŋgolla may.

² Kay aŋ ɦam saɓakŋa kay suuna halaŋ, a nam ɦal iirira ka daɓ kiɗira maŋ suu aŋ ɦamsina na.

³ Iirira ka daɓ kiɗira ni ana asi waŋ ana, aŋŋi Lo ma gasina dew, wi Yesu Kristu ma aŋ sunum ayna may.

⁴ An takaŋ ŋgol maŋga ki hu duliyara, an faɗ vun dlara aŋ dan ana an laɗura ki lay.

⁵ Cecemmi Bunu, ɦan ŋgolla fokoŋu ta aŋ ɦanda ay jew bay duliyara min tura.

⁶ «Suu aŋ manasi ay ki duk suu hu duliyarana, ɦansina, an takaŋ ki masi wa. Asi li ay ni maŋsina, aŋ ɦansina, asi hum u boy maŋŋa.

⁷ Cecemmi asi wi ana tlesuu aŋ ɦansina col ay ni koŋu.

⁸ Ni kayra an haɗasi boy ma aŋ danna ayna. Asi vamu. Asi wi gasi ana an col ay ni egeŋu, asi vi ana aŋ sunun ay ni aŋu.

⁹ «An ceneŋ kasiya ka kay suu halaŋŋaɗi, ni kay suu aŋ ɦansinana, kayme asi ni maŋsina.

¹⁰ Tlesuu konna halaŋŋi maŋsina, tlegeyeŋ halaŋŋi mansina may. Ŋgol manda hin tak kini usiya.

¹¹ An ka hu duliyara oloɗi, asi ka duk suu hu duliyarana tuwa. An tuɗ ha ni egeŋu. Bun ma teteɗna, golosi u saɓak seŋu, seŋ ma aŋ ɦannana, a asi li dew ko aŋ u an ay dewra ni na.

¹² Hu li ma an li ay u asina ni, an golosi ni u saɓak seŋu. Ni u semma aŋ ɦannana. An golosiya, maa dew viɗ ka kiɗi, viɗ ki ni ma magara di kam ana nam a viɗ kiyona. Nam viɗ ki kay a faɗ kini vun dla mayra ay ɓiiri jewra.

¹³ Cecem wanda, an tuɗ ha ni egeŋu. An ɓak na ni kay an ka hu duliyara tura, a furi manda hin ka hurusi ŋgolo.

¹⁴ An ɦasi boy maŋŋa wa. Suu hu duliyarana noyosi kiyo, kay asi ka varasiɗi, ko an ka varasiɗira na may.

¹⁵ An cecemmi ka ceneŋ ana aŋ yowosi ki hu duliyara naɗi, ni ana aŋ golosi ko Sa ma Cona.

¹⁶ Asi ka vi suu hu duliyaranaɗi, ko an ka masiɗira na may.

¹⁷ Aŋ mbuɗusi ki teteɗ u gasira. Boy maŋŋa ni gasira.

¹⁸ Ko aŋ sunun ay hu duliyara, an sunusi ni na may.

¹⁹ Anu, an mbuɗ tan ki teteɗ ni kasiya, kay asi lay mbuɗ ki teteɗ hu gasira.

²⁰ «An ceneŋŋi ka kasi holɗi, ni kay suu hin tin hurusi kan u boy ma asi hin dasinana.

²¹ An ceneŋ kay ana asi taɓ dew, a asi taɓi u ay dew ko aŋ ka hurun may, an ka huruŋ mayra na. A asi taɓ dew a suuna wi ana aŋ sunun ay ni aŋu.

²² An ɦasi bibiŋilla aŋ ɦandara wa a asi li taɓi dew ko ay taɓi dewra na may.

²³ An u asiya, aŋ u an may, a asi li gasi dlaɓi dew a suuna wi ana aŋ sunun ay ni aŋu, aŋ minisi ko aŋ mininda na.

²⁴ «Bunu, aŋ ɦansina, an min ana asi li u an hu li ma an hin kak huna, a asi wan bibiŋil manda. Bibiŋilla aŋ ɦandara, kayme aŋ minin ay ki fok jew bay duliyara liya.

²⁵ Bun ma ɗegeena, suuna ka waŋgi. Anu an waŋu. Suu asina wi ana aŋ sunun ay ni aŋu.

²⁶ An takaŋ ki masiya, an hin takaŋ ki olo kay a minda aŋ mininda li hurusiya, an u tanda li hurusi may.»