Boy Ma Ayra Ma JAŊ Ɓiirimma 16 - Boy Lonana

¹ «An dagi boy namma ha ni a agi viɗ hurugi ma tini kanna kiɗi.

² Asi hin dikigi ki hu Zira Tokka lay. Ni buu maa hin mbaa, suu cagi kina hin saa ana asi li ni sunda vi Lonara hu dla ndaɗta.

³ Asi hin li dla ndaɗta na ni kayra asi ka wi bunɗi lay ka wan anɗi layra.

⁴ An dagi boy namma na ni a buu masi namma ndak wa a asi li dla ndaɗta ni, agi wi kagi ana an dagi ki fok jewe.» «An dagi tle asina ay ka jewɗi ni kayra an ka u agira.

Sunda vi Musuk Lonara

⁵ Cecem wanda an tuɗ ni eg sa sunun ayna, sa dukugi ma joɓon ana, Aŋ tuɗ ni arage kaɗi.

⁶ Hurugi haɗ ni kay an dagi boy nammara.

⁷ Na may an dagi ni gasira a agi fi jivira ni an tuɗ kiyo, lini an tuɗ ka kiɗi ni, sa njunugina ka mba egegiɗi. An tuɗ wa ni, hin sunugina aya.

⁸ Nam hin mba wa ni, mal ii suuna kiyo takasi kay dlara asi ka viɗ tasi hu cora, kay dlara ɗegeera, kay ɓakŋa vi Lona lay.

⁹ Asi viɗ tasi hu cora ni kayra asi ka tin hurusi kanɗira.

¹⁰ Asi viɗ tasi kay tlesuu ɗegeena ni kay an tuɗ eg Bunu, agi hin ka wan oloɗi.

¹¹ Asi viɗ tasi kay ɓakŋa vi Lona ni kay mulna vi duliyara ɓakŋa ki kaay kam da.

¹² «Tlen kon coco a dagiya, cecemmi agi ndak ka a ziirisi bel tuɗi.

¹³ Musukka gasira mba wa ni, ndaɗ hin tinigi hu dlara gasira halaŋ. Ndaɗ ka ɓak kay saɓak maɗna kay taɗɗi, ndaɗ di ni dlara ndaɗ humuɗta, ndaɗ hin dagi dlara hin mbara may.

¹⁴ Ndaɗ hin ŋgaan kay tlesuu col ay konna, ndaɗ hin dagi tle asina.

¹⁵ Tlen vi Bun halaŋŋi varan an may, kay ndaɗta an dagi ana tlesuu col ay konna ndaɗ hin fasiya, hin dagisina.»

Yoora hin mbuɗ ki furira

¹⁶ «Kakŋa ew ni, agi ka wan oloɗi, ŋgoo dagan ew ni, agi hin wanu.»

¹⁷ Suu ɦiw duk suu haɗi mamsina njaɗ tasi ana, «Boy namma ni ana mege? Nam daygi ana kak na njokŋi, agi ka wan oloɗi, kak na njokŋi, agi hin wanu, ni kayra an tuɗ eg Bunda.

¹⁸ U boy ma ana kak ewna ni ana mege? Ay ka wi u boy ma nam dam wannaɗi.»

¹⁹ Yesu wi ana asi hal a joɓomu ni, nam dasi ana, «An dagi ana, Kak njokŋi, agi ka wanɗi, kak ew ni, agi hin wan olo, agi joɓ duk tagi ni kay boy namma su?

²⁰ An dagi ni gasi, Agi hin tiirigiya, yoo tagi lay. Suu hu duliyarana hin furiya, agi hin kak u yoora may, yoo magira hin mbuɗ ki furira.

²¹ Hu li ma cara tiliɗ ndak wa a vuɗta ni, ndaɗ yoo taɗ coco kay ndaɗ wi ana buuruɗ ma wihawra hin tok. Ndaɗ vuɗwa ni, humuɗ maa ki kay wihaw maɗta gaw. Ndaɗ li ayra kay gooɗ ma ndaɗ vuɗum wilina.

²² Cecemmi agi hu yoora ni na may. Agi wan wa ni, hurugi hin furiya, furi magi ndaɗta sa ndak ka a ɓaɗagira ki kogiɗi.

²³ «Buu namma hin mba wa ni, agi ka joɓon kay va dew oloɗi. An dagi ha ni gasira, Bun hin ɦagi tlesuu agi joɓosi u senna halaŋ.

²⁴ Gak gak cecemmi, agi bay joɓ va u sen tuwa. Joɓogiya agi hin fiya, furi magira hin mbuɗ ŋgolo.»

Yesu su kay suu hu duliyara halaŋ

²⁵ «An dagi tlena halaŋ u ndal boyna. Hin fok na nde ni, an ka dagi dla u ndal boyna oloɗi. An hin dagi dlara col ay eg Bunda ki kiɗik ɗal ɗal.

²⁶ Li namma hin mba wa na, agi joɓ joɓ magira eg Bun u senu. An dagi ka ana an hin cenem ay kagiya naɗi su,

²⁷ kayme Bun u tamba minigiya, kay agi mininu, vi ana an col ay ni vi Lona.

²⁸ An col ay ni vi Lona, mba kaŋga hu duliyara, cecem wanda ni, an hin duliyara hoŋ kolo eg Bunu.»

²⁹ Suu haɗi mamsina dam ana, «Cecem wanda ni, aŋ ɓak dlara ki teteɗ bay ndal boyna.

³⁰ Cecemmi ami wi ana aŋ wi tlena halaŋ. Ami ndak ka a joɓoŋ kay va joɓi oloɗi. Kay ndaɗta, ami vi ana aŋ col ay ni vi Lona.»

³¹ Yesu hoŋosi dira ana, «Agi tin hurugi kan wa ɗaŋ su?

³² Lin hin tok a mbaa, nam mba wa ɗow, agi hin njay ki dew dew halaŋ, gegelay tuɗ hu ziimu, agi hin hinin ni vaydegen dew, ɦawaa, an ka vaydegenɗi, Bun ka u anu.

³³ An dagi na ni kay duk ɦoŋogi li heɓpa u anu. Agi hin wi hawra duk suuna. Na may, vagi hurugi eŋe, an su kay duliyara.»