Boy Ma Ayra Ma JAŊ Ɓiirimma 15 - Boy Lonana

Yesu ni gugutlura gasira

¹ «Anni gugutlura gasira. Bun ni sa may ma horokoɗna.

² Koma egen ka vuɗɗi na, nam kaam kiyo. Nam carak kom ma hiŋŋa ki lay a nam dla gorgora vuɗ vuɗta jivira may.

³ Haɗta an haɗagira mbuɗugi ki teteɗ wa.

⁴ Lagi taɓi dew u anu ko an taɓi dew u agira na may. Ko gorgor gugutlura vaydaɗni ka vuɗ bay sokoɗ uɗɗi, ni na. Lini agi ka taɓi u anɗi ni, agi ka vuɗɗi.

⁵ «Anni gugutlura, agi ni gorgor kona. Sa ma taɓi egenna ni ma an taɓi u namma may. Nam hin vuɗ cocoo. Agi ndak ka a li va bay anɗi.

⁶ Sa ma ka taɓi u anɗi na, gam ha ki day. Ni ko gorgor gugutlura nam hin so kiyo. Gorgor gugutlura sooyra, yowoɗu, ŋgalaɗ ki kura.

⁷ Agi li laki hurunu ni, boy manna li hurugi may ni, joɓogi va ma agi minimma, agi hin famu.

⁸ Agi gola, geleɗta vi Bunda tak taɗ ki ni na, agi li vuɗ vuɗta jivira coco may ni, agi li takagi ana agi ni suu haɗi manna ni, agi tak ki ni geleɗta vi Bunda.

⁹ An minigi ko Bun mininda na, kakagi hu min manda.

¹⁰ Agi li vi u gaɗ manda ni, agi hin lakŋi hu min manda ko an may ni vi u gaɗta vi Bunda an kaki hu min mamba may.

¹¹ «An dagi boy namma na ni, a furi manda li u agiya, furi magira hin li u voɗoɗ may.

¹² Gologiya, ni gaɗ manda, minigi duk tagi ko an minigi wanda na.

¹³ Minda ŋgolla sana tak kira ni nam ɦal iiri mamba ki kay banayamma.

¹⁴ Lini agi li va ma an dagina na ni agi ni banayanna.

¹⁵ An ka yagi a suu sunda oloɗi, kay sa sunda ka wi va ma malamma lammaɗi. An yagi ana banayanna kayme an takagi tlege suu an fasi ay vi Buna ki bel.

¹⁶ Agi ŋgaɓan ka agiɗi, an ŋgaɓagi ni an ɗow. An cukugi ha ni ana agi tuɗ vuɗ vuɗta jivira ta ka daɓ kiɗira. Na ni, Bun hin ɦagi va ma agi hin joɓom u senna halaŋ.

¹⁷ Gaɗta an ɦagira ni ana minigi duk tagiya.»

Suuna noy Yesu ki u suu mamsina

¹⁸ «Suuna noyogi ki wa ni, agi wi kagi ana asi noyon ay ki jewe.

¹⁹ Agi li ni maŋ suu hu duliyarana ni, asi hin minigiya, kayme agi ki ni masisina. An ŋgaɓagi ay ni anu, ɓaɗagi ay ki ko suu hu duliyara na ni agi ka masi oloɗi. Ni kay ndaɗta, suu hu duliyarana noyogi ki, ni na.

²⁰ Gagi humugi kay va ma an dagina na, sa ma li sun ma su malamma kaɗi. Asi lasan wa ni, hin lasagi may. Asi vi u haɗ manda wa ni, hin vi u magira na may.

²¹ Asi hin lagi dla ndaɗta halaŋ egegiya kay senu, ni kayme asi ka wi sa ma sunun aynaɗi.

²² Lini an ka mba dasiɗi ni, asi ka wi coosiraɗi. Cecemmi, asi ka puruɗ ki ko ɓakŋaɗi.

²³ Sa ma li gonokka u anna, laɗ ni u Bun gaw may.

²⁴ Lini an ka li dlara bay sana laɗta dukusiɗi ni, asi ka wi coosiraɗi. Cecemmi, asi wi dlara an laɗta, asi lami gonokka ni an may, Bun may.

²⁵ Dla ndaɗta li na ni a faɗ ki ni vun boy ma di hu magaa masirana ana, Asi lan gonokka bay u dlara.

²⁶ «Sa may ma a njun ugina hin mbaya. Ni Musukka gasira col ay ko Bun Lonara. An hin sunugira ay u sem Bunu. Ndaɗ hin ɓakagi kanu.

²⁷ Agi lay ni, agi hin ɓakagi kan lay, kayme agi ay unni hu gijaŋŋa jew day.