Boy Ma Ayra Ma JAŊ Ɓiirimma 13 - Boy Lonana

Yesu mbus sem suu haɗi mamsina

¹ Hu buu namma ni jew luu ma Pakŋa. Yesu wi ana fat mayra nam hin suu hu duliyarana ka ta, tuɗ kolo eg Bum Lonara, ndakiya. Nam min suu mam suu hu duliyara cocoo. Nam minisi na gak gak tew ki u ndaɗta.

² Yesu u suu haɗi mamsina laki ti funa. Satanna ŋgaɓ Yudas goŋ Simon Iskariyotna a ɦal Yesu kiyo.

³ Yesu wi ki kam ana nam u tamba ay ni vi Lona, nam hin hoŋ ki egemu a Lona ɦam tlena halaŋ komu.

⁴ Nam kaki a ti funa, col kolo fok baraw mamma ki fokŋi, hin yow baraw ma saɗ tara, njunum hurumu.

⁵ Nam go yona kom hu ŋgotna go ni, gijaŋ mbus sem suu haɗi mamsina, saɗasi sesi ki u baraw ma njuni hurumma lay.

⁶ Nam tew kay Simon Piyer wanni, Simon dam ana, «Bu Suuna aŋ u taŋga a mbusun sen su?»

⁷ Yesu hoŋom dira ana, «Aŋ ka wi va ma an lam wannaɗi. Aŋ hin wam um dagan tuwa.»

⁸ Piyer dam ana, «An ka min ana aŋ mbusun senu naɗi.» Yesu hoŋom dira ana, «An mbusuŋ seŋ kaɗi ni, aŋ ka fi va konɗi.»

⁹ Simon Piyer ana, «Bu Suuna lini na ni, mbusun sen doy holɗi, mbusun kon u yan may halaŋ.»

¹⁰ Yesu dam ana, «Sa ki mbusina ka mbus mbussa daŋga oloɗi, hin ni sem hol kay tam halaŋ ki mbusiya. Agi tagi ki mbusiya ni ka agi halaŋgi.»

¹¹ (Yesu wi sa may ma hin gusum kina, kay ndaɗta nam di ana, «Ni ka agi halaŋgi, ni na.»)

¹² Yesu mbususi sesi ki mbus ni, cuk baraw mamma tamu kak a ti funa u asiya. Nam dasi ana, «Agi wi dlara an lagira wanda su?

¹³ Agi yan ana, Mala Haɗta, Bu Suuna, ni u voɗoɗu, ni an ɗaŋ may.

¹⁴ An li ni a Bu Suuna, Mala Haɗta may ni an mbusugi segiya, agi may ni hin mbusugi sem tagi duk ɦoŋogi na may.

¹⁵ An takagi ni ana agi hin li ko an li egegi wanda na.

¹⁶ An dagi ni gasagi ana sa li sunda ka ŋgol su malammaɗi, sa ay sunnina ka ŋgol su sa sunum aynaɗi.

¹⁷ Cecemmi agi wi kiyo, agi li dla ndaɗta na ni, hurugi hin furiya.

¹⁸ «An ɓak ha na ni, ka kagi halaŋgi, an wi suu an ŋgaɓasina. A ndaɗta may ni, a faɗ ki ni vun ɓiira dira ana, Sa ma tan fuuna na mbuɗ um kan lan yara.

¹⁹ Cecemmi, an dagi dla ndaɗta ha ki fok jew bay ndaɗ mbaa, dla ndaɗta mba wa ni, agi vi hurugi ana, Anu, an kaa.

²⁰ An dagi ha ni gasagi ana, Sa ma vi sa ma an sunum hana varam wa ni, van ni an may. Sa ma van varamma vi ni sa ma sunun ayna may.»

Yesu di ana Yudas hin gusum kiyo

²¹ Yesu di boy namma na di ni, ŋgusum jak kamu. Nam di ana, «An dagi ha ni gasira ana, Sa ma dew ka dukugiya hin ɦan ki maŋ suuna.»

²² Suu haɗi mamsina gijaŋ gol ii tasiya, ka wi sa ma nam ɓak kammaɗi.

²³ Duk suu haɗi mamsina, sa ma Yesu minimma kaki egem may.

²⁴ Simon Piyer keɗesemu ana nam joɓ Yesu nam ɓak na ni kay gege?

²⁵ Sa haɗi namma maɗ vunum ha eg Yesu hosokom ɗaŋŋi ana, «Bu Suuna ni gege?»

²⁶ Yesu hoŋom dira ana, «An dufun funa ay hu ŋgotta wa ni, sa ma an ɦamma na, ni namu.» Yesu buluk funa, doom do ni, ɦam maŋ Yudas, goŋ Simon Iskariyotna.

²⁷ Yudas vi fu namma na gaw ni, Satan kal hurum gaw. Yesu dam ana, «Va ma aŋ lamma, lam ki zak gaw.»

²⁸ Suu ti funa u asina ka hum u boy ma nam dam nammaɗi lay.

²⁹ Yudas sa ma gursu masira kolo komma, suu bolowna saa ana Yesu ɓakammi a nam tuɗ hal tlesuu li luuna kala, nam joɓommi a nam tuɗ ɦal tlena maŋ suu hawra kala.

³⁰ Yudas ti fu namma ki may ni, kal ki gaw. Ni lina njeŋgee.

Gaɗta wilira

³¹ Yudas kal ki kalni, Yesu di ana, «Cecemmi, geleɗta vi Goŋ Sanara hin tak kiyo, ta vi Lonara hin tak ki egem lay.

³² Lini geleɗta vi Lonara tak ki egem wa ni, Lona u tamba hin geleɗem olo. Nam hin laɗ ni zak.

³³ Goryonu, an hin a kak u agi ni ew ɦawaa. Agi halanu, an dagi ni va ma an dam maŋ suu Juifna na. Agi ka ndak a tuɗ hu li ma an tuɗ hunaɗi.

³⁴ An ɦagi gaɗta wilira ha ana, Minigi tagi duk tagiya. Minigi duk tagi ko an minigira na.

³⁵ Agi li minigi tagi duk tagiya ni, suuna halaŋ hin wi ana agi ni suu man suu haɗina.»

Yesu di ana Piyer hin tin vunum kamu

³⁶ Simon Piyer joɓom ana, «Aŋ tuɗ ni arage Bu Suuna?» Yesu hoŋom dira ana, «Hu li an tuɗ huna aŋ ndak ka a tuɗ hu cecem tuɗi. Aŋ hin tuɗ ha ni un dagan tuwa.»

³⁷ Piyer dam ana, «Bu Suuna, an ndak ka a tuɗ uŋ cecembi ni kay mege? An min a ba tan ki uŋu.»

³⁸ Yesu hoŋom dira ana, «Aŋ min a ba taŋ ki un gasagi su? An daŋ ha ni gasagi ana, jew golok tlekŋa a hella wanni, aŋ hin tin vunuŋ ki kan yaŋ hindi ana aŋ ka wanɗi.»