Boy Ma Ayra Ma JAŊ Ɓiirimma 12 - Boy Lonana

Mari vo mbul ma hisna kay sem Yesu

¹ Buuna hin karkiya a luu ma Pakŋa lira ni, Yesu tuɗ Betani hu li ma Lazar ka huna. Ni sa ma nam colom ay ki kolo iiri duk suu miɗina na.

² Hu li namma asi ɦam funa Marte sunusiya. Lazar duk suu kaki a ti funa u Yesuna.

³ Mari tli koloɓona koɗ u mbul ma hisna. Mbul ma his namma jiviya, gus way cocoo. Mbul namma lammi u nard. Ndaɗ voom kay sem Yesu, hin saɗam ki u tlimiɗ yaɗu. Huu goŋga oy ki u his mbul namma cocoo.

⁴ Sa maa dew duk suu haɗi suu vi Yesuna, yam ana Yudas Iskariyot, nammi sa hin a di kolokŋa kamma, di ana,

⁵ «Sa gus mbul namma ki gusni, hin ɓorowom ki maŋ suu hawraɗi ni amege? Mbul namma gus ki ni gursu ma kis kis hindina.»

⁶ Nam di boy namma na ni, ka ana hurum haɗ kay suu hawra naɗi, kayme nammi sa kulna, gursu masira li ŋgayra kolo ni komu.

⁷ Yesu di na ɗaŋŋi ana, «Hiniɗ na en. Hiniɗ ndaɗ gol u va ma ndaɗ lam egenna hu buu ma asi gan hu zulla na.

⁸ Suu hawra agi hin wasi ka egegi tew tew. An may ni hin ka li egegi tew tewɗi.»

Ŋgeŋŋa kay Lazar

⁹ Suuna moli coco wanni, suu Juifna hum ana Yesu ka Betani ni, asi tuɗ ha ni ka kay dla Yesu dewɗi, ni kay Lazar ma Yesu colom ki kolo iirina lay.

¹⁰ Muli suu li ɓivunna ŋgaɓ ana asi ci Lazar ki may.

¹¹ Kay boy namma wanni, suuna bolowo tuɗ ki eg Yesu, vi umu.

Yesu kal Yerusalem

¹² Buu ma ŋgoo daganna, suuna moli coco mbay a luu ma Pakŋa hum ana Yesu kal ay Yerusalem wa.

¹³ Asi ka hum manawra ha kosi ka ni, tuɗ ha ŋgafamu, sawalla kolo ana, «Geleɗeygi Lona, a Lona maɗ kom kay sa ma nam sunum ay u sem Bu Suuna na, a Lona maɗ kom kay mul ma Israelna.»

¹⁴ Yesu vi korona vi ni, ful kamu ko ɓiira dira na.

¹⁵ «Zi ma ŋgol ma Siyonna, Li ndaaɗi, gol mul maŋŋa ka mbaya nam kak kay goo korona.»

¹⁶ Suu haɗi mamsina ka hum u boy namma ki tuɗi. Hu mayra Yesu fi ŋgol mamba wa ni, asi humusi gasi ana ɓiira di ki fok jew ni kamu. Asi hin faɗ vun dla ndaɗta ki u namu.

¹⁷ Suu may suu ay u Yesu hu li namma nam yi Lazar ay ki hu zulla colom ki kolo iirina, njaɗ kay dla mayra asi waɗta.

¹⁸ Ni kay ndaɗta, suu molina ŋgafammi na kayme asi hum ana nam li dlara mbuɗta ndaɗta.

¹⁹ Suu Farisenna ɓak duk tasi ɗaŋŋi, ana, «Agi gola, aygi ka ndak a li va oloɗi. Suuna halaŋ koɗ ha ki ni kay ceremu.»

Suu Grek suu ɦiw hal Yesu

²⁰ Suu Grek suu ɦiw ka duk suu mbay Yerusalem a goɓ Lona falira luuna.

²¹ Asi ɦuɗ tasi ay eg Filip, nam ay ni Betsaida hu Galile, asi dam ana, «Bananna, ami min a gol Yesu.»

²² Filip gi tam ɓak Andre, asi jak tuɗ di Yesu.

²³ Yesu hoŋosi dira ana, «Fatɗa ndak wa ɗaŋ Goŋ Sanana hin fi geleɗ mamba.

²⁴ An dagi ha ni gasagi ana, lini ii wana tos ka kaŋgaɗi ni, nam ka cimbi, hin vaydegem dew. Nam cim wa ni, hin ne ii coco may.

²⁵ Sa ma min iiri mamba na, hin viɗiɗ kiyo, sa ma noy iiri mamba ki hu duliyara wandara ni, hin fi iiri mamba a fafatɗa.

²⁶ Sa li a lan sun manda ni sa namma tuɗ ay kay cerenu, na may ni, saan ma sunda hin tuɗ ni hu li ma an huna may. Bun hin geleɗ sa ma sununna.»

Yesu ɓak kay miɗ mamma

²⁷ «Cecemmi ŋgusun paɗ ki kan ɦay. An di ni dla me ologe? An hin di ana, Bunu, suɗun ki hu dlara mba kan hu faɗta wanda. Ni kay ndaɗta an mba ni a kak duk wihaw ndaɗta ɗaŋ may.

²⁸ Bunu, ɦal geleɗta maŋ seŋu.» Della hum ay kolo huulona ɓak ana, «An ɦam geleɗta ki wa da, an hin ɦamba wili olo.»

²⁹ Suu moli hu li namma na hum della ɓaka. Asi di ana, «Lona bay ni namu.» Suu hiŋŋa di ana, «Sa sunda huulona dew ɓakŋi namu.»

³⁰ Na ɗaŋŋi, Yesu dasi ana, «Del ndaɗta ɓak na ni ka manɗi, ɓakŋi magiya.

³¹ Cecemmi, suu hu duliyara wanda ii ɓak masina hin ka kiyo. Cecemmi mul ma hu duliyara hin a dik ki lay.

³² Anu, hu li ma asi colon ki kolo kay ndaŋgara wani, an hin mbaa suuna ki egenu.»

³³ U boy namma nam di ni ana dla miɗ mamma hin a li ni na.

³⁴ Suu molina hoŋom dira ana, «Ami haɗ hu magaa mamira gaɗta ana Sa Lona Fuurumma hin kak iiri ni na gak gak. Na ɗaŋŋi, aŋ hin di ana Goŋ Sana na hin col kolo kay ndaŋgara ni nanage? Goŋ Sa namma ni gege?»

³⁵ Yesu dasi ana, «Kiɗikka ka dukugi tuwa a kak ew ɗaŋ. Tuɗugi huruɗu a ndufunda fagiɗi. Li tagi jiviya, sana tuɗ hu ndufunna ni ka wi li ma nam tuɗ hunaɗi.

³⁶ Kiɗikka ka dukugi tu ni, tinigi hurugi kaɗu a agi mbuɗ ki goryoŋ kiɗikkana.» Yesu di boy namma na di ni, tuɗ ŋgay ha ki egesi na day.

Suu Juifna ka tin hurusi kay Yesuɗi

³⁷ Nam li dlara mbuɗta fokosi coco lay ni, asi ka tin hurusi kambi.

³⁸ A faɗ vun sa jok vun Lona Ezayi kira wanni, «Bu Suuna, sa vami boy mamina ni gege? Bu Suuna tak saɓak mamma ki maŋ gege?»

³⁹ Asi ndak ka tin hurusi kayambi, kayme Ezayi di olo ana,

⁴⁰ «Lona mbuɗusi irisi ki dugiya, nam mbuɗusi neesira ki kaŋga a irisi wiɗira, a humusi humbi lay, a asi hoŋ irisi ay egen a an suɗusi kiɗi lay.»

⁴¹ Ezayi di na ni kayra nam wi ŋgolla vi Yesura, nam ɓakŋi kamu.

⁴² Hu li namma, duk muli suu Juifna u tasi bolowo tin hurusi kay Yesu. Asi ka di ki koloɗi ni ko suu Farisenna a asi dikisi ki hu Zira Tokkaɗi.

⁴³ Asi min ŋgara vi suu warnara, su boy ma vi Lona na.

Boy ma vi Yesuna hin kaɓakŋa ni namu

⁴⁴ Yesu ɓak eŋga ana, «Sa ma tin hurum kanna tin hurum ka kan an doy holɗi, ni kay sa ma sunun ayna may.

⁴⁵ Sa wanna wi ni sa ma sunun ayna may.

⁴⁶ Anu, an mba hu duliyara ni ko kiɗikka na, a suu may suu tin hurusi kanna lak hu ndufundaɗi.

⁴⁷ Sa ma humun boy manna ka vi umbi na, an ka kaɓak mamma ni anɗi. An mba ni a suɗ suu hu duliyarana kiyo, ka a kaɓakŋa kay suunaɗi.

⁴⁸ Sa ma noyon ki ka van boy mannaɗi na, hin fi tlege suu kaɓak mamma na ni huwa. Haɗ manda hin kaam ɓakŋa hu buu ma do ŋgoo daganna, ni ndaɗu.

⁴⁹ An ɓak na ni, ka kay saɓak tanɗi. Bun ma sunun ayna ɦan voɗta u tamba kay va ma an dam hu haɗtana.

⁵⁰ An wi ana dira nam di ana li nara ni, iirira ka daɓ kiɗira ni huwa. Va ma an damma, di ni va ma Bun ɦanna voɗom ki na.»