Boy Ma Ayra Ma JAŊ Ɓiirimma 11 - Boy LonanaMiɗ ma Lazar miɗna 1 Sana sem ana Lazar, tuguɗira lamu. Nam hu zina yam ana Betani, ni zi ma Mari u wayaɗta Marte ka huna. 2 Mari ni ca mayra vo mbul ma hisna kay sem Yesura, hin saɗam ki u tlimiɗ yaɗta. Wayaɗna Lazar tam tammi namu. 3 Mari u wayaɗta gi sunda ha eg Yesu tuɗ dam ana, «Bu Suuna, banaŋŋa tam tamu.» 4 Yesu hum boy namma na ni, di ana, «Lazar ka miɗ ko tuguɗi ndaɗtaɗi. Tuguɗi ndaɗta a tak ki ni saɓak ma vi Lonna, a hin ɦal saɓakŋa maŋ Goŋ Lonna lay.» 5 Yesu min Marte u wayaɗta ni ko Lazar na lay. 6 Nam hum ana Lazar tam tamu ni, nam li buuna ay ki mba' bay tuɗ aya. 7 Nam hin di suu haɗi mamsina ana, «Hoŋoygi Yude.» 8 Suu mamsina ana, «Mala Haɗta, suu Juifna li halaŋ a caŋ kira may ni, aŋ ana hoŋoygi huwa ni nanage?» 9 Yesu hoŋosi dira ana, «Fatɗa day day ni li ler doogo yam mba' hin nikŋi tuɗi su? Sana li poy ni faaliya ni, guna ka daɓam sembi, kayme lina ki irim kiɗik kiɗik. 10 Sana li poy njeŋgee ni, guna daɓam semu kayme lina irim ndufunda.» 11 Yesu ɓak na ni, hin dasi ana, «Banaygina Lazar ha buuri senna, an tuɗ dliɗim ki koloo.» 12 Suu haɗina hoŋom dira ana, «Bu Suuna, lini nam ha senna lay ni, nam hin suɗ kiyo.» 13 Yesu min a dasi ana Lazar ha ni miɗiya. Doli ɗini, suu haɗina saa ni ana nam di ni kay sen ma gasina. 14 Yesu hin dasi ki ɗaŋŋi ana, «Lazar miɗ wa. 15 An hurun furi kagiya kay an tuɗ ka huɗira ni agi hin tin hurugi kanu. Tuɗuygi egemu.» 16 Na ɗaŋŋi, Tomas ma yam ana Ŋgoninana di maŋ suu haɗi suu hiŋŋa ana, «Tuɗuygiya, aygi tuɗ miɗiygi u nam may.» Yesu ni paɗta kolora u iirira 17 Yesu mba na ni, fi Lazar ki piya, li buuna ki hu zulla fiɗi. 18 Betani ni eg zi ma Yerusalemma ii kelew metrera va hindi. 19 Suu Juifna bolow cocoo mbay eg Mari u wayaɗta Marte a yoorosi kay wayasina. 20 Marte hum ana Yesu mba wa ni, ndaɗ tuɗ ha a ŋgafamu. Mari hin ka kaki vo may. 21 Marte di Yesu ana, «Bu Suuna aŋ li gin ni tani ni, wayanna ka miɗɗi. 22 An wi cecem lay ana va ma aŋ joɓ Lona kamma nam ndak a ɦaŋa.» 23 Yesu daɗ ana, «Wayakŋa hin hoŋ ay ki kolo iiriya.» 24 Marte hoŋom dira ana, «An wi ana nam hin hoŋ ay ki kolo iiriya, ni hu buu ma suu miɗina a paɗ ki kolo iirina, hu buu ma duliyara hin a daɓ ki na.» 25 Yesu daɗ ana, «An ni sa paɗ suuna ki kolo na lay, an ni iirira may. Sa ma tin hurum kanna, hin ka miɗɗi lay, hin kak iiriya. 26 Sa ma kak iirina tin hurum kanna hin ka miɗɗi. Ndak vi na su?» 27 Marte hoŋom dira ana, «Bu Suuna, hurun vi ana aŋŋi Sa Lona Fuurumma, Goŋ Lona, ma a mba hu duliyara tanina.» Yesu tiira 28 Vunusi ndi kaŋga ɓakŋa may ni, Marte tuɗ yi wayaɗta Mari ay gaw, daɗ ki ŋgayra ana, «Bu Suuna ka tani, nam ka yak ana ndak tuɗ haa.» 29 Mari hum na ni, col zak, gi taɗ ɓaɗta a tuɗ eg Yesu. 30 Ni Yesu ka bay tew ɦoŋzina tuwa, ha ni hu li ma Marte ŋgafam huna. 31 Suu Juifna suu laki eg Mari a yooroɗna wi na ni, sel ay ki bunsu zak, cuk tasi ha uɗu. Asi saa ana ndaɗ tuɗ ni kay ussa a tiina. 32 Mari tuɗ ha hu li ma Yesu coli huna, ndaɗ wam na ni, goɓ kaŋga fokomu dam ana, «Bu Suuna, lini aŋ ka tani ni, wayanna ka miɗɗi.» 33 Yesu waɗ ndaɗ tiira, suu Juifna suu mbay uɗna tii may, irim mbuɗ ɗussa, nam mbuɗ hahaw coco lay. 34 Nam joɓosi ana, «Agi pammi arage?» Asi ana, «Mbaya, Bu Suuna, ki wanni.» 35 Yesu tiira. 36 Suu Juifna di ɗaŋŋi ana, «Agi gola, nam minim cocoo.» 37 Suu ɦiw dukusiya di ana, «Nammi sa mal ii sa dugina ki na, ni nam ndak a doo Lazar ki bay miɗna mayɗi su?» Lazar paɗ ki kolo iiriya 38 Yesu hoŋ mbuɗ hahaw coco olo, tuɗ ha kay ussa. Ni zulla asi dukuɗ ɦinira funuɗu. 39 Yesu ana, «Lagaɗagi ɦinira kiyo.» Marte ta malaŋ maɗna hoŋom dira ana, «Bu Suuna, nam li ka mbuɗ hisna, nam piira hu zulla buuna ki ca ni fiɗi.» 40 Yesu hin daɗ ana, «An li dak ay ana, ndak li tin huruk kanu ni, ndak hin wi saɓak ma vi Lona tuwa naɗi su?» 41 Asi hin tli ɦinira kiyo. Yesu tli irim kolo huulona di ana, «Bunu, an gaŋ deɓpa kay va ma aŋ humunna. 42 An wi ana aŋ humun tew tew. An di va namma ha na ni kay suu ŋguy egen wanna ni a asi tin hurusi ana aŋ sunun ay ni aŋu.» 43 Yesu di boy namma na ni, bay delem eŋga ana, «Lazar, kal ay ki buruwa.» 44 Sa miɗina kal ay kiyo, sem u komu ki ɗagi u baktana, irim ki ɗagi u barawna lay. Yesu dasi ana, «Buɗugina kiyo, hinim nam tuɗa.» Ŋgeŋŋa kay Yesu ( Matiye 26.1-5 ; Mark 14.1-2 ; Luk 22.1-2 ) 45 Suu Juifna bolowo duk suu mbay eg Marina, wi dlara Yesu laɗta tin hurusi kamu. 46 Suu dukusi ɦiw tuɗ eg suu Farisenna, cuɗusi dlara Yesu laɗta. 47 Suu Farisenna u muli suu li ɓivunna tok suu ŋgolo suu kaɓakŋa egesiya, asi ɓak ana, «Ay laygi ana mege? Sana wanni li dlara mbuɗta cocoo. 48 Aygi li hinim nam li dla ndaɗta na gak gaki ni, suuna halaŋ hin tin hurusi ki ni kamu. Suu ŋgolo suu Romma hin hum na ni, hin dikiygi kiyo, hin tooygi Ziŋ Lonna maygira ki may, caygi njaf maygina ki may.» 49 Sa maa dew dukusiya yam ana Kaif li ay ni mul ŋgol ma li ɓivunna hu basa ndaɗta, dasi ana, «Agi ka wi va na dewɗi. 50 Agi ka wagi ana ni mariyaɗ magiya a sana dew miɗ kay suuna halaŋ, suuna halaŋ ba kiɗira ni jiviɗi su?» 51 (Nam di boy namma ni ka kay tambi, kay nammi mul ŋgol ma li ɓivunna hu basa ndaɗta na, nam jok ki ni vun Lona ana Yesu hin a miɗ ni kay suu Juifna halaŋ, 52 ka kay njaf namma doy holɗi, ni kay tok goryoŋ Lona suu ki njayna halaŋ eg tasiya.) 53 Ay hu buu namma gaw ni, suu Juifna ŋgaɓmi ana asi vi Yesu gaw, cam kiyo. 54 Ni kay ndaɗta, Yesu ka tuɗ tak tam ki ii suuna duk suuna oloɗi ni na. Nam tuɗ hu mbassa eg li paɗara, zi namma yam ana Efrayim, hu li namma nam kak u suu mamsina. 55 Ni Pakŋa, luu ma vi suu Juifna hin tok a lira. Suu hu mbassa daŋgana mbay ki jew hu Yerusalem a min tasi kay luu namma. 56 Asi hal Yesu. Asi hu Ziŋ Lonara ni, asi joɓ duk tasi ana, «Aygi saa kay boy namma ni ana mege? Nam a mba luuna ɗowba ka a mbaɗi su?» 57 muli suu li ɓivunna u suu Farisenna di ki ana lini sa wi li ma Yesu ka huna ni, mbay neesiya, asi a tuɗ a vamba. |
Bible Moussey © Bible Society of Chad, 2002.
Bible Society of Chad