Boy Ma Ayra Ma JAŊ Ɓiirimma 10 - Boy Lonana

Ndal boyna kay sa taa yoona u timigiina

¹ «An dagi ki ni gasira ana, Sa kal ha ka vun goŋga vi timigiinaɗi vekeɗ uɗ ha kaŋga na ɗowna ni sa kulna, ni u sa buu suuna voɗna.

² Sa ma kal ha vun goŋga ni sa ma taa timigiina.

³ Sa ma golosi usina, malasi vunna kiyo, asi timigiina humum delemu. Nam yi timigii mamsina u sesiya, hin cukusi ay ki buruwa.

⁴ Nam cukusi ay ki buruwa ni gi tam fokosiya asi hin tuɗ ha kay ceremu kay asi humum delemu.

⁵ Timigiina ka tuɗ u sa ma daŋgi. Asi hin liŋ kommi liŋi na ɗow kay asi ka wambi.»

⁶ Yesu tinisi ndal boy namma na ni, asi ka wi ana nam ɓakŋi kay megeraɗi.

Yesu ni sa ma taa yoona jivina

⁷ Yesu di ana, «An dagi ha ni gasira, anni vun goŋga vi timigiinara.

⁸ Suu mbay jewenna halaŋ timigiina hum ka usiɗi, kay asi ni suu kulna, u suu buu suuna voɗna.

⁹ An ni vun goŋga. Sa kal ha hurunna hin suɗ kiyo. Nam ndak a kal huwa, hin hoŋ kiyo, fi tina funum lay.

¹⁰ Sa kulna mba ni kay kulla, kay ci maɗna lay, ɓeŋ tlena ki lay. Anu, an mba ni kay suuna a fi iirira jivi ŋgolla.

¹¹ «Anni sa ma taa yoona jivina, sa ma taa yoona jivina ba iiri mamba ki kay timigii mamsina.

¹² Sa ma li sunda kay warakŋa, ni ka sa ma taa yoorina jivinaɗi, kay timigiina ni ka mamsinaɗi. Nam wi bosokona mbay wa ni nam pii gaw, hin bosokona njay timigiina kiyo.

¹³ Nam pii ni kayme nam li sunda ni kay warakŋa, timigiina ni ka mamsinaɗi, hurum ka haɗ kasiɗi ni na.

^14-15 An ni sa taa yoona jivina. Bun wan may, an wam may. Ni ko ndaɗta na, an wi timigii mansina asi wan may. An ba iiri manda ki kay timigii mansina.

¹⁶ Yoori man suu daŋŋa kaa, asi ka duk ndarayasina tuɗi. An tuɗ halasi aya. Asi hin humun delen na ni, asi hin taɓ ki a yoo ma dewna, sa ma taarasina li dew may.

¹⁷ «Bun minin ni kay an ɦal iiri manda kiyo hin hoŋ faɗ hu olo.

¹⁸ Sa ma tlan iiri manda ki kaɗi, an haɗ ni u min manda, an ndak a haɗ kiyo, hin ndak a faɗ olo. Ni dlara Bun dan ana an laɗura.»

¹⁹ Suu Juifna ɓorow irisi ki zeɗ zeɗ kay boy namma olo.

²⁰ Suu dukusi bolowo di ana, «Fulina ka kamu, nammi puluɗiya, agi humum boy mamma ni kay mege?»

²¹ Suu ɦiw di ana, «Sa Fulna kamma ɓakŋi na su? Fulna mal ii suu dugina ki su?»

Suu Juifna noy Yesu kiyo

²² Asi li luuna kay Ziŋ Lonara hu Yerusalem. Hu buu namma ni til semeɗna.

²³ Yesu poy hu Ziŋ Lonara u mbutluɓma vi Salomonna.

²⁴ Suu Juifna tok tasi ay eg Yesu, dam ana, «Aŋ hin gami ii dlaaŋga ki ni saɓa tu ge? Lini aŋŋi Sa Lona Fuurumma ni, dami ay ki gawɗi su?»

²⁵ Yesu hoŋosi dira ana, «An dagi ki da, agi ka van boy mannaɗi. Sunda an laɗ u sem Bunda dagi ni kay dlaanda.

²⁶ Agi ka van boy mannaɗi, ni kay agi ka timigii mansinaɗira.

²⁷ Timigii mansina humun delenu. An wasiya, asi tuɗ un may.

²⁸ An ɦasi iirira ka daɓ kiɗira, asi ka miɗ oloɗi lay. Sa ma ɓaɗansina ki kon kaɗi lay.

²⁹ Va Bun ɦanna konna ŋgol su tlena halaŋ. Sa ndak a ɓaɗ va ki ko Bunɗi.

³⁰ Bun may, an may, ami ni dew.»

³¹ Suu Juifna yow gogoyra kosi a gikimba olo.

³² Yesu dasi daŋŋi ana, «An li sunda jivira coco fokogi u saɓak ma vi Bunna. U sunda ndaɗta, va ma agi a can ki u gogoyra kamma ni maanage?»

³³ Suu Juifna dam ana, «Ami ka caŋ ki ni kay sunda jiviraɗi, ni kay aŋ ŋgul Lona aŋŋi sana ɦawaa, aŋ ŋga taŋ u Lona.»

³⁴ Yesu hoŋosi dira ana, «Ki ɓiiri hu gaɗ magira ana, Lona di anaba, Agi loogina.

³⁵ Aygi wi ki ana sa ndak ka a bulum va ma ki ɓiirina kiɗi. Suu Lona dasi ana, Agi loogina, ni suu nam ɓakasina, ni asiya.

³⁶ Anu, Lona mananu, sunun ay hu duliyara. Agi hin di ana an ŋgul Lona ni nanage? Kay an di ana an ni Goŋ Lonna su?

³⁷ Lini an ka li sunda vi Bundaɗi ni, agi van boy mannaɗi.

³⁸ Lini an laɗu ni, agi ka mininɗi lay ni, vagi u sunda an laɗta a agi wi ki anaba an ka ni hu Buna, Bun ka ni hurun may.»

³⁹ Asi hal Yesu a vamba olo. Nam pii ki irisi gaw.

⁴⁰ Yesu tuɗ ha ki ŋgoo lumma Yurdanna olo a tuɗ kak hu li ma Jaŋ mbus batemma ay huna.

⁴¹ Suuna mbay egem bolowo. Asi di ana, «Jaŋ li dlara mbuɗta kaɗi, dlara nam daɗ kay sana wanda ni gasira.»

⁴² Ay hu buu namma wanni, suuna vi u Yesu bolowo.