Boy Ma Ayra Ma JAŊ Ɓiirimma 1 - Boy Lonana

Boyna mbuɗ ki sana

¹ Hu jewra tin ayra ni Boyna kaa. Boyna ay ni eg Lona, Boyna ni Lona.

² Boyna ay fok jew ni eg Lona.

³ Lona li tlen halaŋŋi u Boy mamma. Duk tlesuu nam lasina halaŋ va ma bay nam lam u Boy namma kaɗi.

⁴ Iirira col ay ni hu Boy namma, iirira ɦal kiɗikka maŋ suuna.

⁵ Kiɗikka weleɗ duk ndufunda, ndufunda ndak ka a tew egeɗɗi.

⁶ San dew sunum ay ni Lona sem ana Jaŋ.

⁷ Nam mbay ni a sa vovoɗta, ɓak ki kay kiɗikka. Nam mbay ni a suuna halaŋ vi u dlaam ndaɗta.

⁸ Nammi ka kiɗikkaɗi, nammi sa vovoɗta vi kiɗikka.

⁹ Boy namma ni kiɗikka gasira, mbay hu duliyara a li kiɗikka kay suuna bel.

¹⁰ Boyna ay hu duliyara, Lona li tlena halaŋŋi u boy namma. Boy namma suu hu duliyara wam ka ana ni namuraɗi.

¹¹ Nam mbay duk suu mamsina asi vam kaɗi.

¹² Suu ɦiw vi umu, tin hurusi kamu, nam ɦasi saɓakŋa a asi ndak mbuɗ ki goryoŋ Lonna.

¹³ Asi vuɗ ka ko suu warna vuɗ gorra naɗi, col ay ka eg saɗi lay ka u minda fi sa njufnaɗi lay, Lona vuɗusi ni namu.

¹⁴ Boyna mbuɗ ki sana, kak dukuygiya, nam ka u oora u gasira coco may. Nammi goo ma dew ma ami wam bibiŋil mamba col ay vi Bumba.

¹⁵ Jaŋ ma mbus batemma ɓak ki kam ana ni sa ma an dagi kam ana nam ka tuɗ ay ŋgoron dagani na, nam ki suy kanu, kayme nam ay ki fokon jew day.

¹⁶ Aygi halaŋ fi tlesuu col ay komma ni u ɦiz mamba oora ha ŋgoo dagan na gak gak olo.

¹⁷ Lona ɦaygi gaɗ mamba ay ni ko Moiz. Oora u gasira col ay ni hu Yesu Kristu may.

¹⁸ Sa wi Lona kaɗi, gorom ma dew ma ka eg Bumma, nammi Lona may, takayna ki ni namu.

Vun sunda vi Jaŋ ma mbus batemma

¹⁹ Gola ni dikira vi Jaŋ ma mbus batemma hu li ma suu Juif suu Yerusalemma sun suu li ɓivunna, u suu Levina ay egemu joɓom ana, «Aŋŋi gege?»

²⁰ Nam tin vunum kaɗi, dasi ki jivi ana, «An ni ka Sa Lona Fuurummaɗi.»

²¹ Asi hoŋom joɓpa ana, «Aŋŋi geɗaŋ ge? Aŋŋi Eli su?» Jaŋ dasi ana, «Ҥawaa, an ka nambi.» «Aŋŋi sa jok vun Lona su?» Nam hoŋosi dira ana, «Ҥawaa.»

²² Asi hin dam ana, «Aŋŋi geɗaŋ ge? Aŋ hoŋomi dira aya, suu sunumi ayna ami hin dasi ki mayɗi su? Aŋ di kay taŋga ni ana mege?»

²³ Jaŋ dasi ana, «An ni del sa ma sawalla ki ŋgoo bagi ana, Ɗoɓogi voɗta vi Bu Suunara kiyo,» ko sa jok vun Lona Ezayi di fok jewra na.

²⁴ Suu sunusi ay eg Jaŋŋa ni suu Farisenna.

²⁵ Asi joɓom ana, «Aŋ di ana, aŋ ka Sa Lona Fuurummaɗi may, ka Eliɗi may, ka sa jok vun Lonaɗi lay ni, aŋ mbus batemma ni kay mege?»

²⁶ Jaŋ dasi ana, «An mbusugi batemma ni u yona, dukugi ni sa maa dew agi ka wambi,

²⁷ nam mbay ni ŋgoron dagani, an ndak ka a mbuɗum zew tuɓuru ma semma kiɗi.»

²⁸ Dla ndaɗta li ni Betani fun mbo lumma Yurdan, ni hu li Jaŋ ma mbus batemma mbus suuna huna.

Yesu Goo Timiina vi Lona

²⁹ Faɗta vinda wanni, Jaŋ wi Yesu mbay egemu, nam di ana, «Gola ni Goo Timiina vi Lona ma daɓ cora vi suuna kina.

³⁰ Ni sa an ɓakagi kam ana nam ka tuɗ ay ŋgoron dagani, nam ki suy kanu, kayme nam ay ki ni fokon jew day.

³¹ An wam ay ka fok jewɗi. An mba ni a mbus suuna u yona, a takam ki maŋ suu Israelna a asi wam may.»

³² Jaŋ di olo ana, «An wi Musuk Lonara ko gugukka na sii ay kolo huulona kak kamu.

³³ Fok jew ni an ka wam ana ni sa hiŋŋa naɗi. Sa ma sunun ay ana an mbus batemma u yonana dan ana, Sa aŋ hin wam Musuk Lonara sii ay kamma hin mbusugi batemma u Musuk Lonara.»

³⁴ Jaŋ di ana, «An wi dla ndaɗta, nammi Goŋ Lonna.»

Suu haɗi suu vi Yesu suu fok jewna

³⁵ Faɗta vinda wanni Jaŋ ay hu li namma olo u suu haɗi mamma mba'.

³⁶ Nam wi Yesu jak tuɗta na ni, Jaŋ di ana, «Gola ni Goo Timiina vi Lona.»

³⁷ Suu haɗi suu vi Jaŋ suu mbana hum na ni, cuk tasi u Yesu gaw.

³⁸ Yesu pereɗ irim, wasi asi tuɗ um na ni, dasi ana, «Agi hal mege?» Asi dam ana, «Rabbi (ni ana, Mala Haɗta), aŋ kaki ni arage?»

³⁹ Nam dasi ana, «Mbaagi aya, agi hin wiya.» Asi hin tuɗa, wi lii nam kaki huna. Asi kak u nam hu buu namma. Ni faɗta ndak a boyogina col fun zuzura.

⁴⁰ Suu haɗina mba' suu hum boy ma vi Jaŋŋa tuɗ kay cee Yesuna, dukusi dew ni Andre wayaŋ Simon Piyerna.

⁴¹ Andre ŋgaf u wayamma Simon fok jew, dam ana, «Ami fi Sa Lona Fuurumma ha wa, ni ana Kristu.»

⁴² Andre tin Simon eg Yesu, Yesu golomu di ana, «Aŋŋi Simon, goŋ Jaŋŋa, seŋ mbuɗ ki ana Kefas (ni ana Ҥinira).»

Yesu yi Filip u Natanael

⁴³ Vin ɗaŋi, Yesu a tuɗ Galilera wanni, nam fi Filip, dam ana, «Tuɗ ay unu.»

⁴⁴ Filip ni sa Betsaidana, ni hu zi ma vi Andre u Piyerna.

⁴⁵ Ŋgoo daganda Filip ŋgaf u Natanael dam ana, «Sa Moiz u suu jok vun Lona di kamma ami fam wa. Ni Yesu goŋ Yosef ma Nazaretna.»

⁴⁶ Natanael dam ana, «Va ma jivina col ay ki Nazaret na ɗow su?» Filip dam ana, «Mbay gola.»

⁴⁷ Yesu wi Natanael mbay egem na ni, nam di kam ana, «Gola ni sa Israel ma gasina ma mbambara ka hurumbina.»

⁴⁸ Natanael joɓom ana, «Aŋ wan ay ni arage?» Yesu hoŋom dira ana, «An waŋŋi kaki u ŋgus tulumma bay Filip yaŋ tuwa.»

⁴⁹ Natanael dam ana, «Mala Haɗta, aŋŋi Goŋ Lonna, Mulna vi suu Israelna.»

⁵⁰ Yesu hoŋom dira ana, «Aŋ tin huruŋ kan ni kayra an daŋ ana, an waŋ ay u ŋgus tulummara. Aŋ hin wi dlara jivira ŋgol sura wanda.»

⁵¹ Nam di olo ana, «An dagi ni gasira, agi hin wi huulona ki maliya, agi hin wi suu sunda huulona tuɗ koloo, hoŋ ay kaŋga kay Goŋ Sanna.»