JEREMI 9 - Boy Lonana

Kaboyna mbuɗ ki hu lina halaŋ halaŋ

¹ Li ni li ma buu ka gin kan hu fulla duk suu tuɗ koyra ni, an hin suu mansina ki huwa. Asi halaŋŋi suu li zoŋga, suu dlasi cona.

² Sinisi ni ko ndal gu mbuurura ganira na. Sunda asi laɗ hu mbassara ni kaboyna, ka gasiraɗi. Asi li dla cora kay taɗ na gak gak. May an wanni asi ka wanɗi. Yawe di na.

³ Kakagi jejegee, gegelay ko tam u ndaram ma poy u namma. Ganagi yam tagi u sa wayagi ma dewɗi lay. Kay ana wayagi managelay juɓ mi a li dla cora. Sa poy u tagi managelay min hummi dla cora.

⁴ Gegelay ganyam ndaram ma poy u tasina, boy ma gasina ka oloɗi. Asi haɗ sinisi ki u dlara kaboyna. U ganyam masira asi ka ndak hoŋ ay oloɗi.

⁵ Dlara yara ha kay taɗu. Ganyamba ha kay taɗu. Asi ka min a wanɗi. Yawe di na.

⁶ Na ɗaŋŋi Yawe, ma Saɓakŋa Kom Belna, ɓak anaba. An hin yoorosi kiyo, hin saa kasiya. Aa, an a kaɓakŋa ni kay dla cora vi suu mansinara.

⁷ Sinisi ni ko ndal sin mbuurura ci maɗna na. Asi ɓakŋi dlara ganyamba. U vunusi asi ɦal heɓpa maŋ suu poy u asina, na may hurusi kurufu ni asi minisi ni dawna kaŋga fokosi gunda.

⁸ Ni an ka ndak a lasi dla cora egesiɗi su? Yawe di na. Ni an ka ndak a sa sugulun u suu ko asi nanaɗi su?

Hum dlara ɓeŋ mbassa ki kaɗta

⁹ Ay kolo kay ɦinira tii ma hahawra kaa. Ay hu li ma taa yoorina soolla yoo tara kaa. Kay ana asi ki ŋgaliya, sa dew lay ka jak huɗi, yoorina sa ka humusi delesiɗi lay. Yoorina, layagina halaŋ ŋgay kiyo, va hin ka oloɗi.

¹⁰ An mbuɗ Yerusalem ki a gogoyra moli kay taɗta, li ma bayakka moli huna, ɦoŋzi ma Yudana ki li ma hahawra. Suu huna casi kiyo.

¹¹ Lini sana wi yali ni, nam huma, ɓak dlara vun Bu Suuna dambara kiyo. Ni kay me mbassa ɓeŋeɗ ki nige? Ŋgalaɗ ki ko fulla sa ka jak huɗira na nige?

¹² Yawe di ana, asi hinin haɗ manda an tinisira fokosira kiyo, hin dlara humun delen a tuɗ unda kiyo.

¹³ Asi miɗ ki ni kay suu vunna u yasira eŋga, viɗ tasi ki u Baal ma somoyosi haɗasi ki u namma.

¹⁴ Na ɗaŋŋi Yawe, ma Saɓakŋa Kom Belna, Lona vi suu Israelna, ɓak anaba, an hin ɦasi beɗeera kasiya, ɦasi yo ma ci suuna asi camu.

¹⁵ An hin njayasi ki duk njaf suu asi tasira lay. Somoyosi lay wasi kaɗina an hin gasi ŋgewra kay ceeresi naa su ta ta daɓasi ki cira tuwa.

Soolla tii maɗna

¹⁶ Na ɗaŋŋi Yawe, ma Saɓakŋa Kom Belna, ɓak anaba, jokogi tagiya, mbaagi boyogi suu tiina aya. Yagi boyogi suu wi yal tiina ɦayna asi mbaya.

¹⁷ Asi mbay zak zak gi soolla kamiya ko irimi cuk ki simina, ko bak irimi laɓ ki u simina.

¹⁸ Ay hu Siyon day ni asi hum della gi soolla. «Aa, ami ki ciiya, zolona cami coco lay. Ami ndak noy mbassa, asi toomi ziimi ki kaŋga wa.»

¹⁹ Boyogina humugi boy ma vi Lonana haa. Ko humugi hum boy ma funumma haa. Haɗagi soolla maŋ gorɓii magisina, yootara maŋ ndarayagina.

²⁰ Kay ana maɗna ka ɗiŋ ay kolo ii zi maygira, nam ka kal ay hu ziiygi ma jivina, nam mbay ŋgaɗ gorkemba ki hu voɗta, gorzoŋŋina hu lina may.

²¹ Ɓak haa, gola ni boy ma Yawe damma, maɗ suuna cuk kaŋga ko ndal zozoɗta cukuɗ ki hu senenara na. Ko ndal kaya wana suu feɗemma cukuɗ ki ŋgoorosi, sa ka yowoɗ oloɗira na.

Yal ma gasinna ni wira wi Bu Suunara

²² Na ɗaŋŋi Yawe ɓak anaba, ko sa yalna ŋga tam kay yal mammaɗi, ko sa saɓakŋa ŋga tam kay saɓak mammaɗi. Ko sa begera kom ɦayna ŋga tam kay bege mambaɗi.

²³ Lini sa min a ŋga tamu ni nam ŋga tammi u dlara wanda, ko nam li yal coco a wanda, an, Yawe, ma taɓ suuna eg tasina, ma jivina u ma ɗegeena kay ndaŋgara. Gasi dla ndaɗta ni hurun vaɗu, Yawe di na.

Kay suu di u vunusi ana asi ɦal hurusi kiyona

²⁴ Buuna ka mbaa, Yawe ɓak na, ma an hin kaɓakŋa kay suu caw ɗiwisi ki may, ɦal tasi ni hu tliwisi ɦawana,

²⁵ kay Egipte, kay Yuda, kay Edom, kay suu Amonna, kay Moab, kay suu vogosi ki koori suu hu fullana. Kay ana njaf suuna halaŋŋi hurusi ka ki mbuɗiɗi, suu Israelna lay ni hurusi ka ki mbuɗiɗi.