JEREMI 8 - Boy Lonana

¹ Hu li namma ni, Yawe di ana, hin yow ay ki kolo hu zulusi ni sok mulina u suu ŋgolo suu Yudana, sok muli suu li ɓivunna u suu jok vun Lona, sok suu Yerusalemma lay.

² Hin warasi ki i faɗta, i tilna maŋ suu duu suu huulonana suu asi minisina, sunusina, tuɗ usina, joɓosi layna, suu asi goɓ kaŋga fokosi layna. Sok namma taram taa ni tosom kaŋgaɗi, nam hin hinni a zozot ta cim ndaŋgara.

³ Suu hinna halaŋ, suu hin iiri hu njaf suu co asina, hin min maɗna ŋgolla su iirira, suu hin hin iiri hu li ma an njayasi ki huna halaŋ. Yawe, ma Saɓakŋa Kom Belna, di na.

Saara bay uɗta

⁴ Aŋ hin dasiya, Yawe ɓak anaba, sa puk kaŋgana hin ka col koloɗi su? Sa viɗ kina hin ka hoŋ balamambi su?

⁵ Ni kay me na ɗaŋ ge, suu Yerusalem agina, viɗ tagi ki ŋgolla cocora u dla cora laɗta na ni kay mege? Asi vi vunusi eŋga kay saa masira bay uɗta, asi ka min a hoŋ ayɗi.

⁶ An humusi dlasira ki jiviya, dlara asi laɗta uɗ kaɗi. Sa dew lay ka hin coomba kiɗi, di ana, «An li ni me ɗowge?» Gegelay tin irim ki ni hu li ma nam minimma, ko ndal kulumina fun duunara na.

⁷ Ko zilimma kolo duk semeɗna lay ni wi li ma nam tuɗ koyra hurumma, gugukka, dlemerekka u dawana ka maa ki kay li ma asi hoŋ ay vonaɗi. Na may suu mansina ka saa kay gaɗta Bu Suuna tiniɗtaɗi.

Suu wi ɓiira pereɗ yam gaɗta vi Bu Suunara ki kaŋgaa

⁸ Agi hin ndak di ana, «Ami yal cocoo kay ana gaɗta vi Bu Suunara ka ni duk komiya» nige? Gasi may ni ndaɗ mbuɗ ki ni gaɗta cora u dlara suu co suu ɓii magaara laɗta.

⁹ Suu wi dlara viɗ ki lay. Asi bulum ki lay. Asi ki yowi daŋgayna lay. Asi noy boy ma vi Yawena kiyo. Na ɗaŋŋi va asi hin di ana asi yal cocoo u namma ni mege?

Suu ka saa ana dlara halaŋ ka tuɗ jiviyana

¹⁰ Na ɗaŋ an ɦasi boyogosi ki maŋ suu daŋŋa. Sene masina an hin ɦam ki maŋ suu yowom kina. Kay ana kemba u suu ŋgolona halaŋ min saɓakŋi begera, suu jok vun Lona u muli suu li ɓivunna halaŋ tuɗ masira ki coo.

¹¹ Asi li jivi zak a gi ii dla cora kay suu mansinara di ana, «Dla kaɗi, dla kaɗi.» Na may ni dlara jivi kaɗi.

¹² Asi ki viɗiya kay ana asi li dla cora ɦay, may asi ka mbuɗ zoloɗi, asi ka saa kay hahaw masiraɗi. Na ɗaŋŋi asi hin puk ki kaŋga ko suu hiŋŋa na. Hu buu ma kaɓakŋa ni asi hin ka fi sesi ma collaɗi. Yawe di na.

Juɓpa zolona

¹³ An hurun ki tinira a daɓasi ki cira. Yawe di na. Gugutlura ka vuɗ oloɗi, tulumma ka vuɗ oloɗi, humum yak kiyo. An ɦasi ki maŋ suu hin tli voɗta ay kasina.

¹⁴ Ni kay me aygi kakaygi na en ka mbusuguygiɗi may nige? Tokogi tagiya. Kalaygi hu li ma saɓakŋa mbusuguygi oloɗi. Kay ana Yawe, Looygina, doroygi ki ana aygi mbusukgi nam ɦaygi yo ma co ma ci suuna a cira. Gasi, aygi ki suluk fok Yawe.

¹⁵ Ami juɓummi ni tara fanira, may va jivi kaɗi. Aygi juɓuygi li ma aygi garaɗ ki wa ni, ndaana hin mbay ni namu.

¹⁶ Ay hu Dan day ni asi hum semeɗ ma u sem kulumi mamsinana. Bayra asi bayra ndaŋgara dlaka. Asi mbay ni a ɓeŋ ndaŋgara ki u tlesuu kaɗna, ɦoŋzina u suu hurumma.

¹⁷ An cukugi guygina kagi wa. Guy magira yara. Sa ka luu u ndaɗɗi. Yawe di na.

Hahawra vi Jeremira

¹⁸ Yaanda sa ka faɗ kumu kaɗɗi. Mbalatan halaŋ ki mbuɗi yaa.

¹⁹ Asi hum yira ndaana suu mansina yaɗ ay hu ndaŋgara dayra. Yawe ay ka hu Siyonɗi su? Mul mamma ay ka huɗi su? «Ni kay me asi lan dla cora egen u fuli masisina nige, u dla mayra bay uɗta col ay hu lii daŋŋarage?»

²⁰ Feɗ tlena daɓ ki wa, vun semeɗna kal ki wa. Aygi may ni suɗta ka kaygiɗi tu gak.

²¹ Kay dla cora suu mansina laɗta an ki ciya. An ki mbuɗi zolona, hahawra van wa.

²² Kumu ma saɗam kay tuguɗira ay ka hu Galaadɗi su? Doktor ay ka huɗi lay su? Ni kay me asi wi mbil ma vi suu mansinana ay ka a cilim kiɗi ge?

²³ Sa hin mbuɗun yan ki a goloŋ ma suuna ci yona hurumma ni gege? Hin mbuɗun irin ki a voɗ yoo sina na ni gege? A hin tii kay maɗ suu mansina njeŋge lay, faali lay ni ge?