JEREMI 6 - Boy Lonana

Dla cora ŋgolla ka juɓ Yerusalemba

¹ Hinigi Yerusalem suu vi Benjaminna, halagi lii daŋŋa kagi a ŋgayra. Buugi tokolomma hu Tekoa, hu Bet-Kerem, takagi dlara, ay ii ko ma mbayawna na ɗow, hahawra ka mbaya, ni dla cora ŋgolla.

² Ndak Siyon ta jivira, ta jivi ɦayra vunuk seŋ kaŋga wa.

³ Suu taa yoorina mbay u yoori masisina ni egeku. Egek ndaku, asi ŋguy mbutluɓ masina ki vira kak na cutl, gegelay taa yoori mamsina ni hu liimma.

⁴ Ɓakagi dla duu ma vi Lonana egeɗu. Cologi koloo, gagijaŋ duuna ay ii ko ma mbayawna na ɗow. Aygi suu hahawra buuna mba kaygi wa, fiɗigira mbuɗ fiyekka.

⁵ Coloygi kolo, gaygijaŋ duuna duk ŋgikka, tooygi ziisi ma jivina kiyo.

Gi hum mayra ŋgolla

⁶ Yawe, ma Saɓakŋa Kom Belna, ɓak anaba, kaagi ŋgusugina, minigi voɗta kay Yerusalem, ni ɦoŋzi ma ɦam kina. Hu ɦoŋzi namma halaŋ halaŋŋi dlara yara.

⁷ Ko ndal doyra vi yona kolo huruɗta na ni ndaɗ ndak a ŋgay dla cooɗta huruɗu. Vo varaɗ ni ɓakŋi dlara saɓakŋa u ɦurumba. Ko ndaɗta na ni wihawra u yootara irin wasi na ni mbuɗ hahawra.

⁸ Vi gaɗta kaku, Yerusalem. Lini ka naɗi, an ho dugun ki u ndak wa, an mbuɗuk ki hahawra, mbuɗuk ki ni ko ndaŋgara sa ka kak kaɗɗira na.

Suu ka min a humbina

⁹ Yawe, ma Saɓakŋa Kom Belna, ɓak anaba, cil ɦele suu Israel suu hinna ki na kekeɗ ko cil ɦele gugutlura kira na, dogosi cilla ko ndal suu to wana dogom siirara na.

¹⁰ Sa hin humun boy manna u gaɗ mandana ni gege? Ҥii, humusi ki ŋgeliya, asi ka ndak a hum dlaɗi. Asi gol boyna vi Yawe ni ko ndal ŋgulla na, asi ka minimbi.

¹¹ «An ki u yara vi Yawera hurun oy cocoo. An ka ndak a ɦeɓeɗ duk oloɗi.» Hin ya ndaɗta li kemba hu ɦoŋzina, kay gorzoŋŋi suu irisi kaay ko tasina. Njufiina u boyogina yowosi ki wa, sa maana u sa buu mamma ki ŋgol cocona.

¹² Ziisina ɦam ki maŋ suu hiŋŋa, sene masina u boyogosi lay. An maɗ kon ha kay suu hu mbassana wa. Yawe di na.

¹³ Asi halaŋ, kemba u suu ŋgolona gegelay hal ni li ma nam fi huna. Asi halaŋ, suu jok vun Lona u muli suu li ɓivunna tuɗ masira ki coo.

¹⁴ Asi li jivi toŋgo zak a doo kay dla cora vi suu mannara di ana, «Dlara ka jiviya, dlara ka jiviya.» Doli wanna va ka li dewɗi.

¹⁵ Asi ki viɗiya kay ana asi li dla cora. Na may asi ka min wi dla coosiraɗi. Asi ka saa kay dlara mbuɗusi ki zolonaraɗi. Na ɗaŋŋi asi hin puk ki kaŋga ko suu hiŋŋa na. Asi hin daɓ pukka kaŋga hu li ma an hin kaasi ɓakŋa kasina. Yawe di na.

¹⁶ Yawe ɓak anaba, Cologi hu voɗta na jol a halagi lina. Joɓogi kay voɗta suu jewna tlaɗta, voɗta heɓpa huruɗta ni tarage, agi hin tlaɗu. Agi hin fi li ma agi kak u heɓpana. May ni asi di ana, «Ami ka tuɗ huruɗɗi.»

¹⁷ An tin suuna a gologiya. Ko kaki jekjeke a hum del tokolomma. Na may ni asi di ana, «Ami ka gol tami jiviɗi.»

¹⁸ Na ɗaŋŋi agi suuna humugi haa, agi suu molina wagi dlara hin li kagira.

¹⁹ Ndaŋgara hum haa, an hin mba dlara hahawra ay kay suuna, ni vuɗ dlaasira cora. Asi ka gol tasi jivi kay dlaandaɗi. Gaɗ manda asi ka li uɗɗi lay.

²⁰ Va an a lam u mbul ma his jivi ma yowom ay Sabana ni mege, u cerew ma gol jivi ma yowom ay hu mbassa dayrana ge? An ka minigi ɓivun magi ma agi ŋgalangina kinaɗi, ɓivun ma agi langinana ka irin jiviɗi.

²¹ Na may ɗaŋŋi Yawe ɓak anaba, an tin dlara vi yamba fok suu asina. Asi hin puk kaŋga u dla ndaɗta. Gorra u somoyosi lay halaŋ. Suu vok zina u asina, suu ndaryasina lay hin miɗ kiyo.

Sa ci suuna ay ka voɗo

²² Yawe ɓak anaba, suuna mbay hu mbassa ii ko ma mbayawna na. Suuna ŋgolo yow ay kolo u keŋ ndaŋgara ma daɓ ayna.

²³ Asi yow gu mbuurura u saɓina kosiya. Asi suluk cocoo, ka wi hahaw saɗi. Vun ma asi lamma ni ko ndal mbo lumma ŋgolna soora na. Asi fuli kolo kay kulumina, asi njaari fun tasi ko ndal suuna njaa a duuna u ndak Siyon, ta jivira na.

²⁴ Ami hum boyna. Saarami jak kiyo. Ami mbuɗ ki ndaa coco lay. Tiitara ko ndal cara yoo taɗ hu li ma ndaɗ hal a vuɗta na.

²⁵ Kal ki ŋgoo bagiɗi. Kal ki hu voɗtaɗi, kay ana ŋgew ma vi sa babalinana ka ki hu lina bel a ci suuna.

²⁶ Agi suu mansina, cukugi baraw bolla egegiya. Bulumugi tagi kaŋga duk buɗna. Ko ndal maɗ goo ma dewna na lagi doona, yoorogi tagiya. Kay ana kak njokŋi sa ci suuna hin mba kaygiya.

Suu ci suuna suu dlasi cona

²⁷ Vo vi suu mansina an tlaŋŋi a sa tuk kawina. Aŋ hin golosi ki jiviya, ɓak ki kay tuɗ masira.

²⁸ Asi halaŋŋi suu ci suuna suu dlasi cona, li dla cora ɦay lay. Walakka u kawina, asi halaŋŋi suu ci suuna.

²⁹ Vugumma ka buwa, kura law tusuna kiyo. Na may asi yoo tusuna kiyo, ɦoŋom ki yoora olo ni a wassa. Tlege suu cona ka paɗ kiɗi.

³⁰ Asi yasi ana, «kawi ma suuna ka minimbina,» kay ana Bu Suuna ka minisiɗi.