JEREMI 52 - Boy Lonana

BOY MA DAƁ DAGANNA Suu Babilonna tli Yerusalem

¹ Sedesiyas basaɗam tew ki dok mba' yam dew hu li ma nam mbuɗ mulnana. Nam ti mulla basara doogo yam dew hu Yerusalem. Sem sum ana Hamutal, goŋ Irmaya ma Libna na.

² Nam li dlara Yawe ka miniɗɗira, ko Joakim lira na may.

³ Dlara li hu Yerusalem u Yudara mbuɗ huu Yawe ki yara a nam dikisi ha ki egem day. Sedesiyas mbuɗ yara eg mul ma Babilonna.

⁴ Hu basara tleeŋera Sedesiyas a mulnara hu til ma doogona, hu buuna doogo, Nabukodonosor, mul ma Babilonna, mbay u suu mam suu duuna halaŋ halaŋ fun Yerusalem. Asi min tasi kaɗi, min lina kasi ŋguy yam Yerusalem ki na cutl.

⁵ Ҥoŋzi namma li saɓakŋa ta ta tew ki hu basara doogo yam dewra vi mulna Sedesiyas.

⁶ Hu til ma fiɗina hu buu ma tleeŋena, hu li ma mayra ka ci hu ɦoŋzina mayna, suu begera kosina ka fi tina oloɗi lay.

⁷ Asi co ii gulumunna. Suu duuna halaŋ pii ki hin ɦoŋzina njeŋge hu vun zi ma duk ɦoŋ gulumunna, mba tok eg sene ŋgusugi suu vi mulnana. Suu Kaldena ki ŋguy kay ɦoŋzina na lay. Asi tli voɗta eg Yurdanda.

⁸ Suu duu suu Kaldena dik mulna Sedesiyas tuɗ vam ha hu fulla Yerikora. Suu mam suu duuna halaŋ njay ki hinim ki kay tamu.

⁹ Suu Kaldena vi mulna tuɗ u nam Ribla hu mbassa vi Hamat maŋ mul ma Babilonna hin dam gaɗ mamba.

¹⁰ Mul ma Babilonna ŋgaɗ goryoŋ Sedesiyasna ki kaŋga irimu. Nam li ko ndaɗta na, ŋgaɗ suu ŋgolo suu sun suu Yudana ki hu Ribla halaŋ.

¹¹ Na ɗaŋŋi nam co ii Sedesiyas kiyo, ɗagam u gali walakka mba. Mul ma Babilonna tlam tuɗum Babilon, gam daŋgayna ta ta buurum ma miɗna.

¹² Hu til ma vadlna, hu buu ma doogona, hu basara doogora, Nabukodonosor a mulna hu Babilonda, Nebuzaradan sa gol u mulna, gol u suu ŋguy kay mul ma Babilonna mba hu Yerusalem.

¹³ Nam gi kura eg zira vi Lonara eg ziŋ mulnana u zigini suu Yerusalemma halaŋ halaŋ, u ziŋ suu ŋgolo suu sunda lay.

¹⁴ Gulumun ma Yerusalemma may ni sa ŋgol ma gol u suu Kaldena ɦasi voɗta asi toom ki kaŋga bel bel.

¹⁵ Suu ɦizi suu hin hu ɦoŋzina tuna u suu ka hum gaɗtaɗi suu cuk tasi u mul ma Babilonna, suu ceɗ tlena suu usi hinna, Nebuzaradan sa ŋgol ma gol u suuna yowosiya.

¹⁶ Na may nam hin suu gori suu ɦiw ka hu mbassa a horok sene ŋgusuna u sene wana.

¹⁷ Walak mayra fiyek coli hu zira vi Lona uɗta kaŋgara pereɗta u ŋgal walak ma hu Ziŋ Yawera suu Kaldena yowosi tuɗusi Babilon.

¹⁸ Asi yow givin ma li ɓivunna, pelna, ŋgewra, ŋgal ma yam tlena ki u namma, va ma cira, tlesuu walak suu li sunda hu zira a ɓivunnana halaŋ.

¹⁹ Sa ŋgol ma gol u suuna hin yow ŋgalina, tassagina, ŋgali suu yam tlena ki u asina, givin ma li ɓivunna, pindilla, va ma cira u tassagi suu lorra u suu doonorna.

²⁰ Mbal walakŋa ma fiyekina mba', ŋgal walak hin kaŋga ni dew daŋ, mbutli walak suu doogo yam mba' suu ziriɗ uɗ mayra pereɗta mulna Salomon laɗ hu zira vi Lonara, sa ka ndak ŋga nek walak nammaɗi, ma li tlesuu sunda namma.

²¹ Fiyek walak mayra fun zira ndaɗta ta kolora ni bikŋa doogo yam kalavandi, huruɗ ma kurufuna ni bikŋa doogo yam mba', doɓorokoɗ ni ŋga kona fiɗi, huruɗ ki kurufu ŋgilna.

²² Kolo kaɗ ni yam walakka, miniya fiyekeɗ bikŋa vadl, zew walakka ŋguy kamu, ta a mbara fiyekeɗ ni fun taɗ dew lay, tlesuu ŋguy kaɗna ni ko tasi dew lay.

²³ Vuɗ grenadena hu ni dok tleeŋe yam karkiya. Asi moli eg tasiya, vuɗ grenadena ŋguy ki kaɗ halaŋŋi kis.

²⁴ Ŋgol asgaa ma gol u suuna vi Seraya, sa ŋgol ma fok mulisuu li ɓivunna u Sefaniya, sa li ɓivunna, ŋgoo dagani, suu gol vun zira lay.

²⁵ Nam tli sa ŋgol ma hu ɦoŋzina ma fok suu duunana, suu fun mulnana kiɗisiya may, ni suu hu ɦoŋzina na, sa ɓii magaara maŋ ŋgol asgaana ma ɦasi voɗtana, dukusi wanni suuna na dok karkiya hu ɦoŋzina.

²⁶ Nebuzaradan ma ŋgol asgaana yowosi tuɗusi maŋ mul ma Babilonna hu Ribla.

²⁷ Mul ma Babilonna cukusi daŋgayna a casi kira, hin casi ki hu Ribla, mbassa vi Hamatta. Ni ko ndaɗta na asi tuɗ Yuda ha ki day eg ndaŋga mamba.

²⁸ Gola ni ndum suu Nabukodonosor yowosi tuɗusi ki mbaɓura hu basara kiɗisiyara, suu Yudana 3023.

²⁹ Hu basara doogo yam kalavandira, Nabukodonosor, a mulnara, yow hu Yerusalem suuna 832.

³⁰ Daɓ dagan hu basara dok mba' yam hindi ta Nabukodonosor a mulnara, Nebuzaradan ma ŋgol asgaana yow suu Yudana tuɗusi ki mbaɓura 745. Taɓ halaŋŋi suuna 4,600.

Mul ma Babilonna hoŋ dla cora vi Joakimba ki dagani

³¹ Na may ni hu basara dok hindi yam kiɗisiya ta asi tli Joakim mul ma Yudana tuɗum ki mbaɓura hu til ma doogo yam mbana, hu buu ma dok mba' yam vadlna, Evil Merodak, mul ma Babilonna, hu basara nam kal hu mullara gaw ni nam hoŋ dla cora vi Joakim mul ma Yudana ki dagani, gam ay ki hu daŋgayna.

³² Nam ɓakam boy ma banara hin ɦam ŋgolla duk muli suu ɓak dlara u namma.

³³ Nam fokom barawi mam suu daŋgayna kiyo, Joakim hin ti funa tew tew ni kay tabulla ko tam u mulna hu buuna tew tew.

³⁴ Iiri mamba hu buuna tew tew ni mul ma Babilonna golomba, va nam minim hu buuna tew tewna, hu buu mamma halaŋ ta ta hu miɗ mamma.