JEREMI 51 - Boy Lonana

¹ Na ɗaŋŋi Yawe ɓak anaba, an hin cuk ay kay Babilon ay huu suu babali mansina, semeɗ ma ɓeŋ tlena kina.

² An sunuɗ suu koyogina ha kaɗu, asi hin njayaɗ kiyo, ɦurumuɗ mbas maɗta kiyo. Asi hin sel ay kaɗ ni keŋ lina halaŋ hu buu ma hahawra.

³ Hinigi sa tli gu mbuuru mamba kom a duuna naɗi, hinigi sa cuk koroŋ ma duuna egemmaɗi lay, gorzoŋŋii maɗ suu duunaɗi lay, ɦangi suu maɗ suu duuna ay ki halaŋ halaŋ.

⁴ Suu fi dakka a miɗ kina puk kaŋga hu mbassa Kaldera, suu kususi u saɓpana ki hu voɗta.

⁵ Kay ana mbas masira ki oyra u dla cora eg ma Teteɗ ma vi suu Israelna. Doli ɗaŋŋi sa Israel ɗowba ma Yuda ka ki hini dono ko Loosina Yawe, ma Saɓakŋa Kom Belnaɗi.

⁶ Liŋigi ki hu Babilon gegelay ŋgay tamu. Li ka naɗi ni agi hin viɗ kiyo hu li ma ndaɗ hin warak ki kay dla cooɗtana. Yawe liim ma sa sugulna mba wa. Nam warakaɗ ni va ndaɗ minimma.

⁷ Va ma ci ma lorra duk ko Yawena ni Babilon. Ndaɗ guruɗ yam ndaŋgara ki halaŋ. Njaf suuna halaŋ caɗ sum veŋ maɗna, yasi jak ki wa.

⁸ Babilon kaf puka kaŋga na gaw ni, kus kiyo. Yoorogi tagi kaɗu. Doogi mbulna ii mbiliɗu, ndaɗ li hin suɗ kala.

⁹ Ami hal yal ma cil mbil Babilon kina may ndaɗ ka a cilɗi. Hinigira dukugi ni gegelay hoŋ i hu mbas mamba. Boy maɗna tew ki huulona. Nam tew ki duk ɗugulla.

¹⁰ Yawe takaygi suɗ maygira iriygiya, mbagi aya, ɓakaygi dlara vi Yawe, Looyginara, hu Siyon.

¹¹ Minigi mbuurura kogiya. Yowogi ɓagina kogi may. Yawe dliɗ saa muli suu Medina ki kolo wa, gasi dlara Yawe daɗ kay suu Babilonnara nam saa ay ki kaɗu. Nam laɗ ki wa. Nam ɓak ki ana nam a ɓeŋeɗ kiyo. Ni sa sugul ma vi Yawena, ni sa sugul ma ay kolo huulonana.

¹² Vagi vun ma tuɗ duuna kay gulumun ma vi Babilonna. Ҥagi saɓakŋa maŋ suu gol u suuna, tinigi suu gol u ziina. Yowogi suuna asi buu guɓura ki kaŋga voɗo. Gasi dlara Yawe daɗ kay suu Babilonnara, nam saa ay ki kaɗu, nam laɗ ki wa.

¹³ Ndak mayra kaki eg mbo lum ma ŋgol geveena, ndak mayra begera kok cocora, buuruk ma daɓpa mba wa, ndak fi tlesuu ndak a fasina ki halaŋ wa.

¹⁴ Yawe, ma Saɓakŋa Kom Belna, suu ki u tamba ana, «An oyok suuna huruk ko ndal baara na, asi hin yi ay kolo kak ko ndal suu duuna na.»

Sa li duliyara u fulina

¹⁵ Sa li ndaŋgara u saɓak mamma na, ma li duliyara u yal mammana, ma u yal mamma li huulonana.

¹⁶ U tokka nam tok mbo ma saɓak cocona kolo huulona, tin ɗugul mayra ŋgolora ay u vun daŋgara ma daɓ ayna, nam si mbona ay kaŋga duk welera, nam sel semeɗ ma ay kom hu zanduk mambana ay kiyo.

¹⁷ Gegelay ki mbuɗi ndaari, ki doriya, gegelay ma min a gi u dlara fulina mbuɗ ki zolona, foto tlegeyem halaŋ ki coo, ŋgus ka hurusiɗi.

¹⁸ Ni dlara ganyamba, dlara sanda, hu li ma hin a ɓak dlara kina asi hin bulum kiyo.

¹⁹ Begera vi suu Israelna ka ni ko asi naɗi. Nammi sa li tlena belna, Israel ni mbassa hu joommara, Yawe ma Saɓakŋa Kom Belna, ni semu.

Babilon daɓ maɗta

²⁰ Ndak ay varanni ko goo zuzuna na, ko ɓagi ma duuna na. An pali njaf suuna ki u ndaku, an bulum mulina ki u ndaku.

²¹ An ci kulumina ki u suu masi suu kasina u ndaku. An pali pupusna ki u suu fuli hurumma.

²² An ci njufiina ki u boyogina u ndaku. An ci suu maana ki u gorkemba, an ci gor njufiina ki u gorɓiina.

²³ An ci suu taa yoorina ki u yoori masisina. An ci suu horokŋa ki u mbutli masi suu sunda. An ci suu komandana ki u suu mulina.

²⁴ An warak Babilon u suu Kaldena halaŋ ki kay dla cora asi laɗ eg suu Siyonna ki ni irigiya. Yawe di na.

²⁵ Ni duk ɦoŋ tay mba', ɦini mayra ɓeŋ tlena kira. Yawe di na. Ndak mayra ɓeŋ ndaŋgara ki halaŋga. An maɗ kon ha kaku, an zuɗuk ay kaŋga kay ɦinira, mbuɗuk ki ɦinira murus kura.

²⁶ Sa hin ka fi gogoyra tiniɗ keŋga u mayra gi u zira kaŋgara ay varak oloɗi. Ndak hin mbuɗ ki ni li ma ki kiɗik ma hahawra a fafaɗta. Yawe di na.

²⁷ Takagi dlara duuna kay ndaŋgara, buugi tokolomma duk njaf suuna. Yowogi njaf suuna a tuɗ duu ma teteɗna u ndaɗu, yaɗ suu mulina kaɗu, Ararat, Minni, Askenaz. Ҥagi voɗta maŋ suu duu suu ŋgolona, asi yow suu duuna kaɗu. Sunugi kulumi suu duuna kaɗu u tasi bolowra ko ndal baara tli ay kolo ko ɗugulla doɓorokka na.

²⁸ Yowogi suuna tuɗ duu ma teteɗ na u ndaɗu. Muli suu Medina u suu ŋgolona masisina, suu muli masisina halaŋ u li ma asi ti mulla kamma halaŋ.

²⁹ Ndaŋgara dlakka gijaŋ luu njoŋŋa hu li ma ɓak ma vi Yawe ma kay Babilonna gijaŋ lirana, mbuɗ mbassa Babilonda ki li ma ki kiɗik ma hahawra, suu hurumma ki ciya.

³⁰ Suu saɓak suu Babilonna min ka a duuɗi, asi hal keŋ lina ŋgay tasiya. Asi mbuɗ ki maŋira ko boyogina na. Asi ŋgalaɗ ziiɗ kiyo, vun zigini maɗsina ki tooya.

³¹ Suu vun sunda ŋgaf tasi voɗ na ŋgaf ŋgaf tuɗ a di boy namma maŋ mul ma Babilonna ana, ɦoŋzina ki tliiya, col ay ii wanna day ta ta tew ki ii ko hiŋŋa.

³² Voɗta ki tliiya, cerewna ki ŋgaliya, suu asgaana ki njaya.

³³ Na ɗaŋŋi Yawe, ma Saɓakŋa Kom Belna, Lona vi Israel, ɓak anaba, Babilon ta jivira tli taɗ ni ko ndal li ma sana minim balassa ki kak njokŋi hin gijaŋ feɗ wana molom huna na.

Lona hi tam a sa sugul suu mamsina

³⁴ Nam komon ki wa, nam soɓon ki wa, Nabukodonosor, mul ma Babilonna, nam hinin ki ko ndal tassa ma hurum ki seɗina na. Ko ndal vabakŋa na nam liginu, nam hoɓ hayam ki u mbul ma duk sokonna, hin gan kiyo.

³⁵ Tiita manda u dla coonda hoŋ ndi kay Babilon. Suu hu Siyonna ndak a di na. Ko busuɗun hoŋ vo ni kay suu Kaldena. Yerusalem ndak a di na.

³⁶ Eeh, na ɗaŋŋi, Yawe ɓak anaba, an hin tlak dlaakka konu, an hin ɦal tan a saak suguluku. An hin sooɗ mbo lum maɗ ma ŋgolna kiyo, haɗagaɗ goloŋ maɗta kiyo.

³⁷ Babilon hin mbuɗ ki ni gogoyra moli kay taɗta. Li ma bayakka ti huna, li ma ki kiɗik ma tii tii ma hahawra, suu huruɗna hin casi kiyo.

³⁸ Hu li ma asi halaŋ ka tii ko ndal gor dlona nana, asi ŋgoɓ ko ndal goryoŋ dlora tamara nana.

³⁹ Asi gi tasi kura. An ka minisi tiisina aya. An hin mbuɗusi ki ko ndal suu ki gurɗi miɗina na. Asi hin buu senna ni ka dliɗ dukgi. Asi hin ka dliɗ oloɗi. Yawe di na.

⁴⁰ An tuɗusi hu li ma ŋgaɗta ko ndal gamlagina na, ko ndal timigiina u ŋgekgina na.

Yoo tara kay Babilonda

⁴¹ Ni nana Sesak tlaɗ ki nige, jivira kay ndaŋgara halaŋ taɗ ki wa. Ni nana Babilon mbuɗ ki li ma hahawra duk njaf suuna nige.

⁴² Mbo lum ma ŋgolna tluɓ Babilon wa, biliɗ ma ŋgolo cocona tluɓuɗ ki kaŋga wa.

⁴³ Ҥoŋziiɗna mbuɗ ki ni li ma ki kiɗik ma hahawra, mbassa faɗta u fulla, mbassa sa ka kak huruɗ oloɗira ta sa wara ka jak voɗta tlira huɗira.

⁴⁴ An li yara u Bel hu Babilon, an ɓaɗam va funum ma nam komomma kiyo. Njaf suuna hin ka tok ay kam oloɗi. Gulumun ma Babilonna lay ni bow ki kaŋgaa.

⁴⁵ Agi suu mansina, selegi ay ki huruɗu. Gegelay suɗ tam ko yara ŋgolla vi Yawera.

⁴⁶ Ka a tagira mbuɗ ki maŋiɗira, ka agi mbuɗ ki ndaana ko vun ma suuna lam hu mbassa hu bassa wanda, dla wanda ni na. Hu bassa hiŋga dla hiŋga ni na, duuna li hu mbassa, sa saɓakŋa dik ndaram ma hiŋŋaraɗi.

⁴⁷ Na ɗaŋŋi buuna hin mbaa ma an hin duu u fuli suu vi Babilonna, mbas maɗta u ŋgoloɗ halaŋ hin ka kak gasi u furiraɗi, vo varaɗ ni suu maɗ suu fi dagka a miɗ kina halaŋ hin puk ki kaŋgaa.

⁴⁸ Na ɗaŋŋi huulona, ndaŋgara u tlegesuu hurusina halaŋ hin gi soolla kay Babilon. Gasi daŋ may ay ii mbayawni suu duuna hin mbay kaɗu. Yawe di na.

⁴⁹ Suu casi ki kay ndaŋgarana halaŋ dlaasira cukuɗ ni kay Babilon. Babilon may ɗaŋŋi hin ndi ni kay suu Israel casi kina.

⁵⁰ Agi suu suɗ ko ŋgewnana, cukugi tagi voɗo, cologi dukgi. Ay ki day lay ni yagi Yawe, ko saara vi Yerusalemba hoŋ ay kagiya.

⁵¹ Ami hurumi ka furi hu li ma ami hum suuna ŋgulumi naɗi, irimi mbuɗ ki zolona. Suu koyogina sel ay hu li ma teteɗ ma hu Ziŋ Yawerana wa.

⁵² Na ɗaŋŋi buuna ka mbaa, Yawe di na, ma an hin mbuɗ yara eg li ma togol fulina, hu mbas maɗta suu fi mbilna a miɗ kina hin aya.

⁵³ Lini Babilon ɗiŋŋi kolo mbuɗ a sa ka waɗ dla cooɗta ha kolo duk ɗugullaɗi lay ni, suu li dla cora kosi hin ndak ha kolo u gaɗ manda. Yawe di na.

⁵⁴ Yira yi ay kolo hu Babilon ana, suuna mbay njunuɗu. Dla cora ka hu mbassa vi suu Kaldenara.

⁵⁵ Yawe ka ɓeŋ Babilon ki ni namu. Seŋ vun suu yi kolo u delesi eŋŋa. Lini yi masira ni ko ndal soora mbo lum ma ŋgolona, soora na lay ni. Asi vunusi hin seŋ kiyo.

⁵⁶ Gasi nam ka mbay kaɗu, sa li dla cora, mbay kay Babilon. Suu maɗ suu saɓakŋa casi ki wa, gu mburu masira kusuɗ ki wa. Yawe ni Lo ma wi hoŋdira, nam wi yal ma warak suuna kay dla coosira.

⁵⁷ An guruɗuɗ suu ŋgolo maɗ suu sunda u suu maɗ suu wi yalna, komanda maɗsina u muli maɗsina u suu maɗ suu saɓakŋa kiyo. Asi hin buu ni sen ma daɓ dukgina. Asi hin ka dliɗ ki kolo oloɗi, Mul ma sem ana Yawe, ma Saɓakŋa Kom Belna, di na.

⁵⁸ Na ɗaŋŋi Yawe, ma Saɓakŋa Kom Belna, ɓak anaba, gulumun ma ŋgolo ma vi Babilonna ki kaŋga tooya. Vun goŋga funumba ŋgalaɗ ki u kura. Suuna loɓ tasi ni ɦawa, njaf suuna loɓ tasi ni maŋ kura.

Magaara gaɗ ki hu Efratta

⁵⁹ Gola ni gaɗta sa jok vun Lona, Jeremi, daɗ maŋ Seraya ma goŋ Neriya, ma goŋ Manseyana hu li ma nam tuɗ Babilon ko tam u Sedesiyas ma mul ma Yudana hu basaɗamba fiɗira hu mulla. Seraya ni mul asgaana.

⁶⁰ Jeremi ɓii dla cora li hu Babilonda halaŋ halaŋ hu magaara dew. Boy ma kaŋga ɓiiri kay Babilonna halaŋ halaŋ.

⁶¹ Jeremi di Seraya ana, «Hu li ma aŋ hin tew ha Babilonna wani aŋ hin wasiya, aŋ hin ndum boy namma ki halaŋ halaŋ.

⁶² Aŋ hin di ana Yawe, aŋŋi sa di boy namma ay kay li namma ana aŋ hin ŋgal li namma ki ka hin va iiri huɗi, sa waraɗi lay, mbuuɗi lay, li namma hin mbuɗ ki ni li ma hahawra a fafaɗta.

⁶³ Hu li ma aŋ daɓ magaa ndaɗta ki ndumba wani, aŋ njunuɗ gogoyra uɗ njunni gaɗ ki hu Efratta.

⁶⁴ Aŋ hin di ana, Babilon hin bulum ki ni na, hin ka hoŋ kolo oloɗi ni kay dla cora an mbaaɗta ay kaɗta.» Boy ma vi Jeremina doɓ ki ni tani.