JEREMI 50 - Boy Lonana

Babilon ɓeŋ kiyo. Israel buɗ ki may

¹ Yawe ɓak boy mamma maŋ Babilon hu mbassa vi suu Kaldena fun sa jok vun Lona, Jeremi.

² Ɓakagi boy namma ki maŋ njaf suuna, dagi suuna asi hum boy namma kiyo, neegi suuna ki kamu. Ɓakagi boy namma ki maŋ suuna, ŋgayagina kaŋgaɗi, dagi ana, Babilon ki tliiya, Bel viɗ jiv maɗna ki wa, Marduk mbuɗ ki zolona wa. Kumu maɗna ɓeŋ ki wa, otel maɗ ma li ɓivunna bulum ki wa.

³ Gasi, njaf suu ay mbayawna ka mbay kaɗu. Ni njaf suu mbuɗuɗ mbas maɗta ki li ma ki kiɗik ma hahawra, ma sa ka mbay kak hurumbi layna, suu warna u mburina ŋgay ki halaŋ halaŋ va hin ka oloɗi.

⁴ Hu li namma na ni, Yawe ɓak hu li namma na gaw ana, Suu Yudana u suu Israelna ka mbay u tasiya. Tuɗ ay may, tii may, asi hal ni Yawe, Loosina.

⁵ Asi joɓ kay voɗta Siyonda. Asi tin irisi ni hu voɗ ndaɗta. Asi mbay taɓ ko tasi u Yawe vi banara u nam a fafaɗta, ka a maa kiɗi.

⁶ Timigii suu viɗ kina, ni suu mansina mbuɗ ki ni asiya. Suu golosi iiri masirana viɗisi ki wa. Asi tuɗusi asi talal ay kolo kay ɦinira ta ta, kay ɦinira ŋgolora u mayra goorira lay, humusi ka gasi kay liisi ma buunaɗi lay.

⁷ Suu fasina halaŋŋi casi kiyo. Suu duu u asina di ana, «Ami hin ka li u dla co kamiɗi kay ana asi li dla cora eg Yawe ni asiya.» Saɓak ma kaɓakŋa, saara vi somoyosira ni Yawe.

⁸ Liŋigi ki hu Babilon, mbassa vi suu Kaldenara. Selegi ay kiyo, mbuɗugi ki ko ŋgekgi suu tuɗ fok ndarayasina na.

⁹ Gasi an hin mba suuna ay cukusi duuna eg Babilon. Suu hu njaf suu col ay mbayawna. Asi hin nja tasi ay a duuna u ndaɗu, hin daɓaɗ dlaɗ ki ni na gaw may. Sin mburu masira ni ko sa duu ma saɓak coco ma ci suuna ɦayna na ka hoŋ ay koɗ ɦawaɗi.

¹⁰ Kalde mbuɗ ki jona, suu ɦurumuɗ tlegeyeɗna hoɓ hayasi ki u asi wa, Yawe di na.

¹¹ Gasi furiyugiya, lagi furira gasi, agi suu ɓeŋengi joonna kina, gasi luurugi njoŋŋa ko ndal mbutla wayra daɓaa hu fullara na, bayagi kolo ko gor kulumina na.

¹² Sugi ki mbuɗi zolona cocoo. Ndaɗ mayra vuɗugi kira mbuɗ ki zolona wa. Ndaɗ mbuɗ ki dagan duk njaf suuna, ko fulla na, ko li ma koɓoona na, ko li ma jeremma na lay.

¹³ U saɓak yara vi Yawera sa ka kak huruɗ oloɗi. Ndaɗ mbuɗ ki u ŋgoloɗ halaŋŋi li ma ki kiɗik ma hahawra. Suu jak tli voɗta eg Babilon tokŋa mbuɗ ki zolona lay, hu li ma asi wi tlena ki ɓeŋi coco nana asi tii tii ma hahawra coco ɦay.

¹⁴ Njaragi a duuna ki kay Babilon ŋguyuɗ kiyo. Agi suu yowogi gu mburura kogina. Munugira u mburura, ŋgayagira kogi oloɗi kay ana ndaɗ li dla cora eg Yawe, ni ndaɗu.

¹⁵ Yagi kolo u delegira duuna ŋguyuɗ yaɗ kiyo, ndaɗ hin ndi kaŋgaa, gulumun maɗna hin to ki kaŋga lay. Zigini maɗsina hin bow ki kaŋga lay. Ni sa sugul ma vi Yawena, saagi sugulugi u ndaɗu. Agi laɗ egeɗ ni dlara ndaɗ laɗta.

¹⁶ Yowogi suu zaa njaf tlena kaŋga hu Babilonna ki halaŋ. Suu kaw maragamba kosi zi wana hu li ma feɗtana ki halaŋ. Fok ŋgew ma ka wi hahaw saɗina gegelay tin irim ki ni duk suu mamsina. Gegelay liŋ tin irim ki ni hu mbas mamba.

¹⁷ Israel ni timiira viɗ ki dlona dikiɗta. Jew gigiŋŋi mul ma Asirina gaɗ jaŋaɗ aya, Nabukodonosor mul ma Babilonna hin jak u ndaɗu, hin daɓaɗ ki ta ta hiniɗ ni sokoɗu.

¹⁸ Na ɗaŋŋi Yawe, ma Saɓakŋa Kom Belna, Lona vi Israel, ɓak anaba, An hin duu mul ma Babilonna u mbas mamba, ko an duu mul ma Asirina na.

¹⁹ An hin hoŋ Israel hu liiɗ ma ti haɗna, ndaɗ hin taa kay Karmelna u suu Basanna asi hin hoɓ ki kay ɦinira Efrayim u Galaadta.

²⁰ Hu li namma na ni, Yawe ɓak hu li namma na gaw ana, Asi hin hal u dla cora Israel laɗta may, ndaɗ hin viɗ kiyo. Dla cora Yuda laɗta lay ndaɗ hin viɗ ki may, ka faɗ oloɗi. An hin heɓ hurun ki eg suu an hinisi iirina.

²¹ Cologi duuna u mbassa vun mbo lum ŋgollara. Duurugi u ndaɗu u suu hu Pekodna may, cagisina, ɦangi u suu hinna aya. Yawe di na. Lagi dlara an ɦagi voɗta kaɗta halaŋ.

²² Vun ma duuna ka hu mbassa cocoo, vun ma ŋgolna na kuuh.

²³ Ni nana do caffa kay ndaŋgarara na halaŋ hawaɗaɗ ki lay, tooɗ ki lay ni ge. Ni nana Babilon mbuɗ ki li ma zolona duk njaf suuna nige.

²⁴ An gunuk dawna kaŋga fokoku, gola kafak kay ŋgusuk vak wa Babilon, uk gi ki kolo wa, vak ki wa. Kay ana ndak min tak a duu u Yawe.

²⁵ Yawe mal vun liim ma kura ki wa, yow ɓagi namma ay ki kom u hurumma haɗta. Gasi, ni sunda vi Bu Suuna Yawe ma Saɓakŋa kom Belna, hu mbassa Kaldera.

²⁶ Agi suu ay keŋ ndaŋgara ma daɓ ayna mbaagi ay egeɗu, malagi vun veeri maɗsina kiyo. Yowogi tlesuu huna molosi ki kay tasiya, ɦasi ki maŋ Yawe, hinigi va kaŋga hu ndeɗi.

²⁷ Cagi gor mbutlina kiyo, tuɗugisina ha ki hu li ma ŋgaɗ mbutlina. Ni dla co me kasi na ɗaŋge. Buu masina mba wa, li ma asi a ɓak dlaasira kina.

²⁸ Vunna ka liya. Suu ŋgay tasina u suu usi hin hu mbassa Babilondana mbay ɓak hu Siyon kay sa sugul ma vi Yawe, Looyginana, sa sugul ma ay kolo huulonana.

²⁹ Yowogi suu wi munda ay kay Babilon, suu u gu mbuurura kosina halaŋ. Minigi tagiya, ŋguyugi ki kaɗu, ka a sa suɗ kiɗi. Warakagira ki kay tuɗ maɗta cora. Lagira egeɗ ni dlara ndaɗ laɗta ndaɗ di boy ma cona maŋ Yawe ɦay, maŋ ma Teteɗ ma vi suu Israelna.

³⁰ Gasi, hu buu namma gaw ni gorzoŋi maɗ suu duuna hin puk kaŋga hu liiɗna gaw. Suu maɗ suu duuna halaŋ vunusi hin seŋ ki kaŋgaa. Yawe di na.

³¹ Duk ɦoŋ tami mba', ni boy cona, Bu Suuna Yawe ma Saɓakŋa Kom Belna, di na. Buu makŋa mba wa. Ni li ma ndak hin ɓak dlaakka kina.

³² Ndak mayra li dla cora daɓ sek kaŋga puka. Sa ka a tlak koloɗi. An gi kura ki hu ɦoŋ ziikŋa, ndaɗ ŋgal suu ŋguy kamma ki halaŋ.

Bu Suuna sa suɗta vi suu Israelna

³³ Na ɗaŋŋi Yawe, ma Saɓakŋa Kom Belna, ɓak anaba, Asi hahay ɦay, suu Israelna u suu Yudana iirisi ka ɓorow kiɗi. Suu lasi dla cora egesina vasi wa. Asi ka min a cukusiɗi.

³⁴ Na may sa njun kasina saɓak cocoo, Yawe ma Saɓakŋa kom Belna, ni semu. Nam li yara kay dlaasira cocoo a mbassa hoŋ fi heɓpara a hin viɗ suu Babilonna kira.

Ɓak ma Bu Suuna kaam kay Babilonna

³⁵ Ŋgewna, ci suu Kaldena kiyo, Yawe di na. Suu Babilonna lay, suu ŋgolo suu sunda u suu wi yalna lay.

³⁶ Gi ŋgewna hu li ma joɓ fulina ni suu puluɗina, ŋgewna duk suu mam suu duuna asi hin puk ki kaŋgaa.

³⁷ Gi ŋgewna duk kulumi maɗsina, duk pupus maɗna, duk suu ndaɗ kak dukusina, asi mbuɗ ki ko ndal boyogina na. Ŋgewna, kal duk lii ma ɓaagi maɗna, nam ki ɦurumiya.

³⁸ Ŋgewna, kal duk mbo maɗna nam so kiyo, ni mbassa tak foto tlena, foto tlesuu bolow asina ɓeŋesi yasi kiyo.

³⁹ Gola fulina kak zina ko tasi u bayakka, ergeɗta kak zina dukusi lay. Sa hin ka kak huruɗ oloɗi a fafaɗta. Ndaɗ hin hin ki ɦawa a fafaɗta duliyara tuɗ daɓ ki u ndaɗta.

⁴⁰ Ndaɗ hin li ni ko ndal Lona li dla cora eg Sodom, Gomor, u ɦoŋzi ma keŋeɗnara na. Yawe di na. Sa hin ka kak hu oloɗi. Sa wara hin ka buu huɗi.

⁴¹ Suuna hin col ay ii ko ma mbayawna, suuna bolow cocoo, mulina bolow coco lay min tasi ay a duuna. Hu li ma vun ndaŋgara daɓ ay huna.

⁴² Asi yow gu mbuurura u saɓina ay kosiya, asi ya cocoo ka wi hahaw saɗi. Vun ma asi lamma ni ko ndal mbo lum ma ŋgolna soora na. Asi ful ay kolo kay kulumina. Asi ay njaari fun tasi ko ndal suu duuna tuɗ li yara na. Asi tuɗ duu ni u ndaku, Babilon ta jivira.

⁴³ Mul ma Babilonna hum boy namma na ni, saaram jak ki gaw. Hahawra vam ki gaw, tiitara ko ndal cara hu buu ma vuɗta na.

⁴⁴ Ko ndal dlona ɗiŋ ay ki kolo fun lum ma Yurdanna tuɗ irim ha hu kaana tam ki minira na. Na ɗaŋŋi u cemek ira dewra an caɗ suu huruɗna kiyo. An sunuɗ gorzoŋii suu duuna ha kaɗu kay ana sa ko an na na ni gege? Sa hin ndak a kaan ɓakŋa kanna ni gege? Sa gol iirira vi suuna ma hin col fokonna ni gege?

⁴⁵ Humugi dlara Yawe miniɗ ay kom kay Babilonda ha olo, ɓak ma nam minim ay kom kay suu Kaldena. Gasi daŋ may gor mburina hin taɗasi kaŋgaa, gasi daŋ may nam hin bulumusi saɓakasi ki kay coosira.

⁴⁶ U tlira tli Babilonda ni ndaŋgara dlakka. Njaf suuna tii ŋgol cocoo.