JEREMI 5 - Boy Lonana

Ganyamba hu Yerusalem halaŋ

¹ Tuɗugi hu voɗta Yerusalemba, gologi ɗaŋ hin joɓogiya, halagi hu li namma. Agi fi sa dew su? Agi fi sa njun kay sa ɗegeena dew su? Ma hal a di gasirana. Na daŋŋi an hin ɦal gira maŋ ɦoŋzina.

² Asi ɓak coco, «U sem Yawe,» sun masira ki ni ɦawaa.

³ Yawe, iriŋ ka tinira ni a gol gasiraɗi su? Aŋ waɗasiya, va ka ŋgenesiɗi. Aŋ casi ki lay. Asi ka humuŋ gaɗ maŋgaɗi. Asi mbuɗ vogosi ki eŋga su gogoyra. Asi ka min a hoŋ ayɗi.

⁴ An may ni joɓ tan ana, asi ni suu ka wi vaɗina. Asi ka yalɗi lay. Asi ka wi voɗta vi Yaweraɗi, gaɗta vi Loosinaraɗi lay.

⁵ An hin tuɗ ni eg suu ŋgolona na ɗow a ci wayra u asiya. Asi ɗow kala wi voɗta vi Yawera, gaɗta vi Loosinara. Na may ni suu daŋŋa ko suu hiŋŋana ni kus jug ma gii kelesina kiyo, bulum banara dukusira kiyo.

⁶ Na ɗaŋŋi dlo ma ay duk gura na hin vasi kiyo. Bosogo ma hu fullana hin komosi kiyo. Sindilna hin buu kaŋga ŋgoo ɦoŋziisina, hu li ma asi hin kal kina, nam hin palawasi kiyo. Kay ana yaasira wul ha fokŋi wuli na ɗow ɗow, dla coosira ka seŋ tuɗta tuɗ fokkaɗi.

⁷ Duk dla cora ko wanda na ɗaŋŋi hin ɦak gira ni nanage? Goryok noyon kiyo, asi suu tasi u sem loogi suu ɦawana lay. An ɦasi tlena halaŋ, na may asi li zoŋga, asi zuɗ tasi fun ziŋ gawlaŋgara.

⁸ Asi ni ko ndal kulumi suu hal suu tamagina na, ɗoori cocoo, gegelay bay u caŋ ndarammara.

⁹ Ni an ka ndak ɓak u asiɗi su? Yawe di na. An ka ndak sa sugulun u njaf suu ko asi nanaɗi su?

Sa babali ma hayam ka hoɓbina

¹⁰ Calaɗagi kay gulumunna cagisina kiyo. Na may daɓagisina ki halaŋgi. Kaasi gogor kosi kiyo. Asi ka vi Bu Suunaɗi.

¹¹ Gasi asi panan u dla cora ɦay. Suu Israelna u suu Yudana lay. Yawe di na.

¹² Asi tin vunusi kay Yawe di ana, «Nam ka iiriɗi. Dla cora ka mba kaygiɗi. Ŋgewra hin ka caygiɗi lay. Mayra hin ka caygiɗi lay.

¹³ Suu jok vun Lona hin mbuɗ ki ko semeɗna na. Lona ka ɓakasi dlaambaɗi ko dla coosira li ni kasiya.»

¹⁴ Ni kay ndaɗta Yawe, Lo ma Saɓakŋa, ɓak anaba, kay agi ɓak ko ndaɗta na kay dlaanda ka funuŋga an ŋgal kura. Suu asina ni guna gaw may kura hin ŋgalasi kiyo.

¹⁵ An hin mbaagi suuna ay kagi agi suu Israelna, suu ay dayna. Yawe di na. Suu ka gasiɗina, suu u gu ma basina, suu aŋ ka wasi vun masinaɗi layna, suu aŋ ka wasi dlaasiraɗi layna.

¹⁶ Gu mbuuru masira ni zulla ŋgolla. Asi halaŋŋi suu duuna.

¹⁷ Asi ti ki ni tlesuu aŋ feɗesina, fuuŋa lay. Asi komoŋ ki ni goryoŋ suu njufiina u gorɓiina. Asi komoŋ ki ni yoori maŋ suu gorina u suu ŋgolona. Asi ti ki ni gugutlu maŋga u tulum maŋŋa. Asi tooŋ liiŋ ma saɓak ma aŋ saa ana aŋ ka kaki hurum u heɓpa hu li ma asi hin mbay u ŋgewegina na.

¹⁸ Hu li namma na lay ni, Yawe di ana, an hin ka cagi ki halaŋgi.

¹⁹ Hu li ma agi hin di ana, ni kay dla co tara Yawe, Looygina, tiniygi dla ndaɗta kaygi nanage? Aŋ hoŋosi dira ana, ko agi noyon ki a sun loogi suu koyogina hu mbas magira, na may agi hin sun suu daŋŋa hu mbassa ka magiraɗira.

Lona sa ka ŋgaam oloɗi, dla cora ti lina

²⁰ Ɓakagi boy namma ha maŋ suu vi Yakobma. Tewegi boy namma ha ki maŋ suu Yudana lay.

²¹ Humugi boyna haa, suu saarasi u to'onosi kaɗina. Irisi ka kasi may asi ka wiɗi, humusi ka lay asi ka humbi.

²² Agi hin ka ŋgaan kiɗi olo su? Yawe di na. Hin ka lagi ndaana fokonɗi su? An sa ka ii lumma ŋgolna ki u ŋgetlna na, ii hakara nam hin ka jak ki kaɗɗi a fafaɗta. Nam zal walak walak lay ni saɓakam kaɗi. Bil mamma ndak soo coco lay, hin ka jakgi.

²³ Na may suu asina hurusi ka jiviɗi, min yara ɦay lay. Asi yow tasi tuɗ ki hu li daŋŋa lay.

²⁴ Asi ka ɓak tasi kay tasi ana, «Ŋgaaygi Yawe Looyginaraɗi, nam saygi yona kaygi hu liim tew tew vun ɦoɗogolna lay, vun walla lay, goloygi njaf tlena tew eg liisi ma feɗta.»

²⁵ Ci maɗ magina ɓeŋ dla ndaɗta ki ni namu. Coogira doo dlara jivira ha ki ni ndaɗu.

²⁶ Kay ana duk suu mansina suu dlara vasina kaa, asi kagi cuculukka ko ndal suu gun layagina dleɓesira na, gunusi dawna fokosiya, asi vi suu warna.

²⁷ Ko ndal kaalamba oyra u layaginara na, ziisi ki oyra u tlesuu ɦurumba ni na may. Ko ndaɗta na asi mbuɗ ŋgolora u begera kosi coco lay,

²⁸ Ɗoori coco lay. Asi ti u dla cora ni asiya. Asi ka ŋga sa ɗegeena oloɗi, ka saa kay sa kuyunaɗi lay, dlaasira li kosi jiviya. Asi ka saa kay dlaŋ suu hahawraraɗi lay.

²⁹ Ni an ka ndak a lasi dla cora egesiɗi su? Yawe di na. An ka ndak a sa sugulun u suu co suu ko asi nanaɗi su?

Suu jok vun Lona, suu kaboyna, muli suu li ɓivunna suu vunusi ki gusina

³⁰ Dlara hahawra, haɗ huuna mba hu mbassa.

³¹ Suu jok vun Lona ɓak ki ni dlara kaboyna. Muli suu li ɓivunna min li ni dlara a fi huruɗta. Suu mansina hurusi heɓ ki wa. Na may agi hin lagi ni me ŋgoo dagan ologe?