JEREMI 49 - Boy Lonana

Ɓak ma kay suu Amonna

¹ Yawe ɓak kay suu Amonna anaba, na ni Israel gorra ka koɗɗi su? Suu a ti jona balamaɗna kaɗi su? Na ɗaŋŋi kay me Milkom tli Gad ki a jona ni ge, suu mamsina kak ki hu ɦoŋzina ni ge?

² Na ɗaŋŋi Yawe di ana buuna ka mbaa, ma suu Amonna hin tum tiina hu Rabbana, tii ma duuna. Ndaɗ hin mbuɗ ki ni li ma hahawra, ɦoŋziiɗ ma kiɗikka hin ŋgalam kiyo. Israel hin ti jo ma vi suu taɗ jooɗnana, Yawe di na.

³ Gurniya Hesebon, Ai ki ɓeŋiya, yagi kolo eŋŋe ɦoŋzi ma Rabba ma kiɗikka. Cukugi baraw bolla egegiya, yoorogi tagiya. Poyogi hu gulumunna. Milkom tuɗ ki mbaɓura wa. Suu maɗ muli suu li ɓivunna u suu mulina halaŋ lay.

⁴ Ni kay me ndak ŋga tak kay liik ma duk ɦoŋ ɦinirana nanige? Liik ma duk ɦoŋ ɦinira namma jivi cocoo, goora ndak viɗ ki wa. Ndak mayra hin tak kay bege makka sasak di ana, «Sa hin mba duurunna ni gegera?»

⁵ Na may ni an hin mbuɗuk ki ndaana ko ndaryakŋa halaŋ halaŋ, Bu Suuna Yawe, ma Saɓakŋa Kom Belna, di na. Agi hin njay kiyo, gegelay tin irim hu li ma vogom mun kamma duk na ɗegee, sa tok suu liŋ ki asina ka oloɗi.

⁶ Ŋgoo dagan dla ndaɗta ni an hin hoŋ Amon balamaɗu.

Ɓak ma kay Edomma

⁷ Yawe, ma Saɓakŋa Kom Belna, ɓak kay Edom anaba, Na ni saara yalna ka hu Teman oloɗi su? Suu mbeleŋŋa saarasi geɗeŋga yal masina viɗ ki wa.

⁸ Liŋigiya, pereɗegi ŋgorogiya, ŋgayagi tagi ki hu zulla, agi suu Dedanna. An mba ɓeŋga vi Ezawra kam wa. Ni hu li ma nam hin ɓak dlaamba kina.

⁹ Lini suu to wana mbay varak wa ni asi ka hin ii wa duk baara dewɗi. Lini suu kulla mbay njeŋge wa ni, asi ka hin vaɗi, yow tlena u saɓakasiya.

¹⁰ Ni an u tanda hin ɦurum Ezaw kiyo, bege mamba ŋgayra an hin yowoɗ ay ki kiɗiki. Nam ka ndak a ŋgay tam oloɗi. Suu hu njafamma, gorsemma, ndarayam suu zina hin casi ki halaŋ. Sa ka hin na dew olo a di boy nammaɗi.

¹¹ «Ndak haɗ huruk kay goryok suu kuyunaɗi, an hin wulusi ni anu. Boyogi mak suu hin ki donorana saa ni kan anu.»

¹² Gasi, Yawe ɓak anaba, Goloygiya, suu gin ka a ci gin hu va ma ci ma gasinaɗina, vasi daŋgayna a asi ci huwa, ndak may ni dla hin ka li kak oloɗi su? Ҥawaa, ndak ka li ki bay dla kakgi. Ndak hin ci hu va ma ci ma gasi namma may.

¹³ Gasi an suu tan ki u tanda, Yawe di na. Bosra hin mbuɗ ki ni li ma hahawra, li ma didiŋga, nam hin mbuɗ ki ni li ma suuna ŋgul tasi may, gi vunna maŋ tasi may u namma. Ҥoŋzi ma hin tam kamma halaŋ hin mbuɗ ki ni li ma didiŋga.

¹⁴ An hum boyna col ay fun Yawe hu li ma sa ŋgol ma duuna sunum ay eg suuna ana asi tok tasi tuɗ duu u ndaɗu. Yowoygi kolo tuɗuygi duuna.

¹⁵ Gasi, an hin mbuɗuk ki goora duk njaf suuna, ɦak ki maŋ suuna asi lasaku.

¹⁶ Ndak kal ki saɓaki, kay ana ndak gol tak ki ŋgolla su ndarayakŋa, mbuɗusi ki ndaana lay. Ndak mayra ka kakira hu zul gogoyrara, ɗiŋ kolo kay ɦini mayra fiyekkara. Lini ko ndal kokolora na ndak min ziik kolo kay li ma mbuyna ni, ay kolo hu li namma an hin zuɗuk ay ki kaŋgaa. Yawe di na.

¹⁷ Edom mbuɗ ki ni li ma kiɗik kiɗik ma hahawra. Suu tli egeɗ tokŋa halaŋŋi mbuɗ ki zolona, hu li ma asi wi tlena ki ɓeŋi nana, asi tii tii ma hahawra.

¹⁸ Ko ndal dla cora li eg Sodom, Gomor, u ɦoŋzi ma ŋguy kadna na, Yawe di na. Sa hin ka kak hu oloɗi, sa iiri hin ka buu hu li namma oloɗi.

¹⁹ Ko ndal dlona col ay duk cerew ma fun lumma Yurdanna na, tuɗ irim ha kay kaana tam ki minira na, na ɗaŋŋi ko ndal iira cemekka na ni an hin ɦuɗusi ha ki egeɗ na day, an hin mbaaɗ gorzoŋŋi suu duuna ay kaɗ na zak gaw. Kay ana sa ko an nana ni gege? Sa hin ndak a kaan ɓakŋa kanna ni gege? Sa gol iirira vi suuna ma hin col fokonna ni gege?

²⁰ Humugi boy ma Yawe minim ay kom kay Edomma haa. Ɓak ma nam kaam ay ki kay suu Temanna. Gasi daŋ may goryoŋ yoorina hin taɗasiya. Gasi daŋ may nam hin ɓeŋesi tlegeyesi ki ni kay dlasira.

²¹ U saɓak pukka asi puk kaŋgara ndaŋgara dlaka, delesira tiina tew ha ki ta ta fun Lum ma ŋgol ma Cerewna.

²² Ni ko ndal kokolo mayra pii kolo huulona ŋguyra na, ɓee garaŋaɗ ki duk ha kaŋga kay Bosra. Suu saɓak suu Edomma hurusi hin mbuɗ hu buu namma ko huu cara hu buu ma vuɗta na.

Ɓak ma kay Damasna

²³ Kay Damas ni gi Hamat u Arpad mbuɗ ki zolona. Ni kay ana asi hum boy ma cona. Asi mbuɗ ki yara ko mbo lumma ŋgolna sululla na. Kal ki saɓak yara cocoo, ka ndak a kak enɗi.

²⁴ Damas mbuɗ ki ndaana, ndaɗ pereɗ iriɗ ŋgoroɗ dagan a ndi liŋŋa. Ndaɗ mbuɗ dlak cocoo. Haɗ huuna u tiitara laɗ ko ndal cara hu buu ma vuɗta na.

²⁵ Ni nana ɦoŋzi ma jivi namma noyom ki nige, ɦoŋzi ma hurun furiyum ɦayna.

²⁶ Hu buu namma gaw ni gorzoŋŋi maɗ suu duuna puk kaŋga hu liiɗ namma. Suu maɗ suu duuna halaŋ vunusi hin seŋ kiyo. Yawe, ma Saɓakŋa Kom Belna, di na.

²⁷ An hin gi kura ki eg gulumun ma Damasna ndaɗ hin ŋgal ɦoŋzi ma Ben-Hadadna kiyo.

Ɓak ma kay Arabmana

²⁸ Kay Kedar u muli suu Hasor suu Nabukodonosor mul ma Babilonna yowosi ki umma. Yawe ɓak kasi anaba, Cologi kolo tuɗ duurugi Kedar. Cagi suu Kedemma kiyo.

²⁹ Yowosi mbutluɓ masina ay ki u yoori masisina, mbutluɓ masi ma gorina u tlegeyesi suu daŋŋa halaŋ halaŋ. Yowosi jambal masira ay ki may, gasi vunna ana, Dla cora ŋguy kagi na ŋguy.

³⁰ Ŋgayagiya, liŋŋigi hoŋgo zak ŋgayagi tagi hu zulla agi suu Hasorna. Yawe di na. Kay ana Nabukodonosor, mul ma Babilonna, min tam ay kagi wa, nam vi vunum ay u suu mamsina wa.

³¹ Cologi kolo tuɗ duurugi u njaf suu ka saa kay sa na ndeɗina, ka ci way kay dla na ndeɗi layna. Yawe di na. Vun goŋga ka kosiɗi lay, gu ma fun goŋgana ka kosiɗi lay. Asi ha ki colira ni keŋe.

³² Jambal masira suuna hin ɦurumuɗ kiyo, yoori masi suu bolow cocona hin hin ki a jona. An hin njayasi ki duk semeɗna keŋ lina fiɗi suu yasi eŋŋa, an hin mbaasi dla cora ay kasi keŋ lina bel. Yawe di na.

³³ Hasor hin mbuɗ ni li ma bayakka ti huna, hin mbuɗ ni li ma ki kiɗik ma hahawra. Sa hin ka kak hu oloɗi, sa wara hin ka kak huɗi lay.

Ɓak ma kay Elamma

³⁴ Ni hu li ma Yawe ɓak boy mamma maŋ sa jok vun Lona, Jeremi, kay Elam hu cokira Sedesiyas, mul ma Yudana, gijaŋ ti mullana.

³⁵ Na ɗaŋŋi Yawe, ma Saɓakŋa Kom Belna, ɓak anaba, An hin kus gu mbuurura vi Elamba kiyo, vaaɗ ma ndaɗ li saɓakŋa u namma.

³⁶ An hin mbaa semeɗna ay kay Elam hu lina fiɗi, keŋ lina fiɗi. An hin njayasi ki duk semeɗna, njaf suu ka hin a suu Elamma bay tewesi kaɗi.

³⁷ An mbuɗ suu Elamma ki maŋira fok suu babali masisina, fok suu min a casi kina. An mbaasi dla cora kasiya, yaanda kura keŋ keŋga. Yawe di na. An gasi ŋgewna kasi na su ta ta an daɓasi ki cira tuwa.

³⁸ An tin dlam manda hu Elam. An bulum mul ma huna u suu ŋgolo mam suu sunda kiyo. Yawe di na.

³⁹ Na may hu buu ma fokŋa an hin hoŋ Elam balamaɗu. Yawe di na.