JEREMI 48 - Boy Lonana

Boy ma ɓakam ki kay Moabma

¹ Yawe, ma Saɓakŋa Kom Belna, Lona vi Israel, ɓak maŋ Moab anaba, Ni dla co me kay Nebo nage? Ndaɗ ki ɓeŋiya. Zolona caɗ cocoo, Kiriyatam ki tliiya. Ҥoŋzi ma jivi ma zolona camma puk ki kaŋga wa.

² Moab seɗ ma tiina daɓ ki wa. Ay hu Hesebon asi li yal ma tii maɗna kaɗu. Tuɗuygi bulumuygi njaf suu asina kiyo. Ndak Madmen lay ni mbuɗ ki seŋŋira na yerek yerek. Ŋgewna ka ciɗik seku.

³ Yira suuna yi ana mbay njunusiyara col ay hu Horonam day, ɦurumba u ɓeŋga ŋgolla.

⁴ Moab ki tooya, goryoɗ yi kolo ŋgol coco ɦay.

⁵ Asi ɗiŋ kolo kay ɦinira Luhitta. Asi ɗiŋ kolo kaɗ u tiina, hin ɗiŋ ha ki kaŋga hu ɦuɗugumba Horonamba. Asi hum del suuna yi ay hu li ma cona.

⁶ Ŋgayagiya, gegelay ŋgay tamu. Agi mbuɗ ki ko ndal korra hu fullara na.

⁷ Ni kay ana ndak hin tak ki ni kay saɓak makŋa u bege makka, asi tlak wa. Kemok tuɗ ki mbaɓura wa. Muli mam suu li ɓivunna u suu muli mamsina halaŋ lay.

⁸ Sa li dla cora tli ɦoŋzina wa, ma suɗ ki kom dew kaɗi. Tlesuu duk ɦoŋ ɦinira bulum ki lay, suu duk buburana ɓeŋ ki lay. Ni dlara Yawe daɗta.

⁹ Minigi givin ma tii maɗ Moabma, ndaɗ hin ki ni jona ɦawaa, ɦoŋzi maɗna mbuɗ ki ni li ma hahawra, suu hurumma asi casi ki halaŋ halaŋ.

¹⁰ Cora ka kay sa ma li sunda vi Yawe hurum ka dewɗina. Cora ka kay sa ma ka min a ɦal busuɗum ki maŋ ŋgew mammaɗina.

¹¹ Moab ay kakira na en u goroɗ day. Ndaɗ koɗ taɗ ni hu zuluɗu. Day day ni sa jokoɗ uɗ kaki hu gegel ma daŋgi, a di gasira ni ndaɗ tuɗ ay ka ki mbaɓu buu dewɗi lay. Na wanni yulumum ka ni eg liiɗu, ndaɗ ka ni eg liiɗ a fafaɗta.

¹² Na ɗaŋŋi buuna ka mbaa, Yawe di na. An hin sun suu jok u tlena kina haa, asi hin jok u tlesuu hu doyogi masisinana kiyo, toosi gegeli masisina ki u saɓakŋa.

¹³ Moab hin mbuɗ ki zolona ko Kemok ko ndal suu Israelna mbuɗ ki zolona ko Betel ma njun kasina na.

¹⁴ Agi min a di ana, «Ami ni suu saɓakŋa, suu duu suu sunusi ki kay duunana.»

¹⁵ Sa li dla cora eg Moabma col ay duuna hu ɦoŋziiɗna wa. Gorzoŋŋi maɗ suu jivi ɦayna tuɗusi ha ki hu li ma ŋgaɗta, di boy namma ni Mul, ma sem ana Yawe, ma Saɓakŋa kom Belna.

¹⁶ Ɓeŋga vi Moabba mba wa tok, dla cora hin ndi kaɗu.

¹⁷ Ҥaɗ yoo magira agi halaŋ, agi suu vok ziiɗna, suu ndaɗ minisi ɦayna dagi ana, ni nana asi ɓeŋ saɓak ma ŋgol coco namma ki may, saɓak ma jivi cocona lay ni ge.

¹⁸ Cukugi ki kaŋga hu saɓak magina, lakagi u laara na ca agi suu Dibonna, sa li dla cora eg Moabma col duuna u ndak wa, nam ka took tlegeyek suu saɓakŋa kiyo.

¹⁹ Agi suu Aroerna cologi hu voɗta joɓogi suu liŋ a ŋgay tasina u suu usi hinna ana va lina ni mege?

²⁰ Moab zolona caɗ wanni tii ni tiriya. Gurniya, yagi suuna mbay njunugiya, ɓakagi ha ki hu Arnon ana Moab ki ɓeŋiya.

²¹ Ɓakŋa ka kay mbassa duk ɦoŋ ɦinirara, kay Holon, kay Yahas, kay Mefaat.

²² Kay Dibon, kay Nebo, kay Bet-Diblataim.

²³ Kay Kiriyatam, kay Bet-Gamul, kay Bet-Meon.

²⁴ Kay Keriyot, kay Bosra, kay ɦoŋzi ma hu mbassa Moabba, ma day dayna lay, ma tok tokŋa lay.

²⁵ Moab viɗ saɓakaɗ ki halaŋ, bikiɗ ki kusiya. Yawe di na.

²⁶ Gurɗugina ki u summa kay nam mbuɗ tam ki ŋgolla su Yawe. Gola nam ka bulum tam kaŋga duk vinimu. Nam mbuɗ ki va sanda wa.

²⁷ Israel mbuɗ ka ki iriŋ va sanda gasiɗi su? Aŋ faɗ ay duk suu kulla a aŋ ɓakaɗ dlaaɗta tew tew u kisikka kisik yaŋga su?

²⁸ Hinigi ɦoŋzina tuɗ kakagi ha ki kay ɦinira agi suu hu Moabma, agi mbuɗ ki ni gugukka vi ziiɗ hu li ma ko sa ka kal huɗina na, fun zandukka begera na.

²⁹ Aygi hum ŋga tara vi Moabbaɗi su? Ndaɗ ŋga taɗ ɦay. Ndaɗ di boy cona ɦay, ŋga taɗ coco ɦay lay. Ndaɗ ŋgul ndaryaɗna ɦay lay. Va ndaɗ ka fambina ni mege?

³⁰ An waɗ ŋga taɗta, Yawe di na. Ŋga taɗta pan tara. Dlara asi laɗta uɗ kaɗi lay.

³¹ Na may ni an ka gurni u Moab. An yi suuna ay mba njun Moab u bolowosi halaŋ. An oy tan kay suu Kir-Heresna.

³² An tii kakŋi suu mayra kay Yazerra, gu gugudlura Sibmara. Gogor kok la ta ta tew ha ki ko mbo lum ma galakŋa ii hiŋŋa, a tew ha ki hu Yazer. Sa li dla cora ndi kaŋga hu liik ma feɗ tlena, hu li ma toosi huna.

³³ Furira ŋgol cocora daɓ ki hu sene gugudlura, hu fulla vi Moabba. An haɗak sum veŋŋa ki hu ŋgalna wa, yira yi kolo u furira hu li ma to tlenara daɓ ki wa lay.

³⁴ Yira yi kolo ana suuna mbay njun Hesebonda, suuna humuɗ ha ki Elale lay, delesi tew ha ki ta ta Yahas lay, col ha Soar ta ta tew ha ki Horonam lay, Eglat-Selisiya lay, kay ana mbo lum ma Nimrimma so ki lay.

³⁵ An bulum Moab ki wa, Yawe di na. Suu ki kolo kay lii mbuyna li ɓivun ma ŋgalam ki ŋgalina, ɦal tlena ɦalla ɦawara maŋ loogi masi suu ɦawanana ki lay.

³⁶ Na may ni hurun tii kay Moab ko ndal diffa tiira na. Hurun tii kay suu Kir Heresna ko ndal diffa tiira na. Asi ba ki ni kay tlesuu asi fasi cocona.

³⁷ Na ɗaŋŋi asi wel yasi ki halaŋ lay ka ko ŋgusugina ki halaŋ lay, cal hu duk kosi ki lay, njun baraw bolla hurusi may.

³⁸ Kolo kay zigini suu Moabma lay, hu lina halaŋ lay ni, suuna yoo tasi ni yoori sak sak. Ana to Moab ki kaŋga ko va ma sa ka minimbina na. Yawe di na.

³⁹ Ni nanage, ndaɗ puk ki kaŋga wa. Gurniya, Ni nanage, Moab pereɗ ŋgoroɗ ki ko zolona. Moab hal dlara ndarayaɗna san uɗ panaɗta ɦay.

⁴⁰ Na ɗaŋŋi Yawe ɓak anaba, Ni ko ndal kokolora ŋguy kolo huulonara na, maɗ garaŋaɗ ki kay Moab.

⁴¹ Keriyot tlaɗ ki wa, Mesadot taɗ ki wa. Suu Moab suu saɓakŋa hurusi hin li hu buu namma ko ndal huu cara hu buu ma vuɗta na.

⁴² Moab ki ɓeŋiya, ka li a suu wara oloɗi, kay ana ndaɗ mbuɗ taɗ ki ŋgolla su Yawe.

⁴³ Ndaana, zulla ŋgolla, bayna ka fokogi agi suu Moabma, Yawe di na.

⁴⁴ Sa liŋ ŋgay tam ki ko ndaanana hin ndi kaŋga hu zulla ŋgolla. Sa ma ɗiŋ ay ki kolo hu zul ŋgollana bayna hin vamu. Gasi, an mbaaɗ dlara ay kaɗu, kay Moab hu basara ndaɗ hin ɓak dlaaɗta ki maŋ Bu Suunara, Yawe di na.

⁴⁵ Suu liŋ a ŋgay tasi ki na loɓ ki col u ŋgus Hesebon. Na may kura njay ay ki kasi hu Hesebon sin kura col ay hu zi ma vi Sihonna. Ku ndaɗta ŋgal zigini suu Moabma kiyo, ŋgal sok yam suu li dla cora ki lay.

⁴⁶ Ni dla co me kak nage Moab suu vi Kemokŋa viɗ ki wa. Goryogi suu njufiina asi yowosi tuɗusi ki mbaɓura wa, goryogi suu gorɓiina asi cukusi daŋgayna wa.

⁴⁷ Na may hu buu ma fokŋa an hin hoŋ Moab kolo balamaɗu, Yawe di na. Ɓak ma kay Moab ma daɓmi tani.