JEREMI 47 - Boy Lonana

Boy ma Bu Suuna ɓakam kay suu Filistinna

¹ Ni li ma Yawe ɓak boy mamma maŋ sa jok vun Lona, Jeremi, kay suu Filistinna jew bay Faraw ci suu Gazana ki tuwa.

² Na ɗaŋŋi Yawe ɓak anaba, ay ii ko ma mbayawna mbona ka tliya. Nam ɓaɗ ŋgol cocoo, suuna li ndaana kom ɦay. Nam tluɓ mbassa ki kaŋga u tlesuu kaɗna halaŋ. Ҥoŋzina u suu hurumma. Suuna yi kolo na bargak ana mbay njunusiya. Suu hu mbassa na halaŋ gurniya.

³ Vun ma sem kulumi mamsina lamma tay ndaŋgara kaŋga u keweɗ sesiya. Pupus mamma soo coco lay, sem li vunna ŋgolla coco lay. Somoyoŋ gorra hurusi ɓeŋi noy goryosi ki lay.

⁴ Ni kay buu ma ka mba a ci suu Filistinna ki halaŋŋa, ci suu usi hin gin hu Tir u Sidon a njunusina. Gasi Yawe ci suu Filistinna kiyo, suu hin iiri kay daara Kaftorra lay.

⁵ Vel ma wel yamba kal hu Gaza wa. Askelon mbuɗ ki seŋŋira na yerek yerek. Suu hin iiri hu ful masirana, ni saɓa ga agi hin mbuɗugi tagi gorira ni ge?

⁶ Ni dla co me nage, ŋgew ma vi Yawe na. Na ni aŋ hin seŋ taŋ duk koɗ taŋ ɗaŋ ki su? Kal ki hu ziiŋu. Seŋ taŋu, colla.

⁷ Nam hin seŋ tammi nanage hu li ma Yawe gam ay vun sunda kay Askelon fun mbo lum ma ŋgolna na. Nam vi vunum a ŋgaf tasi ni hu li namma.