JEREMI 46 - Boy Lonana

BOY MA LONA DAM KAY NJAF SUU DAŊŊARA OLO Suu Egiptena asi casi ki hu Karkemis

¹ Yawe ɓak boy mamma maŋ Jeremi kay njaf suuna ni arage.

² Maŋ Egipte kay asgaa ma vi Faraw Neko, mul ma Egiptena. Nam col ki ni fun mbo lumma Efratna, hu Karkemis, hu li ma Nabukodonosor, mul ma Babilonna, cam ki hu basara fiɗira vi Joakim, ma goŋ Josiyasna, mul ma Yudana.

³ Njaaragi tlesuu duuna ki u mbarina, tuɗugi fok a duuna.

⁴ Ganagi kulumina, fulugi kasi, vunugi kay cee tagi u jum magira duuna kagiya. Saɗagi ta sabiina kiyo. Cukugi koroŋ ma duuna egegiya.

⁵ Ni mege? An wi ni mege? Asi ki mbuɗi ndaana. Asi hoŋ dagan suu duu suu saɓak cocona asi palawasi kiyo. Asi yow liŋŋa ki njay na dew dew ka gol irisi ŋgorosi daganɗi. Asi mbuɗ ki ndaana bel bel. Yawe di na.

⁶ Sa tam feɗna lay ka ndak a suɗ kiɗi lay, ma saɓabak ɦayna lay ka suɗ kiɗi lay. Ay mbayaw na fun mbo lumma Efratna na ni asi daɓ na poŋ poŋ puk kaŋgaa.

⁷ Sa ko ndal lum ma Nilna tli ay kolora na ni ge ɗaŋge, ko ndal lumma ŋgolona ɓaɗ gukgukka na ni gege?

⁸ Egipte ni ko ndal lumma Nilna tli ay kolora na. Ko ndal mbo lum ma ŋgolona ɓaɗ gukgukka na. Ndaɗ di ana, «An hin tli ay koloo, hin tluɓ ndaŋgara ki kaŋgaa. An hin ɓeŋ ɦoŋzina ki lay, ci suu hurumma ki lay.

⁹ Suu kulumina tuɗ tlagi lina, suu pupusna sululugi ha kasi u yara. Ko suu saɓak suu duuna hal voɗta sel kira, suu hu Kusna u suu hu Putna suu wi yal mbari ma ŋguyna, suu hu Lud suu wi yal mbuurura yowoɗ kosiya.»

¹⁰ Na may buu namma Bu Suuna Yawe, ma Saɓakŋa Kom Belna, ni buu ma sa sugulna, sa sugulum u suu mam suu babilira. Ŋgewra ci suuna, hoɓ ki u asiya, guruɗ ki u busuɗusi lay. Ni buu ma furira vi Bu Suuna Yawe, ma Saɓakŋa Kom Belna, hu mbassa mbayawnara fun mbo lumma Efratna.

¹¹ Tuɗ hu Galaad hal kumuna go tamara Egipte. Ndak hal yal ma cil takŋa bolowra na ni ɦawaa, va cilik ki kaɗi.

¹² Njaf suuna humuk dla zolo makŋa kiyo, kay ana tii makŋa oy yam ndaŋgara kiyo. Sa saɓakŋa daɓ eg ndaram ma saɓakŋa asi puk kaŋga ko tasi mba' halaŋ.

Tlira tli Egipte kira

¹³ Boy ma Yawe dam maŋ sa jok vun Lona, Jeremi, a ɓak ki ana Nabukodonosor, mul ma Babilonna hin mbay kay mbassa Egiptera.

¹⁴ Dagi boy namma ha ki maŋ suu hu Egiptena, ɓakagi boy namma suu hu Migdolna humum kiyo, ɓakagi boy namma suu hu Memfisna humum ha kiyo, suu Tapanesna lay, dagi ana, Cola gol u lina. Ŋgewna ka ci suuna keŋegu.

¹⁵ Ni mege, Apis ndi liŋŋa wa. Mbutl ŋguru makŋa ka col fokosiɗi. Yawe zuɗum ki wa.

¹⁶ Nam ka puk suuna ki kaŋga ŋgol ɦay. Suu warna gegelay puk kaŋga kay ndaramma ndaramma. Asi di ana, «Coloygi koloo, hoŋoygi suu maygisina balamasiya, mbas maygira aygi vuɗ hura ki day eg ŋgew mayra ka wi hahaw saɗira.»

¹⁷ Tinigi semma kay Faraw, mul ma Egiptena, ana, «Vun ma lam bay saɓakŋa umma.»

¹⁸ An ka iiriya, mul ma sem ana Yawe ma Saɓakŋa kom Belna. Ko ndal ɦinira yaɗ ana Tabora duk ɦinira na, ko ndal Karmel duk mbo lum ma ŋgolnara na an hin mbaya.

¹⁹ Min tlegeyegi a tuɗ ki hu mbassa daŋgara agi suu hu Egiptena. Memfis hin mbuɗ ki ni li ma kiɗik kiɗik ma hahawra, ma ki ŋgalina, sa ka hurum oloɗi layna.

²⁰ Mbutl mayra wayra jivira Egipte may ay mbayaw na dliɓma yow ay mba kaɗu.

²¹ Suu duu suu dlasi co suu varaɗna lay ki ni ko ndal gor mbutli suu cilisi mbilisina na. Asi may ni ɦal ŋgorosi gaw. Asi liŋ ko tasi dew. Asi ka ndak a col fokosiɗi. Gasi buu masi ma ɓeŋga mbay kasi wa, li ma asi hin ɓak dlaasira kina mba wa.

²² Ndaɗ ndi liŋŋa u heɓpa ko ndal guyna suuna tuɗ kam nekkara na. Asi mbay kaɗ u njetna kosi ko ndal suu li sun guna na.

²³ Kaagira guuɗta kiyo. Yawe di na. Lini sa ka kal duk gu ndaɗtaɗi lay. Asi bolow cocoo su baarina. Sa ka ndak a ndumusiɗi.

²⁴ Egipte mayra jivira zolona ka caɗu. Ndaɗ ki hini maŋ suu mbayawna.

Egipte asi su kaɗu, Israel buɗ ki may

²⁵ Yawe, ma Saɓakŋa Kom Belna, Lona vi Israel, ɓak ana, «An hin li yara u Amon ma Tebma, u Faraw, u Egipte u loogi masisina u muli masisina u Faraw u suu ŋgay tasi egemma halaŋ.

²⁶ An ɦasi ki maŋ suu min a casi ki na, maŋ Nabukodonosor, mul ma Babilonna u suu mam suu sunda. Ŋgoo dagan wanni Egipte hin kak hu balamaɗ ma jewna.» Yawe di na.

²⁷ Na may aŋ, saan ma sunda, Yakob, li ndaaɗi, hin a dla ndaɗta suu kaŋgi, Israel. An hin buɗuŋ ay ki ko mbassa ay ki dayra, njafaŋ lay ay ki kay ndaŋgara asi ŋgay ki hura. Yakob hoŋ aya. Nam wi ki gasi wa. Nam ka kaki na en. Sa nam li ndaa kom ka oloɗi.

²⁸ Aŋ saan ma sunda Yakob li ndaaɗi. Yawe di na. An ka u aŋu. An ci njaf suu an manaŋ ay ki dukusina ki halaŋ halaŋ. Na may aŋ wanni an ka caŋ ki koɗi. An haɗaŋ a aŋ li u gaɗta ka hiniɗ jak ki kaŋgi.