JEREMI 44 - Boy Lonana

Dla cora li eg suu Yuda suu ŋgay tasi kina

¹ Boy ma ɓak Jeremina. Nam dam ki maŋ suu Yuda suu kak ki hu mbassa Egiptera hu Migdol, hu Tapanes, hu Memfis, hu mbassa Patrossa lay.

² Na ɗaŋŋi Yawe, ma Saɓakŋa Kom Belna, Lona vi Israel, ɓak anaba, «Agi wi dla co mayra an mbaaɗ ay kay Yerusalem u Yudara halaŋgi su? Gola asi cecemi bulum ki wa. Sa ka kak hu oloɗi.

³ Ni kay suu vun ma asi lama, asi ɓeŋen hurun ki u tuɗta asi tuɗ ŋgal ɓivunna may, goɓ kaŋga fok loogi suu li va ka kasiɗi layna, ka kagiɗi lay, ka kay somoyogiɗi layna.

⁴ An sunugi suu man suu sunda suu jokon vununna ana asi dagi na tew tew lay ana, lagi tlesuu co suu an ka minisiɗinaɗi.

⁵ Asi hum kaɗi lay, tin humusi ka a hom kay suluk masinaɗi lay, seŋ ŋgalla ŋgal ɓivunna maŋ loogi suu daŋŋara kaɗi lay.

⁶ Na ɗaŋŋi yaanda mba kasiya. Kura ko wanda na. Ndaɗ ŋgal ɦoŋzi ma Yudana u voɗta Yerusalemba kiyo. Asi mbuɗ ki ni didiŋga hu jonara, li ma hahawra. Ni dlara ka cecem wanda daŋ may.

⁷ Cecem wanda ɗaŋŋi Yawe ma Saɓakŋa, Lona vi Israel, ɓak anaba, ni kay me agi tuɗ fok u lira lagi dla cora eg tagira na gak gak ge? Ta ta gagi njafaagi ki hu Yuda ge? Njufiina, boyogina, kemba vuɗ wilira u suu fun pona tuna lay, hin sa ka iiri na dewɗi.

⁸ Gasi daŋ may ni agi ɓeŋen hurun ki u dlara agi laɗta. Agi ŋgal ɓivunna maŋ loogi suu daŋŋa hu mbassa Egiptera. Agi tuɗ ŋgay tagi hura. Agi hin gagi njafagi kiyo. Agi hin mbuɗ ni va suuna hin gi vunna maŋ tasi u namma duk njaf suuna halaŋ kay ndaŋgara.

⁹ Agi maa dla cora somoyogi laɗta ki wa su? Dla cora muli suu Yudana u boyogosi laɗta lay su? Dla cora li egegi tagira lay, ta li eg boyogogira lay. Suluk ma suuna lam hu mbassa Yudara, hu voɗta Yerusalemba lay su?

¹⁰ Ta ta karam lay ni asi wi dlara hahaw ka egesiɗi. Asi ka wi yal ma ŋga suunaɗi, asi ka tuɗ u gaɗtaɗi lay, yal ma an takaginana lay, takam maŋ somoyogina lay.

¹¹ Na ɗaŋŋi Yawe, ma Saɓakŋa Kom Belna, Lona vi Israel, ɓak anaba, an hin mbuɗ irin egegi a lagi dla cora. An hin gi njaf suu Yudana ki halaŋ.

¹² An hin tli nekka vi suu Yuda suu usi hin iiri suu tuɗ a ŋgay tasi ki hu Egiptena. Asi hin miɗ ki halaŋ. Asi hin puk ki kaŋga hu mbassa Egiptera, hin casi ki u ŋgewra u mayra. Asi halaŋ halaŋ kemba u suu ŋgolona hin miɗ ki ko ŋgewra, ko mayra. Asi hin mbuɗ ki hahawra, hin mbuɗ ki ni va ma suuna san umma, gi vunna maŋ suuna u namma lay.

¹³ An li dla cora eg suu hu mbassa Egiptera ko an li eg suu Yerusalemma na may, casi ki u ŋgewra, mayra lay, tuguɗi bora lay.

¹⁴ Sa hin ka hin iiri duk suu Yuda suu hin iirinaɗi lay, duk suu tuɗ ŋgay tasi ki Egiptenaɗi lay. Sa hin ka hoŋ hu mbassa Yudanaraɗi ta asi saarasi tini a hoŋ kak huruɗtaɗi, asi hin ka hoŋ huɗi suu usi hinna suu ɦiw kala.»

Suuna ŋgal ɓivunna maŋ loogi suu daŋŋa

¹⁵ Suu may suu wi ana boyogosi ŋgal ɓivunna maŋ loogi suu daŋŋana, boyogosi suu moli bolow hu li nammana, suu kaki hu mbassa Egiptera halaŋ, suu hu Patrosna hoŋ dira maŋ Jeremi ana,

¹⁶ «Gasi daŋ may aŋ dami boy namma ni u sem Yawe may, ami ka humuŋgi.

¹⁷ Ami min li ni dlara ami vi vunumi kaɗ a laɗta. Ŋgalami ɓivunna maŋ mul cara kolo huulonara. Ami hin ɦaɗ mbul ma his jivina ko ami li ay hu ɦoŋzi ma Yerusalemma u ma Yudana na. Ami tamira lay, somoyomi lay, muli mamisina lay, suu ŋgolo mami suu sunda lay. Ko ndaɗta na ami fami fu ma tira um hin ki komi lay. Ami kaki u heɓpa ka wami dla co egemiɗi lay.

¹⁸ Hu li ma ami seŋ ŋgalla ŋgal ɓivunna maŋ mul cara ay dayna u vora vooɗ mbul ma his jivinara ni ami ka fi vaɗi lay. Ami miɗ ki ko ŋgewra u mayra.»

¹⁹ Boyogina di olo ana, «Hu li ma ŋgalami ɓivunna maŋ mul cara huulonara may, vooɗ mbul ma his jivina ay may ni na ni kay tami bay njufuyumi hu su, ami gaɗ komnjoɗi ma tak ki kaɗna u mbul ma ami vooɗna kina su?»

²⁰ Na ɗaŋŋi Jeremi di suuna halaŋ, maŋ njufiina, boyogina, maŋ suu wara suu hoŋom dira ko ndaɗ tanana halaŋ.

²¹ «Ɓivun ma agi ŋgalam hu ɦoŋzi ma Yudana, hu voɗta Yerusalembana agi tagira, somoyogiya, muli magisina, suu ŋgolo magi suu sunda, suu magi suu ɦizina. Ka ni dlara Yawe gi humba kaɗtaɗi su? Boy namma humum gam ay kammi nambi su?

²² Yawe ka a siɓ dla coogira agi laɗta oloɗi. Na may mbas magira mbuɗ ki ni sene ma jona. Li ma kiɗik kiɗik ma hahawra. Nam mbuɗ ki ni li ma suuna gi vunna maŋ tasi u namma. Suu hurumma casi ki halaŋ halaŋ. Gasi ni dlara ka cecem wanda.

²³ Ni kay ana agi ŋgal ɓivunna agi mbuɗ ki cora fok Bu Suuna ni na, agi humum delem kaɗi, tuɗ ka u gaɗ mambaɗi lay, dlara nam daɗtaɗi lay, gasi ni na, dla cora mba kagi ni na. Ni dlara cecem wan daŋga gasi.»

²⁴ Na ɗaŋŋi Jeremi di suuna halaŋ, maŋ boyogina halaŋ ana, «Humugi boy ma vi Yawena haa, agi suu Yuda suu hu mbassa Egiptera.

²⁵ Na ɗaŋŋi Yawe, ma Saɓakŋa Kom Belna, Lona vi Israel, ɓak anaba, u agi boyogina ki dii lay, ki lii lay, agi di ana ami min takki ni dlara ami min a laɗta. Ami ŋgal ɓivunna maŋ mul cara huulonara, vooɗ mbul ma his jivina ay may. Lagi dlaagira agi min a laɗta, lagi ɓivun magina.

²⁶ Na ɗaŋŋi humugi boy ma vi Yawena haa, agi suu Yuda suu kaki hu mbassa Egiptera. An suu tan u sen ma ŋgolna. Bu Suuna di na. Sa hin ka yan sen hu mbassa Egiptera oloɗi, sa ma Yuda hin ka di ana, Yawe ka iiriyaɗi.

²⁷ An irin ka tini kasi na ta a lasi dla cora egesira, ka lasi dla jivi egesiɗi. Suu Yuda suu hu Egiptena hin miɗ ki fun ŋgewra, mayra lay ta ta gasi njafasi kiyo.

²⁸ Njufii suu ɦiw ka bolowɗi, hin suɗ ki fun ŋgewra hin hoŋ hu mbassa Egiptera u Yuda. U suu hin iiri suu Yuda suu tuɗ ŋgay tasi hu Egiptena hin wi ana an u gasira ni an ɗowba asi su?

²⁹ Gola ni va ma hin tak ki na, Yawe di ana, sa hin takagi ana an hin lagi dla cora egegi hu li wanna ni gege? Hin takagi ana dlaanda hin li ki egegi kay dla coogira ni gege?

³⁰ Na ɗaŋŋi Yawe ɓak anaba, an hin ɦal mul ma Egiptena Faraw Hofra ki maŋ suu mam suu babalira, suu min a cam kina ko an ɦal Sedesiyas mul ma Yudana ki maŋ saam ma babalira Nabukodonosor mul ma Babilon ma min a cam kina na.»