JEREMI 43 - Boy Lonana

¹ Hu li ma Jeremi daɓ dlara Yawe, Loosina, damba ayra ki ɓakŋa maŋ suuna halaŋŋa, boy ma Yawe, Loosina, ɓakam ay maŋ suuna halaŋ halaŋŋa ni,

² Azariya, ma goŋ Hosayana, Yohanan ma goŋ Kareana u suu ŋgolo suu di boy ma cona halaŋ ɓak boyna maŋ Jeremi ana, «Kaboyna! Dlara aŋ daɗta ka jiviɗi. Yawe, Looygina, sunuŋ ay ka egemi ana aŋ dami ana ami ka tuɗ ŋgay tami Egipteɗiraɗi.

³ Ni Baruk ma goŋ Neriyana tuɗuŋ ki hu dla cora ni namu. Nam min a ɦami ki maŋ suu Kaldena a asi cami kira. A asi yowomi tuɗumi ki Babilonda.»

⁴ Ka Yohanan, ma goŋ Kareanaɗi, lay, ka suu ŋgolo suu fok suu duunanaɗi lay, sa na dew lay ka hum del Yawe hu li ma nam yasi ana asi hin kakira ni hu mbassa Yudaraɗi.

⁵ Yohanan, ma goŋ Kareana, u suu ŋgolo suu fok suu duunana halaŋ tli nek suu hin iiri suu Yudana, suu hoŋ ay buu hu Yudana hu li ma asi njay ay ki hu mbassa keŋesira.

⁶ Njufiina, boyogina, kemba, goryoŋ mulinana, suuna halaŋ suu Nebuzaradan sa ŋgol ma gol suuna hu taraŋgana ɦasi maŋ Gedaliya ma goŋ Ahikamma ma goŋ Safanna, Jeremi sa jok vun Lona may, Baruk ma goŋ Neriyana may.

⁷ Min ka a hum del Yaweɗi. Asi tuɗ ki Egipte, asi tuɗ ta ta tew ki Tapanes.

Jeremi ɓak ki kay duu ma li hu Egiptena

⁸ Na ɗaŋŋi Yawe ɓak boy mamma maŋ Jeremi hu Tapanes,

⁹ «Yow gogoyra ŋgolora ki ii suu Yuda suu ɦiw kiɗikki, tosoɗ ki kaŋga duk luɓuna hu vun ziŋ Faraw ma Tapanesna.

¹⁰ Aŋ hin dasi olo ana, Yawe, ma Saɓakŋa Kom Belna, Lona vi Israel, ɓak ana, an hin sun hal saan ma sunda Nabukodonosor mul ma Babilonna. An hin kakam mulna kolo kay gogoyra aŋ tosoɗ kaŋgara. Nam hin pi mbutluɓ mamma ni hu li namma.

¹¹ Nam hin mbaya, nam hin waɗ mbassa Egiptera. Ci sa a cam kina kiyo. Sa a tuɗum ki mbaɓurana tuɗum kiyo. Sa a cam ki u ŋgewnana cam kiyo.

¹² An hin gi kura ki eg zigini suu vi loogi suu Egiptena, ndaɗ hin ŋgal loogi asina kiyo. Ndaɗ hin tuɗ ki u asiya. Ndaɗ hin ɦurum Egipte ki ko sa taa yoona gi njaf ndaara ki eg baraw mammara na. Nam hin hoŋ hu liiɗna va ka lambi.

¹³ Nam hin ŋgal ɦoŋzi ma faɗta ki hu mbassa Egiptera, nam hin ŋgal ziŋ loogi suu Egiptena kiyo.»