JEREMI 42 - Boy Lonana

Jeremi asi tuɗum ki Egipte u eŋga

¹ Na ɗaŋŋi suu ŋgolo suu fok suu duunana halaŋ, Yohanan, ma goŋ Kareana, may, Azariya, ma goŋ Hosayana, u suuna halaŋ, kemba u suu ŋgolona ɦuɗ tasi ay

² eg sa jok vun Lona, Jeremi, dam ana, «Hinimi voɗta ami tii tami egeŋu. Tii taŋ ha eg Yawe, Looŋŋa, kay umira hin ew wanda. Gasi ami suu hin iirina ni ew ɦawaa, may ami li ay jew ni bolowo. Aŋ wi dla ndaɗta lay.

³ Ko Yawe, Looŋŋa, takami voɗta ami tlaɗta, dlara ami laɗta.»

⁴ Sa jok vun Lona, Jeremi, dasi ana, «Humiya. An hin tii tan eg Yawe, Loogina, ko agi joɓonda na may. An hin jokogi boy ma Yawe hoŋogi dira ay u namma ki may, hin ka hin maa ki hurunɗi.»

⁵ Asi may ni hoŋ dira maŋ Jeremi ana, «Ko Yawe li ni sa ma a di kami gasi a fafaɗtana. Ami hin li ni ko boyna vi Yawe, Looŋŋa, dami ayra na.

⁶ Li ni boy namma furyumi hurumi ɗowba ɓeŋemi hurumi lay ni, ami hin hummi del Yawe, Loomina, ma ami sunuŋ ha egemma. Dlara hin tuɗ jiviya, kay ana ami hin hummi vun Bu Suuna, Loomina.»

⁷ Tew buuna doogo ni Yawe ɓak boy mamma maŋ Jeremi.

⁸ Nam may ni yi Yohanan, ma goŋ Kareana, u suu ŋgolo suu fok suu duunana halaŋ suu ŋguy kamma u suuna halaŋ, kemba u suu ŋgolona lay.

⁹ Nam hin dasi ana, «Yawe, Lona vi suu Israelna, ma agi sunun egem ana an tuɗ tii tan egemuna ɓak ɗaŋŋi anaba,

¹⁰ Lini agi vi kagi a kak hu mbas ndaɗta ni an hin hoŋogi balamagiya. An hin ka paliyagi ki oloɗi, an hin hoŋogi balamagiya ka paɗagi kiɗi. An hin minigi ii dla cora agi laɗta.

¹¹ Lagi ndaa ko mul ma Babilon ma agi li ndaana komma oloɗi. Lagi ndaa kom oloɗi, Yawe di na, kay ana an ka u agi a buɗugi kira a ɓaɗagi ay ki ko saɓak mammara.

¹² An hin wagi hahawagiya. An wagi hahawagi wa ni nam hin hinigi agi kak kay ndaŋga magira.

¹³ Na may lini agi di ana, agi ka min kak hu mbas ndaɗtaɗi, ka hum del Yawe, Looginaɗi.

¹⁴ Lini agi di ana ɦawaa ami min a hoŋŋi Egipte hu li ma ami ka a wi dlara duuna oloɗi, hu li ma ami hin hum sawalla duuna oloɗi lay, hu li ma ami hin ka wi haw fu ma tira oloɗi layna, ami min kakŋi hu li namma.

¹⁵ Na may ɗaŋŋi humugi boy ma vi Yawena agi suu Yuda suu hini iirina. Na ɗaŋŋi Yawe, ma Saɓakŋa Kom Belna, Lona vi Israel, ɓak anaba, lini gasi daŋ may agi cukugi tagi hu voɗta wa a tuɗ Egipte, tuɗ a ŋgay tagi kiyo ni,

¹⁶ ŋgew ma agi lam ndaaramma hin fagi ha tana hu mbassa Egiptera. Mayra agi saa kaɗ cocora hin tuɗ ha ugi lay ta ta hu Egipte, agi hin miɗ ki ni hu li namma.

¹⁷ Suu war suu hin cuk tasi hu voɗta tuɗ ŋgay tasi ki hu Egiptena hin casi ki u ŋgewra, mayara u tuguɗi bora. Sa hin ka suɗ kiɗi, ka hin iiriɗi lay ko dla cora an mbaasira ay kasira.

¹⁸ Gasi Yawe, ma Saɓakŋa Kom Belna, Lona vi Israel, ɓak anaba, ko yaanda li eg suu Yerusalemma na ni, yaanda hin li egegi hu li ma agi hin tew ha ki Egiptena ni na may. Agi hin mbuɗ ki zolona. Suuna hin li dla cora ni u segi na tew tew. Agi hin ka fagi li namma oloɗi.

¹⁹ Yawe ɓakagi magi agi suu Yuda suu hin iirina ana, agi tuɗ Egipteɗi. Agi wi karam kagi ana anni sa ma diki kagina.

²⁰ Agi hal ni dlara viɗ iiri magira kira. Agi tagira sunungi eg Yawe, Loogina, dangi ana, tuɗ tii taŋ eg Yawe, Looygina. Aŋ hin hoŋomi boy ma Yawe, Looygina, damma ki dira jiviya, ami hin li um may.

²¹ An li dagi boy namma ki cecem may agi ka humugi del Yawe Looginaɗi. Agi ka hum dlara nam danda ay magira na ndeɗi lay.

²² Cecem wanda agi ndak wi ki kagi jivi ana asi hin cagi ki u ŋgewra, mayra u tuguɗi bora hu li ma agi min tuɗ a ŋgay tagi huna gaw.»