JEREMI 41 - Boy Lonana

¹ Hu til ma kiɗisiyana, Ismael, ma goŋ Netaniyana, ma goŋ Elisamana, hu deera mulla, nammi duk suu ŋgolo suu sunda vi mulna, mbay eg Gedaliya ma goŋ Ahikamma hu Mispa ko tasi u suuna doogo. Asi ti funa hu Mispa ko tasi dew.

² Na gaw ni Ismael, ma goŋ Netaniyana, u suu ay ko tasi doogona ci Gedaliya, ma goŋ Ahikamma, ki u ŋgewra. Ko ndaɗta na nam ci sa ma mul ma Babilonna tinim a ka ɓakŋa hu mbassa na kiyo.

³ Ko ndaɗta na lay Ismael ci suu Yuda suu u namma ki ko tasi u Gedaliya hu Mispa. Suu Kalde suu asgaa suu hu Mispana lay.

⁴ Asi ci Gedaliya ki tew buuna mba' sa humum dlam kaɗi.

⁵ Suuna col ay Sekem, Silo, Samari mbaya. Asi dok-kalavandi. Njeresi ki weliya, baraw ma egesina ki hariya, tasi ki mbilina bel bel. Asi yow tlesuu li ɓivunna u mbul ma his jivi ma tinim hu zira vi Lonara ay kosiya.

⁶ Ismael, ma goŋ Netaniyana, kal ay ki Mispa ŋgafasiya. Nam tuɗ ha egesi na ni tiira. Nam tew ha ki egesi may ni hin dasi ana, «Mbaagi ay gologi Gedaliya ma goŋ Ahikamma.»

⁷ Asi tew ha ki hu ɦoŋzina may ni Ismael, ma goŋ Netaniyana, casi ki ci ci ni cukusi maɗasi ki hu zulla. Nam u suu tuɗ umma.

⁸ Suuna dukusi mba' di Ismael ana, «Cami kiɗi, tlegeyemi suu tira ka ŋgay hu senena, wa blena, mbulna u mbul yumma.» Ismael hin casi ka ki u gorsesinaɗi.

⁹ Zul mayra Ismael cuk maɗ suu nam casi kina huruɗta ni zulla ŋgolla mulna Aza gaɗ hu li ma Baesa ma Israelna duu u namba. Ismael, ma goŋ Netaniyana, oyoɗ ki u maɗ suuna.

¹⁰ Na ɗaŋŋi Ismael yow suu hini iiri duk suu Mispana. Goryoŋ mulina suu gorɓiina suu hin ka hu Mispa tuna. Suu Nebuzaradan sa ŋgol ma gol u suunana ɦasi maŋ Gedaliya ma goŋ Ahikamma. Ismael, ma goŋ Netaniyana, yowosi iiri tuɗ ŋgaf suu Amonna u asiya.

Asi mbuɗ suu daŋgayna kiyo

¹¹ Asi hum dla ci maɗ ma goŋ Netaniyana, Ismael, Yohanan, ma goŋ Kareana, u suu ŋgolo suu duuna suu u namma halaŋ.

¹² Tok suu masi suu duuna halaŋ tuɗ duu u Ismael, ma goŋ Netaniyana. Asi fam fun hurgukka Gabaonda.

¹³ Hu li ma suu ay u Ismaelna wi Yohanan, ma goŋ Kareana, u suu ŋgolo suu duuna u suu masisina tuɗ umma, asi li furira.

¹⁴ Suu may suu Ismael yowosi ay iiri hu Mispana halaŋ wi na ni hoŋ dagan eg Yohanan, ma goŋ Kereana.

¹⁵ Ismael, ma goŋ Netaniyana, may ni pii ki u suuna um kalavandi fok Yohanan, ma goŋ Kereana, nam hin tuɗ ki eg suu Amonna.

¹⁶ Na ɗaŋŋi Yohanan, ma goŋ Kareana, u suu ŋgolo suu fok suu duunana suu tuɗ umma tli nek u suu hinna kosiya, suu may suu Ismael, ma goŋ Netaniyana, yowosi ay iiri hu Mispa ŋgoo dagan cira asi ci Gedaliya, ma goŋ Ahikamma, kira, suuna, asgaana, boyogina, gorkemba u sa ŋgol ma gol u suuna hu taraŋgana hoŋosi ay hu Bagaoŋ.

¹⁷ Asi cuk tasi voɗo, tuɗ lak fun kaa ma Kimehamma, tok eg Betlehem, tok a tuɗ Egipte.

¹⁸ Asi ŋgay ko suu Kalde suu asi li ndaana kosina kay ana Ismael, ma goŋ Netaniyana, ci Gedaliya, ma goŋ Ahikamma, kiyo, sa ŋgol ma kaɓakŋa hu mbassa ma mul ma Babilonna tinimma.