JEREMI 40 - Boy Lonana

Jeremi kak eg Gedaliya

¹ Yawe ɓak boy mamma maŋ Jeremi ŋgoo dagan hu li ma sa ŋgol asgaana Nebuzaradan sunum ha ki hu Rama. Nam vam ki komu, na may nam u galina sem njuni duk suu daŋgay suu Yerusalem u Yudana halaŋ halaŋ suu yowosi a tuɗusi ki Babilonna.

² Sa ŋgol asgaana vam ki komu, hin dam ana, «Ni Yawe, Looŋŋa, li dla cora eg li namma ni namu.

³ Yawe mba dla ndaɗta aya. Nam li ni ko nam di kaɗ a laɗta na daŋ may. Ni kay ana agi li cora eg Yawe, kay ana agi humum delem kaɗi, dla ndaɗta mba ni na.

⁴ Na may cecemmi wan daŋga karam gaw ni an hin buɗuŋ gali ma seŋŋa kiyo, lini aŋ min a tuɗ tinin Babilonni aŋ mbaya an hin goloŋ jiviya. Na may lini aŋ ka min a tuɗ tinin Babilonɗi ni, mbayɗi. Ndaŋgara u ŋgoloɗ halaŋ ka fokoŋu.

⁵ Lini aŋ ka min a kak u anɗi ni, aŋ hoŋ eg Gedaliya, ma goŋ Ahikamma, ma goŋ Safanna, ma mul ma Babilonna, tinim a sa ŋgol ma kaɓakŋa hu Yudana kak u nam duk suuna ɗowba tuɗ hu li ma huruŋ min a tuɗ huna.»

⁶ Na ɗaŋŋi Jeremi tuɗ Mispa eg Gedaliya ma goŋ Ahikamma. Nam kak u nam duk suu hin ka hu mbassa tuna.

⁷ Suu ŋgolo suu fok suu duuna suu hinisi ha hu li ma duunana halaŋ, asi u suu masisina hum ana mul ma Babilonna ɦal ŋgolla maŋ Gedaliya, ma goŋ Ahikamma, a kaɓakŋa hu mbassa. Nam hin ɦam njufiina, boyogina u gor kemba, suu wara suu ɦiw suu hu mbassana lay, suu may suu yowosi tuɗusi ka Babilonɗina.

⁸ Asi mbay eg Gedaliya hu Mispa, ni Ismael, ma goŋ Netaniyana, Yohanan u Yonatan goryoŋ Kereana, Seraya, ma goŋ Tanehumetna, goryoŋ Efai, ma Netofana, Yazaniya, ma goŋ Maakana, asi u suu masisina.

⁹ Gedaliya, ma goŋ Ahikamma, ma goŋ Safanna, ɓakasi boy namma u suu masisina ana, «Lagi u dlara vi suu Kaldenara, lagi ndaa koɗɗi. Kakagi hu mbassa, gagi yagi kaŋga u mul ma Babilonna, dlara hin tuɗ jiviya.

¹⁰ An kak ki hu Mispa ki duk suu Kalde suu mbay varaygina. Agi may ni lagi sum veŋŋa, duɗugi vuɗ tlena, yoorogi mbulna, ŋgayagisina kolo ugiya, kakagi hu mbassa agi cuk huruɗta.»

¹¹ Na may ni suu Yuda suu ka hu Moabma duk suu Amonna, hu Edom u mbassa halaŋ halaŋga hum ana mul ma Babilonna min ziim ha hu Yuda, nam hin ɦal ŋgolla maŋ Gedaliya, ma goŋ Ahikamma, ma goŋ Safanna a kaɓakŋa.

¹² Asi hoŋ ay halaŋ hu li ma asi njay ha ki huna. Asi mbay eg Gedaliya hu mbassa Yudara hu Mispa. Asi li sum veŋŋa, duɗ vuɗ tlena ŋgol cocoo.

Asi ci Gedaliya kiyo

¹³ Asi tew ki eg Gedaliya hu Mispa, Yohanan, ma goŋ Kereana u suu ŋgolo suu fok suu duunana suu hinisi ha fun duunana halaŋ,

¹⁴ dam ana, «Aŋ wi ka ana Baalis, mul ma vi suu Amonna ɦal voɗta maŋ Ismael, ma goŋ Netaniyana, ana nam caŋ kiyoraɗi su?» Na may Gedaliya, ma goŋ Ahikamma, vi boy namma ka kambi.

¹⁵ Na ɗaŋŋi Yohanan ma goŋ Kereana joɓ Gedaliya hu Mispa ki ŋgay gumunu ana, «Ҥan voɗta an tuɗ ci Ismael, ma goŋ Netaniyana, ka a sa wiɗi. Aŋ min gasi ana nam caŋ ki su? Suu Yuda suu ŋguy kaŋŋa halaŋ hin hin ki kay tasiya u suu Yuda suu hinna hin miɗ kiyo.»

¹⁶ Gedaliya ma goŋ Ahikamma hoŋ dira maŋ Yohanan, ma goŋ Kereana, ana, «Li dla ndaɗtaɗi, dlara aŋ ɓakaɗ kay Ismael wanda ki coo.»