JEREMI 4 - Boy Lonana

¹ Lini ndak hoŋ aya ni, ndak hoŋ ay ni egen anu. Yawe di na. Lini ndak yow zozot makka ki fokonu ni ndak hin ka poy na dadam oloɗi.

² Lini ndak suu tak u iirira vi Yawera ni u gasira, ɗegeera u jivira, na ɗaŋŋi njaf suuna hin fi heɓpa u semu. Asi hin fi ŋgara ni umu.

Yira yi suuna a mbuɗ hurusi ki fafaɗta

³ Na ɗaŋŋi Yawe ɓak suu vi Yudana u suu vi Yerusalemma ana, poogi sene magina kiyo, zaaragi tlena kaŋga duk wayraɗi.

⁴ Ҥagi hurugi ki maŋ Yawe. Cukugi dla cora hurugira kiyo, suu vi Yudana u suu Yerusalemma. Li ka naɗi ni yaanda hin njay ki kagi ko kura na. Ndaɗ hin ŋgalagiya, sa ka tew a caɗ kiɗi ni kay dla cora agi laɗta.

Tii ma hahawra huu Yuda

⁵ Yagi ha kolo hu Yuda, ɓakagi ha maŋ suu Yerusalemma asi hum may. Buugi tokolomma hu mbassa. Yagi ha kolo u delegira ŋgolla dagi ana, tokogi tagi a kalagi hu li ma eŋŋa.

⁶ Yagi yira hahawra ha ii ko ma vi Siyonna na. Tuɗugi kak u ŋgusuna. Cologi duk hu voɗtaɗi. Ni hahawra an ka mbaaɗ ay ii ko ma mbayawnara ni dla cora ŋgolla.

⁷ Dlona hin kal ay ki hu zulumu. Sa ci suuna kina hin gi tam ki hu voɗta. Nam kal ay ki vo varam a mbuɗugi mbas magira ki hahawra. Ҥoŋziigina hin ŋgalam kiyo, ci suu hurusina ki may.

⁸ Kay boy namma wanni cukugi baraw bolla egegiya. Yoorogi tagiya. Gagi soolla hahawra. Ҥawaa, yara vi Yawe ka jak ki kaygiɗi.

⁹ Hu buu namma gaw ni, Yawe di ana, ɦiŋga vi mulna u suu ŋgolonara hin viɗ kiyo. Muli suu li ɓivunna hin mbuɗ ki hahawra. Suu jok vun Lona hurusi ɓeŋ ki lay.

¹⁰ An di ana, «Ҥii, aŋ, Bu Suuna Yawe, ɓeŋ suu asina ki ŋgol gasi daŋ may. Aŋ di suu Yerusalemma ana asi hin fi heɓpa.» May ŋgewra ka caygi kiyo.

Suu ci suuna sel ay ki hu lina na halaŋ halaŋ

¹¹ Hu li namma ni asi hin di suuna, di Yerusalem ana, semeɗ ma kura keŋ keŋŋa ay ka hu fulla voɗ a mbay kay suu mansina, ka siirisi kiɗi, ka torosi kiɗi.

¹² Semeɗ ma saɓakŋa cocona col ay ni egen tanda day. Cecem wanda, an may ɗaŋŋi kaasi ɓakŋa kasiya.

¹³ Ko ndal ɗugulla na asi col kolo duuna, pupus mamma soo ko ndal semeɗna na, kulumi mamsina jaŋ ko ndal ɓarawna piira na. Aygi ki hahawi. Asi caygi ki wa.

¹⁴ Mbus huruk ki u dla cora halaŋ, ndak hin buɗ kiyo Yerusalem. Ndak hin paɗ saara cora ki hurukŋi sabage?

¹⁵ Ay hu Dan day asi yi ay koloo. Ay kay ɦinira vi Efrayimba day asi ɓak dla cora.

¹⁶ Neegi suuna, neegi Yerusalem. Suu duuna col ay hu mbassa dayra ka mbaya. Asi ka yi ay kolo a duu u ɦoŋzi ma Yudana.

¹⁷ Ko ndal suu gol senena na, asi sel ay kaɗ ni hu lina halaŋ halaŋ. Ndaɗ li yara ni egenɗi su? Yawe di na.

¹⁸ Tuɗ makka u dlara ndak laɗta takak ki ni cookka. Ni vuɗ huruk ma conaɗi su? Gasi daŋ may ki galaa cocoo. Dla ndaɗta waɗakŋi kay muguluk na gay.

Tiitara Jeremi faɗ duk dla corara

¹⁹ Hurunu, hurunu, an torɗi tan ko tiitara. Mugulun mbuɗ tuɗ na zak zak. Hurun ki mbuɗi yara. An ka ndak a seŋ tanɗi kay ana an hum del tokolom ma duuna.

²⁰ Asi yi kolo ana, «Dla cora u dla cora.» Gasi, mbassa halaŋ ki ɓeŋiya. Gol irinu ni, liimina u suu mansina ki ɓeŋi lay. Kak na njokŋi mbutluɓ manna lay.

²¹ An hin wi tlesuu duuna ta ta buuna gage? An hin hum del tokolom ma duuna ta ta buuna gage?

Dlara Lona saaraɗ kay suu mamsinara

²² Gasi, suu mansina saarasi kaɗi. Asi ka wanɗi. Ni gor suu to'onosi kaɗina. Asi ka ndak a wi dla na ndeɗi. Asi yal coco kay a li dla cora, a li dla jivira ni asi ka wiɗi.

Ndaŋgara so kiyo, viɗ tlegeyeɗ ki daŋgadla olo

²³ An gol ndaŋgara, ndaɗ mbuɗ ki fulla. Va ka kaɗɗi. Kiɗik mayra kolo huulonara daɓ ki lay.

²⁴ An gol ɦinira, ndaɗ dlakka. Ҥinira halaŋ ki bulumiya.

²⁵ An gol na ni, suu warna ka oloɗi lay. Layagina ŋgay ki halaŋ halaŋ.

²⁶ An gol na ni, mbas mayra bubura ɦayra mbuɗ ki fulla. Ҥoŋzina halaŋ ki ŋgaliya, ni ko yara vi Yawera.

²⁷ Yawe ɓak anaba, ndaŋgara halaŋ mbuɗ ki hahawra. Na may an hin ka ɓeŋ lina ki halaŋgi.

²⁸ Ni kay ndaɗta ndaŋgara ka ni hu hahawra. Kolo wanni huulona mbuɗ ki ndufunda kay ana an kaɓakŋa ki kay dla ndaɗta, an vi ki kan a li dla ndaɗta. An hin ka hoŋ vunun ki daganɗi.

Siyon fok suu ci suuna

²⁹ Humba suuna hum sem kulumi suu duuna u suu duu u mbuurura may ni, suu hu ɦoŋzina na halaŋ halaŋ ŋgay tasiya. Asi kal ki duk bubura may, ɗiŋ ki kolo kay ɦinira may. Ҥoŋzina halaŋ halaŋ asi noyom kiyo. Sa ka kaki hu na dewɗi.

³⁰ Ndak may ni li ni mege? Ndak cuk baraw ma gus loɓma egeku, kal walak lorra humuku. Ndak saɗ tlena kay irik mbuɗuɗ warra lay. Ndak jiv tak ki na lay ni ɦawaa. Banayakŋa ka minik oloɗi. Asi hal a cak ki ni ciya.

³¹ An hum ko ndal yoo tara vi cara hu li ma ndaɗ hal a vuɗta na, ko ndal tii ma hahawra vi cara goora na. Tii ma vi Siyon ta jivira, a miɗ kira ka maɗ koɗu. An ki hahawi. An hin tok a miɗ kira, coli fok suu ci suuna kina.