JEREMI 39 - Boy Lonana

Yerusalem asi tlaɗ kiyo

¹ Hu basara dleeŋera vi Sedesiyas, mul ma Yudana, hu til ma mbana, Nabukodonosor, mul ma Babilonna, mbay u suu mam suu duuna halaŋ halaŋ fun Yerusalem hin tli ɦoŋzina.

² Sedesiyas hu basadamba doogo yam dewra hu til ma fiɗina hu buu ma dleeŋena asi gi zulla kay ɦoŋzina.

³ Sa ŋgol asgaa ma vi mul ma Babilonna mbay kak ki kolo kay li ma ŋgolna. Nergal-Saresser, Samgar-Nebo, u Sar-Sekim, sa ŋgol ma gol u suuna hu taraŋgana. Nergal-Saresser sa ma mulna vi vunum u namma, u suu asgaa suu fok ŋgol asgaanana halaŋ halaŋ.

⁴ Sedesiyas mul ma Yudana u suu mam suu duuna halaŋ wi ana asi mba wa ni, asi pii ki njeŋge hu sene ma vi mulnana hin ɦoŋzina, sel ki hu vun grek ma duk hoŋ gulumunna mbana na, asi tin irisi ha hu li ma Yurdanna na.

⁵ Na may suu duu suu Kaldena ciɗisi usi ta ta vi Sedesiyas hu fulla Yerikora. Asi vam tuɗum hu Ribla hu mbassa Hamatta eg Nabukodonosor, mul ma Babilonna, nam hin dam dlara nam min a laɗta.

⁶ Mul ma Babilonna ŋgaɗ goryoŋ Sedesiyasna ki Ribla irimu. Mul ma Babilonna ŋgaɗ suu ɦizi suu Yudana ki halaŋ halaŋ.

⁷ Na ɗaŋŋi nam hin co ii Sedesiyas kiyo, nam hin ɗagam u gali walakka mba' a tuɗum Babilonda.

⁸ Taraŋ ŋgolla u sigini suu jivi cocona suu Kaldena gasi kura ŋgalasi ki may, to gulumun ma Yerusalemma ki kaŋga may.

⁹ Nebuzaradan, sa ŋgol asgaana, yow suu ɦizi suu hin hu ɦoŋzinana ay olo u suu pii ki mba cuk tasi ki umma lay, halaŋŋi suu ɦizi suu usi hinna.

¹⁰ Na may nam hin suu haw suu va ka kosiɗina ha hu mbassa, nam hin ɦasi sene gugunina u sene wana.

¹¹ Kay Jeremi ni, mul ma Babilonna, Nabukodonosor, min tam ki kam ɦal voɗta maŋ ŋgol asgaana Nebuzaradan gaɗam ana,

¹² «Vam ki koŋu, golom jiviya, lam va co egembi, ɦam tlesuu nam joɓ kasina na ɗow.»

¹³ Nebuzaradan ma ŋgol asgaana, Nebusazaban sa ma gol u suuna hu taraŋgana, Nergal-Saresser sa ŋgol ma mulna vi vunum u namma u suu ŋgolo suu duu suu vi mul ma Babilonna halaŋ halaŋ.

¹⁴ Sun ay hal Jeremi hu taraŋga a ɦam maŋ Gedaliya, ma goŋ Ahikamma, ma goŋ Safanna, hin ɦam voɗta nam tuɗ ha ki varamu. Jeremi kak duk suuna ni na.

Ebed-Melek hin suɗ kiyo

¹⁵ Yawe ɓak boy mamma maŋ Jeremi hu li ma nam ki duki hu taraŋgana ana,

¹⁶ «Tuɗ di Ebed-Melek ma Kusna ana, na ɗaŋŋi Yawe ma Saɓakŋa Kom Belna, Lona vi Israel, ɓak ana, an hin mbaa boy manna ay kay ɦoŋzi namma a lam dla cora egemba, ka lam dla jivi egembi. Hu buu namma ni asi hin mba col fokoŋu.

¹⁷ Hu buu namma ni an hin buɗuŋ ki may. Di na ni Yawe. Sa hin ka ɦaŋ ki maŋ suu aŋ lasi ndaarasinaɗi.

¹⁸ An hin suɗuŋ ki gasi, aŋ hin ka miɗ ki ko ŋgewraɗi, lini aŋ ɦal taŋ ki man wa ni aŋ hin furi kay ana iiri maŋga suɗ ki wa. Di na ni Yawe.»