JEREMI 38 - Boy Lonana

Ebed-Melek tli Jeremi ay ki kolo hu zulla

¹ Sefatiya, ma goŋ Mattanna, Gedaliya, ma goŋ Pasehurna, Yukal ma goŋ Selemiyana, Pasehur, ma goŋ Malkiyana, hum boy ma Jeremi hoŋom dira maŋ suuna olo olona.

² «Na daŋŋi Yawe ɓak anaba, sa hin kaki hu ɦoŋzi nammana hin cam ki u ŋgewna, mayra ŋgolla u tuguɗi bora. Sa kal ki tuɗ ŋgaf suu Kaldena hin kak iiriya. Nam hin li furira hurum kay suɗta nam suɗ tam kira. Gasi nam hin kak iiriya.

³ Na daŋŋi Yawe ɓak anaba, Ҥoŋzi namma hin ɦam ki gasi maŋ suu duu suu vi mul ma Babilonna. Asi hin tli ɦoŋzi namma.»

⁴ Suu ŋgolo suu sunda di mulna ana, «Caygi sa namma kiyo, kay ana nam ɓeŋ saa suu duu suu hu hoŋzi nammana ki lay, suu wara suu ɦawana lay u boy ma nam njaɗamma. Sa namma ka hal ni dlara jivira vi suunaraɗi, may halasi kasi ni dla cora.»

⁵ Mulna Sedesiyas hoŋosi dira ana, «Nam ki ni hu duk kogiya, mulna ka ndak a lagi va egegiɗi.»

⁶ Asi tli Jeremi gam hu zulla vi Malkiya, goŋ mulnana, ta hu taraŋga ŋgollara. Asi siirim kaŋga huruɗ u zewna. Yona ka kaŋga hu zul ndaɗtaɗi, ka huruɗ ni doroɓopma, Jeremi ŋgaɓ kaŋga duku.

⁷ Ebed-Melek ma Kusna, sa ŋgol ma hu taraŋga vi mulnana hum ana asi vi Jeremi gam kaŋga hu zulla hu li ma mulna ha ki kaki fun ziŋ Benjaminda.

⁸ Ebed-Melek col tuɗ di mulna.

⁹ Nam dam ana, «Malanna mulna, dlara suu asina laɗ eg Jeremi, sa jok vun Lonara, ni coo. Asi gam kaŋga hu zulla. Nam hin miɗ ki ko mayra hu zulla, kay ana mappana ka hu ɦoŋzina oloɗi.»

¹⁰ Na daŋŋi mulna ɦal voɗta maŋ Ebed-Melek, ma Kusna, ana, «Yow suuna uŋ hindi, tuɗ tli sa jok vun Lona, Jeremi, ay ki hu zulla jew bay nam miɗa.»

¹¹ Ebed-Melek yow suuna umu, tuɗ hu taraŋga vi mulna gol duk tlena yow baraw ma basina njunum fun tam, siirim ha kaŋga maŋ Jeremi hu zulla u zewna.

¹² Ebed-Melek, ma Kusna, di Jeremi ana, «Boɗ baraw ma basina kaŋga u tlawaŋu, gi zewna ay kamu.» Jeremi li dla ndaɗta.

¹³ Asi taɗ Jeremi ay u zewna hin tlam ay ki kolo hu zulla. Jeremi hin kak hu taraŋga.

Saara vi Sedesiyas u Jeremi daganda

¹⁴ Mulna Sedesiyas sun kay sa jok vun Lona, Jeremi, ana asi mbaamma ay hu vun ziŋ Lonara ta a kalla a hindira. Mulna di Jeremi ana, «An min joɓoŋ dla na dew, aŋ ŋgayan va konɗi.»

¹⁵ Jeremi hoŋ dira maŋ Sedesiyas ana, «Lini an daŋ gasira ni aŋ hin can kiyo, lini an ɦaŋ gaɗta ni aŋ hin ka li uɗɗi lay.»

¹⁶ Na daŋŋi mulna Sedesiyas vi vunum ki ŋgay gumun ko tam u Jeremi ana, «Yawe ma ɦaygi iiri ndaɗtana ka iiriya. An hin ka caŋ kiɗi, ka ɦaŋ ki maŋ suu asi suu min a caŋ kinaɗi lay.»

¹⁷ Jeremi di Sedesiyas ana, «Na daŋŋi Yawe ma Saɓakŋa, Lona vi suu Israelna, ɓak anaba: Lini aŋ tuɗ ŋgaf ŋgol asgaa ma vi mul ma Babilonna wani aŋ hin suɗ kiyo, hin ka ŋgal ɦoŋzi namma kiɗi, aŋ hin kak iiri u suu maŋsina lay.

¹⁸ Lini aŋ ka tuɗ ŋgaf ŋgol asgaa ma vi mul ma Babilonnaɗi ni ɦoŋzi namma hin ɦam ki maŋ suu Kaldena, asi hin ŋgalam kiyo, aŋ taŋga may ni hin ka suɗ kosiɗi.»

¹⁹ Mulna Sedesiyas hoŋ dira maŋ Jeremi ana, «Va ma an saa kam ŋgolna ni yowra suu Kaldena yow suu Yudanara, an lay ni asi hin van lay panan lay.»

²⁰ Jeremi dam ana, «Sa hin ka ɦaŋ kiɗi, hum del Yawe u dlara an daŋgara aŋ hin kak jiviya, hin suɗ ki lay.

²¹ Na may ni aŋ li ka hin taŋgi, ka humbi ni gol dlara Bu Suuna takandara wana.

²² Boyogi suu hu taraŋgana halaŋ halaŋ mbay fok ŋgol asgaa ma vi mul ma Babilonna, asi dam ana, Asi ganaŋ yaŋu, asi tew ki fun daɓ masira wa suu miniŋ ɦayna. Gayaŋ ka ŋgaa kaŋga duk luɓuna, asi may ni ka ŋgay tasiya.

²³ Boyogoŋ u goryoŋ halaŋ asi tuɗusi ki maŋ suu Kaldena. Aŋ taŋga lay ni hin ka suɗ ki kosiɗi. Mul ma Babilonna hin vaŋu, ŋgal ɦoŋzina ki may.»

²⁴ Sedesiyas di Jeremi ana, «Ko sa hum boy ma ay ɓakam duk tay wannaɗi li ka naɗi ni aŋ hin miɗ kiyo.

²⁵ Lini suu ŋgolo suu sunda hum wa ana ay ɓak duk taya ni asi hin mbay joɓoŋ ana njaɗami boy ma aŋ ɓakam maŋ mulnana aya, aŋ ŋgay vaɗi, kaɗi ni ami caŋ kiyo. Mulna hin daŋŋi ana mege?

²⁶ Aŋ hin hoŋosi dira u deleŋga jivira ana, An min ɓak maŋ mulna ni ana nam ka di kin ki a tuɗ miɗ ha ki hu zira vi Yehona tandaɗi.»

²⁷ Ko ndaɗta na suu ŋgolo suu sunda mbay joɓ Jeremi hu hoŋ diimba ni nam min a hum mi gaɗta vi mulnara. Asi hin dokom vunum kaɗi. Na may boy namma mbuɗ ka vunɗi.

²⁸ Jeremi hin kak hu taraŋ ŋgolla ta ta hu buu ma asi tli Yerusalem kina.