JEREMI 37 - Boy Lonana

Mulna Sedesiyas mbay gol Jeremi

¹ Mulna Sedesiyas ma goŋ Josiyasna varak kay mulla balam Koniya ma goŋ Joakimma Nabukodonosor mul ma Babilonna paɗam ki hu mulla kay mbassa Yudara.

² Sa ka hum boy ma vi Yawe ma saam ma jokom vunumma Jeremi ɓakammaɗi. Nam tambaɗi lay, suu mam suu sundaɗi lay, suu maliyaŋ ndaŋgaranaɗi lay.

³ Mulna Sedesiyas sun Yehukal, ma goŋ Selemiyana, u mul ma li ɓivunna Sefaniya, ma goŋ Maaseyana eg sa jok vun Lona, Jeremi, dam ana, «Joɓ ay kamiya, an ceneŋu aŋ joɓ Yawe, Loomina, ay kamiya.»

⁴ Jeremi col ki duk suuna gi tam ki na en gaw. Sa gam ka daŋgaynaɗi.

⁵ Suu duu suu vi Farawna yow ki hin Egipte kiyo, suu Kalde suu ŋguy Yerusalemma hum boy namma may ni ɦuɗ tasi ki eg Yerusalem na day gaw, hin li namma.

⁶ Na daŋŋi Yawe ɓak boy mamma maŋ Jeremi ana,

⁷ Yawe, Lona vi suu Israelna, ɓak anaba, gola ni dlara agi hin daɗ maŋ mul ma Yuda ma sunugi ay egenna agi joɓon haana. Suu duu suu vi Faraw suu hin Egipte ki mbay a njunugina hin hoŋ dagan tli liisi ma hu Egiptena.

⁸ Suu Kaldena hin hoŋ ay tli ɦoŋzi namma, asi hin tlamu, hin ŋgalam kiyo.

⁹ Na daŋŋi Yawe ɓak anaba, agi jokogi saaragi ki a saa ana suu Kaldena sel ay ki varagi ni a fafaɗta naɗi. Asi tuɗ kaɗi.

¹⁰ Ko ndaɗta na may ni agi hin cagi suu duu suu Kaldena kiyo, suu tlagi liigina kina, suu ɦiw hin hina, asina hin min tasi ay kaŋga hu mbutluɓ masina hin ŋgal ɦoŋzi namma kiyo.

Jeremi asi kaam boyna kamu

¹¹ Suu duu suu Kaldena ɦuɗ tasi ki hu Yerusalem ko suu duu suu vi Farawna.

¹² Jeremi min a kal ki hu Yerusalem tuɗ ki hu mbassa vi Benjaminda kay dlara varak balam tara hu ɗee mambara.

¹³ Nam tew fun ziŋ Benjaminna may ni ŋgaf sa ŋgol ma asgaana yam ana Iriya, ma goŋ Selemiyana, goŋ Hananiyana. Sa namma vi Jeremi dam ana, «Aŋ tuɗ ndi ni duk suu Kaldena.»

¹⁴ Jeremi hoŋom dira ana, «Ni coo, an ka saa ana an hin tuɗ ndi ni kay suu Kaldenaɗi.» Na may Iriya ka min a humbi, nam vi Jeremi tuɗum fok suu ŋgolo suu sunda.

¹⁵ Suu ŋgolo suu sunda mbuɗ yara u Jeremi vam cam poŋga tuɗum gam daŋgayna hu zira vi sa ŋgol ma li sunda Yonatan. Asi min zira daŋgayna huwa.

¹⁶ Nam tuɗ ha kurufu hin tew ha ki hu zira goora huruɗ ɦeɓira. Jeremi kak hu li namma ŋgol cocoo.

Sedesiyas ŋgay tam tuɗ joɓ Jeremi

¹⁷ Mulna Sedesiyas sun kam halam aya. Mulna joɓom ki ŋgay hu ziim ana, «Na ni boy ma Yawe ɓakamma ka su?» Jeremi hoŋom dira ana, «Haa.» Nam hin dam olo ana, «Mul ma Babilonna hin vaŋ lasaŋu.»

¹⁸ Na daŋŋi Jeremi di mulna Sedesiyas ana, «Dla cora an laŋga egeŋga ni tarage? Suu maŋ suu sunda, suu maŋsina a agi gan daŋgayna ni ge?

¹⁹ Suu jok vun Lona suu ɓakagi ana agi tagira lay, mbas ndaɗta lay ka a li ndaa lassa vi mul ma Babilonna ɗina ni arage?

²⁰ Cecem wanda aŋ hum haa malanna mulna, hinin an tin kon egeŋ u cen manda, digin hoŋon hu ziŋ sa ŋgol ma sunda Yonatanɗi. Ha tana wanni an hin miɗ kiyo.»

²¹ Na daŋŋi mulna Sedesiyas ɦal voɗta ana asi hin Jeremi ki hu taraŋga hin ɦam komnjoɗira dew dew hu buuna tew tew ay hu li ma li mappana ay huna ta ta hu li ma sa ka fi mappa hu ɦoŋzina oloɗina. Na daŋŋi Jeremi hin ki kiɗik hu taraŋga ni na gaw.