JEREMI 36 - Boy Lonana

Bolow boy ma Jeremi damma

¹ Hu basara fiɗira vi Joakim ma goŋ Josiyas ma mul ma Yudana, Yawe ɓak boy mamma maŋ Jeremi.

² «Ҥirik bakka ki ɓii boy ma an daŋŋa kay Yuda, kay suu Israelna kay njaf suuna halaŋ hu li ma an gijaŋŋa ɓakaŋ ay hu li ma Josiyas a mulna dayna ta ta karami.

³ Kala suu Yudana hin tin saarasi kay dla cora an di kaɗ ana hin lasira egesiyara kala, a gegelay hin hom ki kay dla coomba u tuɗ mamba cora, a an hin ɦasi gira kay maɗ ma asi camma u cora asi laɗta.»

⁴ Jeremi yi Baruk ma goŋ Neriyana aya, nam hin ɓii kaŋga hu bakka, Jeremi ɓakam ay may, dlara Yawe dambara halaŋ halaŋ.

⁵ Jeremi joɓ Baruk olo ana, «An ki dooriya, an ka tuɗ hu zira vi Lonaraɗi.

⁶ Aŋ tuɗ hu u taŋga hu buu ma li laara hu zira vi Lonara, col iriŋ ha kay suuna na ndum boy ma ɓiiri hu bakkana ma aŋ ɓiirim an daŋŋa col ay fun Yawena. Ndumum ki maŋ suu Yuda suu col ay hu ɦoŋziisina zeɗ zeɗ mbayna.

⁷ Kala li ni tii masina hin tew ki eg Yawe kala, a gegelay hom ki kay tuɗ mamba cora kay ana yara vi Bu Suunara ta nam a laɗ eg suu asinara ka ŋgol cocoo.»

⁸ Baruk ma goŋ Neriyana li dlara sa jok vun Lona, Jeremi, dambara eg liiɗ na ɗegee. Nam ndum boy ma ɓiiri hu magaa ɓakkana hu Ziŋ Lonara ni Boy ma vi Yawena.

⁹ Hu basara vadlla vi Joakimma goŋ Josiyas mul ma Yudanara, hu tilma dleeŋena, asi yi suu Yerusalemma, suu hu ɦoŋzi ma Yudana suu mbay Yerusalemma ay halaŋ halaŋ a li laara fok Yawe.

¹⁰ Na ɗaŋŋi Baruk ndum boy ma vi Jeremi ma ɓiiri hu magaa bakkana hu Ziŋ Lonara, hu zira vi Gemariya ma goŋ Safan ma li sunda hu taraŋ ŋgolla hu vun zira wilira vi Ziŋ Lonara. Nam ndum boy namma ki maŋ suuna halaŋ halaŋ.

¹¹ Doli ɗaŋŋi Mika, ma goŋ Gemariyana, ma goŋ Safanna, hum boy ma vi Yawena halaŋ halaŋ ko nam ay ɓiiri hu magaa ɓakkara na.

¹² Nam tuɗ ha hu ziŋ mulnana kal hu ziŋ sa ŋgol ma ɓii magaara nam fi suuna ka li tokka. Sa ŋgol ma li sunda Elisama, Delaya, ma goŋ Semayana, Elnatan, ma goŋ Akborna, Gemariya, ma goŋ Safanna, Sedekiya, ma goŋ Hananiyana, u suu ŋgolo suu sun suu daŋŋa.

¹³ Mika jokosi dla mayra nam humuɗ ayra halaŋ halaŋ hu li ma Baruk, ma goŋ Neriyana, ndum boy namma ay hu magaa bakka ki maŋ suuna halaŋ halaŋŋa.

¹⁴ Na ɗaŋŋi suu ŋgolo suu hu tokkana vi vunusi sun Yehudi ma goŋ Netaniyana, goŋ Selemiyana, goŋ Kusina eg Baruk dam ana, «Tli magaa bakka aŋ ndum boyna huruɗ ay fok suunara ɦamira aya.» Baruk ma goŋ Neriyana tli magaa bak ndaɗta kom tani mbay egesiya.

¹⁵ Asi dam ana, «Aŋ kak kaŋga ndumumi boy ma hu magaa bakkana ay kiyo.» Baruk li ko asi minda na.

¹⁶ Humba asi hum boy namma ki na halaŋ halaŋga ni asi mbuɗ ki ndaana cocoo. Ŋgoo dagan asi di Baruk ana, «Ami hin ka maa boy namma bay jokom ki maŋ mulna bel belɗi.»

¹⁷ Asi hin joɓom ana, «Aŋ njaɗami dlara aŋ laɗ hu li ma nam njaɗaŋ ay may aŋ ɓii mayna ay gige.»

¹⁸ Baruk hoŋosi dira ana, «Nam njaɗan boy namma halaŋ halaŋŋi u tamba hu li ma an ɓiirim u mbo tlena hu magaa bakka na mayna.»

¹⁹ Suu ŋgolo suu li sunda di Baruk ana, «Tuɗ ŋgay taŋu, Jeremi lay. Ka sa wi li ma agi ka hunaɗi.»

²⁰ Hu li ma nam gi magaa bakka ha kaŋga hu zira vi sa ŋgol ma sunda Elisamana, asi kal vo vi mulna hu ziim ki ŋgay dagan dayna, asi ɓakam dlara lira halaŋ halaŋ.

²¹ Na ɗaŋŋi mulna sun Yehudi hal magaa bakka aya, nam tuɗ tlaɗ ay hu ziŋ sa ŋgol ma li sunda Elishamara mba ndum boy ma huruɗna ki maŋ mulna u suu mam suu ŋgolo suu sunda halaŋ halaŋ coli kolo u sesi ŋguy kay mulnana.

²² Mulna may ni ha ni kaki hu zi mayra nam bassa huruɗ hu til semeɗnara. Ni hu til ma dleeŋena kura ŋgali fokom hu guɓuura.

²³ Hu li ma Yehudi ndum darra ki hindi ɗowba fiɗi kala ni mulna ŋgaɗaɗ ki u ŋgewra vi suu ɓii magaarara cukuɗ ki duk kura hu guɓuura gaw gaw, ta ta magaa bakka daɓ taɗ ki ŋgalla duk kura hu guɓuura.

²⁴ Asi mbuɗ ka ndaaɗi, asi haa barawi masisina ka kiɗi, mulna u tamba lay, suu mam suu ŋgolo suu sunda sa na dew lay ni li ndaa kaɗi hu li ma asi hum boy namma ki na halaŋ halaŋŋa.

²⁵ Hu li ma ugi Elnatan, Delaya u Gemariya tuɗ eg mulna doorom ana nam ŋgal magaa bakka kiɗi na, nam humusi kaɗi.

²⁶ Nam ɦal voɗta maŋ Yerameel ŋgol asgaa ma ci suuna, maŋ Seraya ma goŋ Azriyelna, maŋ Selemiya, ma goŋ Abdeelna, ana asi vi sa ŋgol ma ɓii magaara, Baruk, u sa jok vun Lona, Jeremi, na may Yawe ŋgayasi kiyo.

²⁷ Ŋgoo dagan hu li ma mulna ŋgal magaa bak mayra boy ma Baruk ɓiirimma huruɗ Jeremi njaɗammana kina, Yawe ɓak boy mamma maŋ Jeremi,

²⁸ «Ҥirik bakka daŋga, ɓii boy ma ay hu magaa bakka mul ma Yudana Joakim ŋgalaɗ kira,

²⁹ Aŋ hin di Joakim mul ma Yudana ana, Yawe ɓak anaba, aŋ ŋgal magaa bakka jewra ki yalan ana an ɓii huruɗ ana mul ma Babilonna hin mbay ɓeŋ mbas ndaɗta kiyo, hin njay suu warna u mburi suu huruɗna ki lay.

³⁰ Na daŋŋi Yawe ɓak kay Joakim mul ma Yudana. Sa hin ka varak balamam kay mulla vi Davidtaɗi, hin gam maɗam ki ii faɗta nduh nduhra, ii semeɗ ma njeŋge ŋgeɓ ŋgeɓma.

³¹ An hin li yara u namu, u suu mam suu sunda lay, u njafam lay kay maɗ ma asi camma, an hin cukusi suu hu Yerusalemma ay kasi u suu Yudana, dla cora an di ana an lasira egesira halaŋ kay asi humun kadi.»

³² Jeremi ɦirik bakka daŋga ɦaɗ maŋ sa ŋgol ma ɓii magaara, Baruk, ma goŋ Neriyana. Nam ɓii tlesuu Jeremi damsinana huruɗ halaŋ halaŋ suu ay hu magaa bakka mulna Joakim ma Yudana ŋgalaɗ kira. Boy ma ndal ndaramma nana cukum duk cocoo.