JEREMI 35 - Boy Lonana

Dlara suu Rekabma takaɗta

¹ Yawe ɓak boy mamma maŋ Jeremi hu cokira Joakim ma goŋ Josiyas, mul ma Yudana, ana,

² «Tuɗ eg njaf suu Rekabma ɓakasiya, mbaasi ay hu ziŋ Lonara hu huruɗ maa dew, ɦasi sum veŋŋa, asi camu.»

³ An tuɗ hal Yaazaniya ma goŋ Irmeyana, ma goŋ Habasiniyana, gorsemma halaŋ u goryom halaŋ, njaf suu Rekabma halaŋ.

⁴ An mbaasi ay hu ziŋ Lonara, hu huruɗ maa dew ma vi goryoŋ Hananna, goryoŋ Igdaliya huna sa vi Lonana. Huruɗ mayra eg taɗ ura vi suu ŋgolo suu sundara, kolo kay ta vi Maaseya ma goŋ Salum ma gol u vun goŋga.

⁵ An tin tassana oy u sum veŋŋa fok njaf suu Rekabma u tlesuu cira hin dasi ana, «Cagi sum veŋŋa nde.»

⁶ Asi hoŋ dira ana, «Ami ka ci sum veŋŋaɗi. Bumi ŋgolo, Yonadab, ma goŋ Rekabma gaɗami ka ana, agi cagi sum veŋŋaɗi a fafaɗta, agi tagiraɗi lay, goryogiɗi lay.

⁷ Agi minigi zi kagiɗi, agi zaragi njaf va kaŋgaɗi lay, pagi ŋgusuginaɗi lay, vagi sene ŋgusuginaɗi lay. Na may agi buurugi ni u mbutluɓma hu kak magira bel, a hin kak iiri ŋgolla kay ndaŋgara agi huruɗta.

⁸ Ami hummi u gaɗta bumi ŋgolo ma goŋ Yonadab, Rekabma, ɦamira kara. Ami ka ci sum veŋŋaɗi, ami tamira lay, boyogomi lay, goryomi suu njufiina u gorɓiina lay.

⁹ Ami minimi ziginina ka a kakami huɗi, ami vi sene ŋgusugina kaɗi, sene kaɗi lay, njaf va kaɗi lay.

¹⁰ Ami buu ni hu mbutluɓma. Ami hummi u gaɗta vi bumi ŋgolo Yonadab ɦamira kara.

¹¹ Ni hu li ma Nabukodonosor mul ma Babilonna tli mbassa kina ami di tami ana, jivira ni tuɗuygi Yerusalem njafaygi suu duu suu saɓak suu Kaldena u suu Arameena. Na ɗaŋŋi ami hin tuɗ kakami ha ki hu Yerusalemmi na gaw.»

¹² Na ɗaŋŋi Yawe ɓak boy mamma maŋ Jeremi.

¹³ «Na ɗaŋŋi Yawe, ma Saɓakŋa Kom Belna, Lona vi suu Israelna, ɓak anaba, tuɗ di suu Yudana u suu hu Yerusalemma. Na ni agi ndak a humun gaɗ manda u boy manna ɗaŋ su? Yawe di na.

¹⁴ Doora Yonadab ma goŋ Rekabma doorogi ki kay sum veŋŋa a camba hiniɗ ka maŋ goryomba asi hum uɗ ɦay. Asi ci sum veŋŋa kaɗi ta ta karami, hummi u gaɗta vi busi ŋgolora. Na may an ɓakagi ta ta lay ni agi humun kaɗi.

¹⁵ An sunugi suu man suu sunda suu jokon vununna ha egegi tew tew lay asi dagi ana agi homogi kiyo, gegelay kay tuɗ mamba cora, gasi mbuɗugi dlaagira lira ki zeɗ liŋigi kay cee loogi suu ɦawana a goɓosiɗi, agi hin kakagi ni kay ndaŋgara an ɦagira ki magilay, maŋ somoyogi layra. Na may ni agi tinigi humugi kaɗi lay, humungi kaɗi lay.

¹⁶ Goryoŋ Yonadabma may ni asi hum u gaɗta busi ŋgolo ɦasira kara, na may suu asina ka humunɗi.

¹⁷ Na ɗaŋŋi Yawe ma Saɓakŋa, Lona vi suu Israel, ɓak anaba, An hin mba dla cora ay kay suu Yudana u suu hu Yerusalemma u bolowoɗ halaŋ ta an vi kan a lasira egesira. Kay ana an ɓakasi cocoo asi humun kaɗi, an yasi coco lay asi hoŋ dira kaɗi lay.»

¹⁸ Jeremi ɓak njaf suu Rekabma ana, «Yawe, ma Saɓakŋa kom Belna, Lona vi Israel, ɓak anaba, agi humugi u gaɗta vi bugi ŋgolo Yonadabpa, agi li u gaɗ mamba halaŋ may, lagi dlara nam dagi kaɗ ana agi laɗura jivi ɗegee may.

¹⁹ Na ɗaŋŋi Yawe, ma Saɓakŋa Kom Belna, Lona vi suu Israel, ɓak anaba, Yonadab ma goŋ Rekab ma suu hin a col fokon hu buuna tew tewna hin ka kaɗak kombi.»