JEREMI 34 - Boy Lonana

Dlara hin li eg mulna Sedesiyas hu buu ma fokŋara

¹ Yawe ɓak boy mamma maŋ Jeremi hu li ma Nabukodonosor mul ma Babilonna u suu mam suu duuna halaŋ, suu muli suu kay mbassa nam ti mulla kaɗta halaŋ, suuna halaŋ tli Yerusalem u ɦoŋzi ma ŋguy kaɗna halaŋ halaŋ may.

² Na ɗaŋŋi Yawe, Lona vi suu Israelna, ɓak anaba, tuɗ di Sedesiyas, mul ma Yudana, gasi aŋ dam ki jiviya, «Na ɗaŋŋi Yawe ɓak anaba, an hin ɦal ɦoŋzi namma ki maŋ mul ma Babilonna nam hin ŋgalam kiyo.

³ Aŋ lay ni hin ka suɗ ki kombi, nam hin vaŋu, aŋ hin li lassa. Aŋ lay mul ma Babilonna lay hin cologi fun tagiya nam hin ɓakaŋŋi sa ka jokom dukgi. Aŋ hin tuɗ ki Babilon.

⁴ Na lay ni Sedesiyas, mul ma Yudana, hum boy ma vi Bu Suunana haa. Yawe ɓak kaŋ anaba, aŋ hin ka miɗ ki ko ŋgewraɗi.

⁵ Aŋ hin miɗ ni u heɓpa. Asi hin ŋgal mbul ma his jivina kaŋ ko asi ŋgalam kay somoyoŋga na, suu ti mulla ay ki fokoŋ jewna na. Asi hin gi soolla tii maɗna kaŋu. Ni dla co me nage, malanna. Gasi an ɓak boy namma kiyo. Yawe di na.»

⁶ Sa jok vun Lona, Jeremi, ɓak boy namma ki fok Sedesiyas mul ma Yudana halaŋ halaŋ hu Yerusalem.

⁷ Hu li ma suu duu suu vi mul ma Babilonna tli Yerusalem u ɦoŋzi ma Yudana ma hin ka tuna Lakis u Azeka, kay ana duk ɦoŋ ɦoŋzi ma Yudana ɦoŋzi ma ca wanna ka ni a li ma saɓakŋa huna.

Mborɓogi suu Hebrena cukusi ki hin yowosi olo

⁸ Yawe ɓak boy mamma maŋ Jeremi ŋgoo dagan hu li ma mulna Sedesiyas ɓak ki maŋ suu hu Yerusalemma halaŋ halaŋ vi vunusi a cuk mborɓogina kiyo.

⁹ Gegelay hin cuk mborɓogi mam suu Hebrena kiyo, njufiina u boyogina, dukusi halaŋŋi sa hin ka li sun fok sa Yuda ma wayam oloɗi.

¹⁰ Na ɗaŋŋi suu ŋgol dlara kosina halaŋ, suu vi vunusi a cuk mborɓogina kina, njufiina ɗowba boyogina, ka a sa lasasi ŋgoo dagan oloɗi vi vunusi ki na. Asi vi vunusi hin cuk mborɓogi masisina kiyo.

¹¹ May tuɗ fok na nde ni asi hin hoŋ balamasiya. Asi yow mborɓogi suu asi cukusi kina, njufiina u boyogina hin gasi jaŋ lassa ko mborɓogina na olo, njufiina u boyogina.

¹² Boy Yawena ɓak Jeremi, u sem Yawe ana,

¹³ Na ɗaŋŋi Yawe, Lona vi suu Israelna, ɓak anaba, an ni sa haɗ vi vun namma maŋ somoyogina, hu li ma an selesi ay ki hu mbassa Egiptera hu zi ma mbaɓura.

¹⁴ «Tew ki fun cokira basara kiɗisiyara ni gegelay duk hoŋogi ni hin gi wayam ma Hebre ma gus tam ki komma. Nam hin li mbaɓura fokoŋŋi basara karkiya, ŋgoo dagan aŋ hin gamu.» Na may somoyogi hum boy namma kaɗi, asi hin humusi kaɗi lay.

¹⁵ Hu cokira cecem wanda agi hom ki wa, lagi dlara irin jivira. Gegelay dukugi ɓak ki u vunum kay gira gi wayammara, agi vi vunugi kay dla ndaɗta ni fokonu, hu Zira suuna ka ɓak ki u sen huruɗta.

¹⁶ Na may agi hoŋogi irigi dagani, ɓeŋengi sen kiyo. Dukugi ni gegelay hoŋ mborɓogina yowra, njufiina u boyogina suu asi cukusi ki gin layna. Agi hoŋosi lassa cecemmi ni ko mborɓogi magisina na olo njufiina u boyogina.

¹⁷ Na ɗaŋŋi Yawe ɓak anaba, Agi humun vunun ka kay cukka cuk gorsegina u ndarayagina kira kaɗi ni, an may ni hin vi vunun kagiya, Yawe di na, cagi ki u ŋgewiina, u mayra, tuguɗi bora lay. An hin mbuɗugi ki a va ma tak ma suuna halaŋ u suu muli suu kay ndaŋgarana lay li ndaana komma.

¹⁸ An hin yow suu war suu li ka u vi vun ma an di kammaɗina, suu li ka u gaɗta vi vunna kaɗtaɗina. Asi di fokon ana asi vi gaɗ ndaɗta kasiya, ɓorow ii mbala goo mbutlna ki duk mba', calaɗ kam lay.

¹⁹ Maliyaŋ mbassa Yudara u suu Yerusalemma, sa ŋgol ma hu taraŋgana, muli suu li ɓivunna u suu maliyaŋ mbassana, suu calaɗ kay mbala goo mbutlna ki ɓorowi duk mbana halaŋ.

²⁰ An hin ɦasi ki ko suu babali masisina, maŋ suu halasi a casi kina maɗasi hin mbuɗ ni li ma layagi suu huulonana fi ti masina u mburi suu kay ndaŋgarana huna.

²¹ Kay Sedesiyas ma mul ma Yudana u suu ŋgolo mam suu sunda, an hin ɦasi ki maŋ suu babali masisina, maŋ suu halasi a casi kina. Maŋ suu duu suu vi mul ma Babilonna suu tli lina halaŋ halaŋŋa.

²² An hin ɦal voɗta, Yawe di na, asi hin mbay duu u ɦoŋzi namma, asi hin ŋguyum ki na cutl, hin tlamu, hin ŋgalam kiyo, ɦoŋzi ma Yudana an hin mbuɗum ki li ma hahawra, li ma suu war ka huɗina.